Шударга мэдээ
Ерөнхийлөгч өө тайланд чинь Таны оффшор алга
2017 оны Ерөнхийлөгчийн сонгуулийн үеэр АН-аас “Монгол ялна” уриатайгаар нэр дэвшсэн Халтмаагийн Баттулга оффшороос 17 тэрбум доллар оруулж ирэх амлалтаа сүр дуулиантайгаар зарлан АТОЗ-той гэрээ байгуулж, тухайн үедээ л олны анхаарлыг татсан.
Х.Баттулга Монгол улсын Ерөнхийлөгчөөр сонгогдсон өдрөөсөө өнөөдрийг хүртэл 4 жилийн хугацаанд оффшороос мөнгө оруулж ирж байгаа хэмээн сүржин мэдэгдэл хийж ирсэн ч үнэн хэрэгтээ улсын төсөвт оффшороос нэг цент ч орж ирээгүй юм. Үүнийг нь түүнийг Ерөнхийлөгч байх хугацаанд Сангийн сайдаар ажилласан Ч.Хүрэлбаатар, Б.Жавхлан нар болон УИХ-ын дарга Г.Занданшатар зэрэг төсөв санхүүгийн асуудлыг хамгийн сайн мэдэх учиртай албан тушаалтнууд удаа дараа мэдэгдсэн.
Харин өчигдөр Ерөнхийлөгч Х.Баттулга өөрийн эзэмшлийн С1 телевизээрээ АТОЗ-той байгуулсан гэрээнийхээ тайлан нэвтрүүлгийг “Алганы хээ ток шоу – Гавьяат жүжигчин Н.Онон” гэх нэртэйгээр гаргав. Би хийсэн гээд өмчилчих ажил хийгээгүй Ерөнхийлөгч маань АТОЗ-ынхонд өөрийн биеэр тайлан тавих нүүргүй болсон бололтой. Онон гавьяатын яриаг орхигдуулан байж нэвтрүүлсэн онлайн хичээлийн форматтай тайлан нэвтрүүлгээр нь ЕТГ-ын дэд дарга гэх үл таних залуу өөртөө итгэлтгүй, өлбөгөр сулбагархан яриад өнгөрөв.
За тэр нэр ус, хөтлөгч ч дүүрч гэхэд Ерөнхийлөгчийн маань 4 жилийн хуруу хумсаа хугалан байж хийсэн гэх ажил нь Нийслэлийн прокурорын орлогч Ц.Насанбатын хууль зөрчин үүсгэж, улс дамнуулан будлиулсан гэж хэвлэл мэдээлэл, олон нийтээр цоллуулаад буй өнөөх л Сү-гийн талаарх үр дүнд хүрэх эсэх, үнэн худал нь эргэлзээтэй, улиг болсон шар мэдээ л байлаа. Энэ ичгэвтэр тайлангаа олны анхааралд хүргэлгүй өнгөрөөе гэсэндээ Онон гавьяатын нэрээр гаргаа юм болов уу даа.
Харин улиг болсон хов базахынхаа оронд “Өдөр тутмын сонинуудын Эрэн сурвалжлагч нэгдэл”-ээс илрүүлэн баримт нотолгоотойгоор олон нийтэд ил болгосон (линк 1, линк 2, линк 3) өөртэйгөө холбоотой “Genco Holdings PTE” тэргүүтэй өч төчнөөн оффшор компани, америк дахь үл хөдлөх хөрөнгө, агуулах савныхаа талаар олигтойхон хэдэн үг хэлчихсэн бол АТОЗ-ын нөхдийнх нь ч, ард түмний ч сэтгэл амрах байсан биз ээ. Ерөнхийлөгч маань оффшорын амлалтаа биелүүлэх чиглэлд нэг их хүчлээгүйн гол шалтгаан нь өөрийнх нь энэ олон оффшор компани, гадаад дахь үл хөдлөх хөрөнгөнөөс нь болсон болов уу.
Өр тэглэнэ гэсэн амлалтандаа ч хүрээгүй байж өрх бүрт сая төгрөг өгнө хэмээн биелэшгүй амлалтын цуваагаа үргэлжлүүлсэн түүнд итгэх иргэдийн итгэл аль эрт алдраа биздээ.
Б.Отгон
Шударга мэдээ
Багануурын Ус, дулаан дамжуулах төвийг шинэчилж, 2289 метр урт дулааны шугам угсарч байна
Багануур дүүргийн 5 дугаар хороо, Залуус хэсгийн 24.8 га талбайн дахин төлөвлөлтийн асуудлаар нийслэлийн Засаг даргын нэгдүгээр орлогч Т.Даваадалай Багануур дүүргийн Засаг дарга С.Даваасүрэнтэй ажиллалаа. Өнөөдрийн байдлаар тухайн байршилд инженерийн шугам сүлжээний ажлууд хийгдэж, 60 хувийн гүйцэтгэлтэй байна.
Багануур дүүргийн Засаг дарга С.Даваасүрэн “Энэ хэсэгт Багануурын анхны шавийг тавьж байсан. Хүн ам олноор суурьшиж нарийн гудамжууд олонтой болсон. Иргэдийн амьдрах орчныг сайжруулах зорилгоор энэ хэсэгт айл өрх, аж ахуйн нэгжийн 500 орчим нэгж талбарыг чөлөөлөх хэрэгтэй байгаа. Хамгийн түрүүнд газрын дахин үнэлгээг хийх шаардлагатай” гэлээ.
“Бум од” компанийн төслийн менежер н.Батхүрэл “2024 оноос энэ хэсэгт дэд бүтцийн ажлыг эхлүүлсэн. 2026 он хүртэл 3 жилийн хугацаанд үргэлжилнэ. Ус, дулаан дамжуулах төвийг буулган шинэчлэх, 2289 метр 5 хос дулааны шугам угсрах, 2500 метр ариутгах татуургын ажлыг хийнэ. 2024 онд Ус, дулаан дамжуулах төвийн буулгалт, шинэчлэлийн иж бүрэн ажлыг хийж дуусгасан. 2289 метр 5 хос дулааны шугам угсрах ажил хийхээс 1000 метр шугамыг угсарсан. Аравдугаар сарын 1-нд энэ жилийн төлөвлөгөөт ажлууд дуусна. Трасс шугам угсрахад газар чөлөөлөх хэрэгтэй” гэв.
Нийслэлийн Засаг даргын нэгдүгээр орлогч Т.Даваадалай Багануур дүүрэгт Устөрөгчийн үйлдвэр, сэргээгдэх эрчим хүчний станц барих, эмнэлэг, сургуулийн их засвар, гудамж, талбайн тохижилт, дулааны станцыг шинэчлэх, авто зам барих гээд олон ажлын үр дүнтэй танилцаж, цаашдын төлөв байдлыг хэлэлцлээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Шударга мэдээ
Нэг цонхны үйлчилгээг цахимжуулж, экспортыг нэмэгдүүлнэ
Засгийн газрын ээлжит хуралдаан 2025 оны наймдугаар сарын 20-нд болж, экспортыг нэмэгдүүлэх талаар авах арга хэмжээний тухай Засгийн газрын тогтоол гарлаа. Тус тогтоолоор Гашуунсухайт хилийн боомтын “Автомат удирдлагатай чингэлэг тээврийн терминал”-ын ухаалаг гарцаар Монголын хөрөнгийн биржээр арилжаалсан нүүрс тээвэрлэх жолоочтой тээврийн хэрэгслийг нэвтрүүлж, тээврийн үйл ажиллагааг тасралтгүй зохион байгуулах арга хэмжээ авахыг холбогдох албан тушаалтнуудад үүрэг болголоо.
Уул уурхайн бүтээгдэхүүний биржээр арилжаалах эрчим хүчний нүүрсний үнийг зах зээлийн үнийн индексийн хөдөлгөөнд нийцүүлэн өөрчлөх, Гаалийн бүрдүүлэлт хийх, улсын хилээр нэвтрүүлэх бараа, тээврийн хэрэгсэлд гаалийн хяналт тавих ажлыг цахимжуулахыг даалгалаа.
Манай улсад гадаад худалдаа эрхлэгчийн бүрдүүлж байгаа маягтуудаас гаалийн мэдүүлэгт хамгийн их буюу 116 төрлийн, улсын бүртгэлийн гэрчилгээ хамгийн цөөн буюу найман төрлийн мэдээллийг агуулдаг. Экспортын үйл ажиллагаанд 40 гаруй бичиг баримт бүрдүүлж байгаагаас зарим тохиолдолд дунджаар 6-12 удаа давхардуулан шаардаж байна.
Гадаад худалдаанд тулгарч буй эдгээр хүндрэлүүдийг цахим нэг цонхны үйлчилгээг нэвтрүүлэх замаар шийдвэрлэхээр төлөвлөсөн боловч системийн санхүүжилттэй холбоотойгоор ажил удааширчээ. Иймд санхүүжилтийн асуудлыг цаг алдалгүй шийдвэрлэж, худалдан авах ажиллагааг яаралтай эхлүүлэх үүрэг өглөө.
Хилээр экспортод гаргах уул уурхайн бүтээгдэхүүний лабораторийн шинжилгээний дээж өгөх, хариу авах үйл ажиллагаа нь голчлон Улаанбаатар хот дахь Гаалийн төв лабораториос хамаарч байгаа нь экспортыг удаашруулах нэг хүчин зүйл болж байна. Тухайлбал, нүүрсний дээжийг гаалийн төв лабораторид өгөөд хариу авах хүртэл дунджаар долоо хоног, хамгийн ихдээ 35 хоног хүртэл зарцуулж байна. Мөн хилийн Гашуунсухайт боомт дахь шинжилгээний лабораторийн барилгын ажил дуусаж, тоног төхөөрөмжүүд бэлэн болж байгаа ч үйл ажиллагаа эхлээгүй байна. Иймд тус тогтоолоор мөн,
- Гаалийн Төв лабораторид шинжлэх нүүрсний дээжийг 48 цагийн дотор магадлан шинжилгээний дүгнэлтийг гаргах боломжийг 2025 оны наймдугаар сард багтаан бүрдүүлэх,
- Гашуунсухайт боомтын гаалийн салбар лабораторийг 2025 онд багтаан ашиглалтад оруулах,
- Бусад боомтын лабораторийг ашиглалтад орох хүртэл хугацаанд хувийн компаниудын лабораторийн мэдээллийг гаалийн мэдээллийн системд 2025 оны гуравдугаар улиралд багтаан холбох ажлуудыг хийж гүйцэтгэхийг Гаалийн ерөнхий газар болон холбогдох бусад байгууллагуудад үүрэг болгов.
Шударга мэдээ
Отроор яваа малчдад харьяалал харгалзахгүй эрүүл мэндийн тусламж, үйлчилгээ үзүүлнэ
Засгийн газрын ээлжит хуралдаан 2025 оны наймдугаар сарын 20-нд болж, Хөдөө аж ахуйн салбарын 2025-2026 оны өвөлжилт, хаваржилтын бэлтгэл хангах зарим арга хэмжээний тухай тогтоол гарлаа.
Бэлтгэл хангах ажлын хүрээнд аймаг, нийслэл, сум, дүүргийн хэмжээнд бэлтгэвэл зохих өвс, тэжээлийн аюулгүйн нөөцийн хэмжээг баталлаа. Өвөл, хаврыг хүндрэл багатай даван туулах, урьдчилан сэргийлэх, хариу арга хэмжээний төлөвлөгөө гаргах, улсын хэмжээнд шаардлагатай улаанбуудай, төмс, хүнсний ногоо, өвс, тэжээлийн хэрэгцээ, хангамжид үндэслэн гол нэрийн хүнсний бүтээгдэхүүний экспорт, импортын зохистой харьцааг хангах талаар зохион байгуулалтын арга хэмжээ авах, мал, махыг эдийн засгийн эргэлтэд оруулах, махны экспортыг нэмэгдүүлэх чиглэлээр үндэсний үйлдвэрүүд, холбогдох төрийн бус байгууллагатай хамтран ажиллах, отроор яваа малчдад харьяалал харгалзахгүй эрүүл мэндийн тусламж, үйлчилгээ үзүүлэх, малчин өрхийн хүүхдийг цэцэрлэг, ерөнхий боловсролын сургуульд хамруулах, дотуур байраар хангаж ажиллах талаар зохион байгуулалтын арга хэмжээ авч хэрэгжүүлэхийг даалгалаа.
