Шударга мэдээ
Сургууль орчимд тээврийн хэрэгслийн улсын дугаар илрүүлэгч хяналтын камер суурилууллаа
Өнөөдөр БГД-ийн ИТХ-ын дарга буюу дүүргийн Гэмт хэргээс урьдчилан сэргийлэх ажлыг зохицуулах салбар зөвлөлийн тэргүүн Б.Сэмжидмаа дүүргийн Ерөнхий боловсролын 13 дугаар сургуульд ажиллалаа.
Дүүргийн ГХУСАЗСЗ тус сургуулийн өмнөх авто замын гарцанд хөдөлгөөнийг хянах, дугаар илрүүлэгч камер суурилуулах ажлыг зохион байгуулсан. Тэрээр “Зам тээврийн осол гэмтэлд явган зорчигчид, тэр дундаа сургууль орчмын бүс нутагт сурагчид өртөн ам нас, эрүүл мэнд нь хохирдог сэтгэл эмзэглүүлсэн асуудал буурахгүй байна. Тиймээс дүүргийн Гэмт хэргээс урьдчилан сэргийлэх ажлыг зохицуулах салбар зөвлөлийн тэргүүний хувьд энэ асуудалд биечлэн анхаарч, холбогдох мэргэжлийн байгууллагуудтайгаа хамтран эрсдэл бүхий 11 сургуулийн судалгааг гаргасан.
Энэ ажлын хүрээнд бид хүүхэд багачуудаа эрсдэлгүй, аюулгүй орчинд сурч хөгжих боломжийг нэмэгдүүлэх, явган зорчигч гарц орчимд зам тээврийн осол, гэмтэлд өртөхөөс урьдчилан сэргийлэх, хохирогчид анхан шатны тусламж үзүүлэхгүй хэргийн газраас зугтдаг жолооч нарын хариуцлагыг дээшлүүлэх чиглэлд хяналт тавих зорилгоор тээврийн хэрэгслийн улсын дугаар илрүүлэгч хяналтын камер суурилуулж байна. Нэн тэргүүнд хүүхэд багачуудаа осол гэмтэлд өртөхөөс урьдчилан сэргийлж, дүүргийн нутаг дэвсгэр дэх 13, 40, 46, 141 дүгээр сургуулиудад энэхүү камеруудыг байршуулж эхэллээ.
Хойшид 19, 38, 22, 70, 96, 113 дугаар сургуулийн орчмыг шат дараатайгаар камержуулах болно. ГХУСАЗСЗ-ийн үндсэн чиг үүргийн хүрээнд Тээврийн цагдаагийн алба, Замын цагдаагийн газартайгаа нягт хамтран ажиллаж байна. Бидний хамтын хичээл зүтгэл олон гэр бүлийн эрүүл, аюулгүй амьдрах эрх, хамгаалагдах шаардлагад чухал нөлөө үзүүлнэ. Хүний эрх, хүүхдийн эрхийн төлөө сэтгэл зүтгэл нэгтэй ажилладаг эдгээр байгууллагууддаа талархал илэрхийлье” хэмээн хэлсэн юм.
Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн, Цагдаагийн ахмад Г.Отгонтамир: 2020 онд Зам тээврийн хэрэг, ослын улмаас улсын хэмжээнд 560 хүүхэд хүнд хөнгөн хэлбэрээр гэмтэж бэртэн, 64 хүүхдийн амь нас хохирсон судалгаа бий. Түүнчлэн 2021 оны эхний 4 сарын байдлаар хөл хорио тогтоон, бүх нийтийн бэлэн байдлын зэрэгт шилжсэн ч энэ хугацаанд улсын хэмжээнд 74 хүүхэд зам тээврийн осол гэмтэлд өртөж, хүнд, хөнгөн хэлбэрээр гэмтэн, 11 хүүхдийн амь нас хохирсон. Эдгээ 74 хүүхдийн 80 орчим хувь нь явган зорчигч байлаа. Бага насны хүүхдүүд СӨБ, ЕБС-ийн хичээлийн хөтөлбөрийн дагуу “Ногоон гэрэл, цагаан шугам” сургалтад хамрагдаж хэвшсэн учраас гарцаар гарч заншсан.
Гэсэн ч зарим жолоочийн санамсар болгоомжгүй байдлаас осол хэрэг гарч, хүүхэд хохирох байдал бууруулахгүй байгаа юм. Дүүргийн нутаг дэвсгэрт 2020 онд эхний 5 сард гарц орчимд 10 осол гарч, 10 хүүхэд гэмтсэн, 2021 оны эхний 5 сард 6 осол гарч 7 хүүхэд гэмтсэн статистик гарсан. 13-р сургуулийн захирал Б.Саранчимэг: Манай сургуулийн 3340 сурагч энэ орц, гарцаар гардаг. “Сургуулийн цагдаа” хоёр ээлжээр замын хөдөлгөөнд зохицуулалт хийж ажилладаг ч хүүхдийн аюулгүй байдал, хүүхэд хамгааллын асуудал бол цаг үргэлж анхаарал шаарддаг ажил. Энэ чиглэлд маш том асуудлыг шийдэж өгч буйд баяртай байна. “Камер тавигдлаа гээд бид бүх зүйлээ үүнд даатгаж болохгүй, эцэг эхчүүд, жолооч нарыг мэдээллээр хангаж, осол хэргийн газраас зугтах боломжгүйг сануулах, сэрэмжлүүлэх мэдээлэл байршуулах тухай зөвлөмжийг тань ажил хэрэг болгох болно” хэмээн онцоллоо.
Шударга мэдээ
Нэг цонхны үйлчилгээг цахимжуулж, экспортыг нэмэгдүүлнэ
Засгийн газрын ээлжит хуралдаан 2025 оны наймдугаар сарын 20-нд болж, экспортыг нэмэгдүүлэх талаар авах арга хэмжээний тухай Засгийн газрын тогтоол гарлаа. Тус тогтоолоор Гашуунсухайт хилийн боомтын “Автомат удирдлагатай чингэлэг тээврийн терминал”-ын ухаалаг гарцаар Монголын хөрөнгийн биржээр арилжаалсан нүүрс тээвэрлэх жолоочтой тээврийн хэрэгслийг нэвтрүүлж, тээврийн үйл ажиллагааг тасралтгүй зохион байгуулах арга хэмжээ авахыг холбогдох албан тушаалтнуудад үүрэг болголоо.
Уул уурхайн бүтээгдэхүүний биржээр арилжаалах эрчим хүчний нүүрсний үнийг зах зээлийн үнийн индексийн хөдөлгөөнд нийцүүлэн өөрчлөх, Гаалийн бүрдүүлэлт хийх, улсын хилээр нэвтрүүлэх бараа, тээврийн хэрэгсэлд гаалийн хяналт тавих ажлыг цахимжуулахыг даалгалаа.
Манай улсад гадаад худалдаа эрхлэгчийн бүрдүүлж байгаа маягтуудаас гаалийн мэдүүлэгт хамгийн их буюу 116 төрлийн, улсын бүртгэлийн гэрчилгээ хамгийн цөөн буюу найман төрлийн мэдээллийг агуулдаг. Экспортын үйл ажиллагаанд 40 гаруй бичиг баримт бүрдүүлж байгаагаас зарим тохиолдолд дунджаар 6-12 удаа давхардуулан шаардаж байна.
Гадаад худалдаанд тулгарч буй эдгээр хүндрэлүүдийг цахим нэг цонхны үйлчилгээг нэвтрүүлэх замаар шийдвэрлэхээр төлөвлөсөн боловч системийн санхүүжилттэй холбоотойгоор ажил удааширчээ. Иймд санхүүжилтийн асуудлыг цаг алдалгүй шийдвэрлэж, худалдан авах ажиллагааг яаралтай эхлүүлэх үүрэг өглөө.
Хилээр экспортод гаргах уул уурхайн бүтээгдэхүүний лабораторийн шинжилгээний дээж өгөх, хариу авах үйл ажиллагаа нь голчлон Улаанбаатар хот дахь Гаалийн төв лабораториос хамаарч байгаа нь экспортыг удаашруулах нэг хүчин зүйл болж байна. Тухайлбал, нүүрсний дээжийг гаалийн төв лабораторид өгөөд хариу авах хүртэл дунджаар долоо хоног, хамгийн ихдээ 35 хоног хүртэл зарцуулж байна. Мөн хилийн Гашуунсухайт боомт дахь шинжилгээний лабораторийн барилгын ажил дуусаж, тоног төхөөрөмжүүд бэлэн болж байгаа ч үйл ажиллагаа эхлээгүй байна. Иймд тус тогтоолоор мөн,
- Гаалийн Төв лабораторид шинжлэх нүүрсний дээжийг 48 цагийн дотор магадлан шинжилгээний дүгнэлтийг гаргах боломжийг 2025 оны наймдугаар сард багтаан бүрдүүлэх,
- Гашуунсухайт боомтын гаалийн салбар лабораторийг 2025 онд багтаан ашиглалтад оруулах,
- Бусад боомтын лабораторийг ашиглалтад орох хүртэл хугацаанд хувийн компаниудын лабораторийн мэдээллийг гаалийн мэдээллийн системд 2025 оны гуравдугаар улиралд багтаан холбох ажлуудыг хийж гүйцэтгэхийг Гаалийн ерөнхий газар болон холбогдох бусад байгууллагуудад үүрэг болгов.
Шударга мэдээ
Отроор яваа малчдад харьяалал харгалзахгүй эрүүл мэндийн тусламж, үйлчилгээ үзүүлнэ
Засгийн газрын ээлжит хуралдаан 2025 оны наймдугаар сарын 20-нд болж, Хөдөө аж ахуйн салбарын 2025-2026 оны өвөлжилт, хаваржилтын бэлтгэл хангах зарим арга хэмжээний тухай тогтоол гарлаа.
Бэлтгэл хангах ажлын хүрээнд аймаг, нийслэл, сум, дүүргийн хэмжээнд бэлтгэвэл зохих өвс, тэжээлийн аюулгүйн нөөцийн хэмжээг баталлаа. Өвөл, хаврыг хүндрэл багатай даван туулах, урьдчилан сэргийлэх, хариу арга хэмжээний төлөвлөгөө гаргах, улсын хэмжээнд шаардлагатай улаанбуудай, төмс, хүнсний ногоо, өвс, тэжээлийн хэрэгцээ, хангамжид үндэслэн гол нэрийн хүнсний бүтээгдэхүүний экспорт, импортын зохистой харьцааг хангах талаар зохион байгуулалтын арга хэмжээ авах, мал, махыг эдийн засгийн эргэлтэд оруулах, махны экспортыг нэмэгдүүлэх чиглэлээр үндэсний үйлдвэрүүд, холбогдох төрийн бус байгууллагатай хамтран ажиллах, отроор яваа малчдад харьяалал харгалзахгүй эрүүл мэндийн тусламж, үйлчилгээ үзүүлэх, малчин өрхийн хүүхдийг цэцэрлэг, ерөнхий боловсролын сургуульд хамруулах, дотуур байраар хангаж ажиллах талаар зохион байгуулалтын арга хэмжээ авч хэрэгжүүлэхийг даалгалаа.
Шударга мэдээ
“Шивээ-Овоо” ХК-ийн машин техник, тоног төхөөрөмжүүдийн засвар үйлчилгээг бүрэн дуусгана
Монгол Улсын Ерөнхий сайд Г.Занданшатар өвөлжилтийн бэлтгэл ажлын хүрээнд “Шивээ-Овоо” ХК-ийн уурхайн үйл ажиллагаатай танилцаж, алба хаагчидтай нь уулзалт хийсэн. Үүнтэй холбогдуулан Засгийн газрын 2025 оны наймдугаар сарын 20-ны өдрийн хуралдаанаас дараах шийдвэрүүд гарлаа.
- 2025-2026 оны өвөлжилтийн бэлтгэл ажлыг хангах хүрээнд “Шивээ-Овоо” ХК-ийн машин техник, тоног төхөөрөмжүүдийн засвар үйлчилгээг бүрэн дуусгах, шаардлагатай сэлбэг, хэрэгсэл худалдан авах,
- Уурхайн үйлдвэрлэлийн үндсэн үйл ажиллагааг хэвийн явуулахад шаардлагатай дизель түлш, шатахууны нөөц, тэсрэх бодис зэрэг чухал хэрэгцээтэй бүтээгдэхүүний стратегийн нөөц бүрдүүлэх,
- Нүүрс тээвэрлэлтийн тасралтгүй, хэвийн үйл ажиллагааг хангаж, шаардлагатай үед хэрэглэх техник, тоног төхөөрөмж, хэрэгслийн нөөц бүрдүүлэх,
- “Шивээ-Овоо” ХК-д хуримтлагдсан өр, төлбөрийн асуудлыг судлан, шийдвэрлэх талаар Засгийн газрын хуралдаанд танилцуулах, цаашид өр төлбөр үүсгэхгүй байх нөхцөлийг бүрдүүлэх, эрчим хүчний нүүрс олборлогч компаниудын нүүрсний борлуулах үнийг Эрчим хүчний зохицуулах хорооноос бодитой тогтоох тогтолцоог бүрдүүлэх, компанийн үр ашгийг нэмэгдүүлэх,
- Стратегийн ордын нөөцийг олон улсын хөрөнгийн бирж, хөрөнгө оруулагчдын шаардлагад нийцүүлэн тогтоож, үнэ цэнийг нэмэгдүүлэх, тус ордыг түшиглэн цахилгаан станц байгуулах асуудлыг судалж танилцуулах,
- Говьсүмбэр аймгийн төвийн дулаан хангамж, инженерийн дэд бүтэц, шугам сүлжээний өргөтгөл, шинэчлэлийн ажилд дэмжлэг үзүүлж, шинээр байгуулах 20 МВт дулааны цахилгаан станц байгуулах төслийн хэрэгжилтэд хяналт тавьж ажилллахыг холбогдох албан тушаалтнуудад тус тус даалгалаа.
Ерөнхий сайд Г.Занданшатар уурхайн нөхцөл байдлыг сонсож, албан хаагчидтай уулзах үеэр уурхай ашигтай, тогтвортой ажиллагааг хангаж уурхайн ажилтнуудыг тогтвор суурьшилтай ажиллах нөхцөлийг бүрдүүлж, гүйцэтгэлийн үнэлгээг 50 хүртэл хувиар үе шаттайгаар нэмэгдүүлэх шаардлагатайг анхааруулсан. Гүйцэтгэлийн үнэлгээг нэмэгдүүлэх арга хэмжээ авахаа компанийн удирдлагууд илэрхийлээд байна.
