Бидэнтэй нэгдэх

Улстөр нийгэм

Эрчим хүчний зохицуулах хорооноос 2022 онд хийж гүйцэтгэсэн ажлаа тайлагналаа

Огноо:

,

ЭХЗХ-оос Эрчим хүчний тухай хуулийн дагуу 2022 оны ажлын тайлан, төсвийн гүйцэтгэл, Эрчим хүчний салбарын үйл ажиллагааны дүнг төрийн захиргааны төв байгууллага болон тусгай зөвшөөрөл эзэмшигчдэд танилцуулах хурлыг 2023 оны тавдугаар сарын 11-ний өдөр цахимаар зохион байгууллаа.

Хуралд тусгай зөвшөөрөл эзэмшигч /ТЗЭ/ компанийн нийт 170 гаруй төлөөлөл оролцож, салбарын асуудлыг хэлэлцлээ.  

Монгол Улсын цахилгаан эрчим хүчний нийт хэрэглээ 2022 онд 10.3 тэрбум кВт.ц болж өмнөх оноос 5.8 хувиар буюу 564.3 сая кВт.ц-аар нэмэгдсэн байна. Нийт хэрэглээний 79.1 хувийг буюу 8.18 тэрбум кВт.ц цахилгаан эрчим хүчийг дотоодын үйлдвэрлэлээр, 20.9 хувийг буюу 2.16 тэрбум кВт.ц цахилгаан эрчим хүчийг импортоор авч хангажээ. Сэргээгдэх эрчим хүчний үүсгүүрүүдийн үйлдвэрлэлийн хэмжээ 748.9 сая кВт.ц болж дотоодын нийт үйлдвэрлэлийн 9.2 хувийг эзэлж байна. Дулааны эрчим хүчний үйлдвэрлэл өмнөх оноос 1.28 сая Гкал буюу 8.5  хувиар нэмэгдэж 16.3 сая Гкал болсон. 

          Өнгөрсөн өвөл төвийн эрчим хүчний системийн цахилгааны оргил ачаалал 1474 МВт-д хүрч, дулааны цахилгаан станцууд бүрэн хүчин чадлаараа, нөөц тоноглолгүй ажилласан. Улс орны аюулгүй байдал, нийгмийн тогтвортой хөгжлийн суурь болсон эрчим хүчний хангамж, хүрэлцээ нь сүүлийн жилүүдэд тулгамдсан асуудал болоод байгаа билээ. 

Эрчим хүчний өртөг зардалд нөлөөлж буй бодит хүчин зүйлс буюу сэлбэг материал, түлш шатахууны үнийн өсөлт, валютын ханш, хэрэглээний үнийн индексийн өөрчлөлт зэргийг харгалзан 2022 онд эхний алхам болгож үнэ тарифыг инфляцад огцом нөлөө үзүүлэхгүй байдлаар зохицуулж, аж ахуйн нэгж, байгууллагын үнэ тарифыг хэрэглээтэй уялдуулан 28 хувиар нэмэгдүүлээд байна.

Ингэхдээ аж ахуй нэгжийн цахилгааны үнэ тарифыг шатлалтай нэмэгдүүлэх нь жижиг, дунд үйлдвэрлэл эрхлэгчдэд ачаалал хамгийн бага байхаар тооцсон юм. Тодруулбал, 5000 кВт.цаг хүртэл хэрэглээнд цахилгааны үнийг 14 хувиар, түүнээс давсан хэрэглээний үнийг 28 хувиар тус тус нэмэгдүүлсэн. Ингэснээр хэрэглэгчид хэрэглээгээ хянаж, эрчим хүчийг хэмнэлттэй зарцуулах зохицуулалтыг өөртөө хэрэгжүүлэх боломжтой болж байгаа юм. 

Эрчим хүчний салбарт томоохон чадлын эх үүсвэр баригдаж ашиглалтад орох хүртэлх хугацаанд буюу ойрын жилүүдэд эрчим хүчний хэмнэлтээр эх үүсвэрийн дутагдлыг нөхөх, хэмнэлтийн үйл ажиллагааг эрчимжүүлж, үр дүнд хүрэх хэрэгцээ, шаардлага зүй ёсоор үүсээд байна. Эрчим хүчний зохицуулах хорооноос дээрх хүндрэлтэй асуудлыг даван туулах, эрчим хүчний системийн найдвартай, тогтвортой ажиллагааг хангах, хэмнэлт, үр ашгийг дээшлүүлэхэд тулгамдаж буй асуудал, боломж, гарц, шийдлийг хэлэлцэх зорилгоор 2022 онд “Эрчим хүчний хүрэлцээ ба хэмнэлт” зөвлөгөөнийг салбарын хэмжээнд зохион байгуулж хэмнэлтийн чиглэлээр ойрын хугацаанд авч хэрэгжүүлэх арга хэмжээ, цаашдын чиглэлээ тодорхойлсон.

Улмаар “Хэрэгцээг удирдах” цогц арга хэмжээний санал, төлөвлөгөө боловсруулан Эрчим хүчний сайдаар батлуулж салбарын хэмжээнд нэгдсэн зохион байгуулалттайгаар хэрэгжүүлж эхлээд байна. Дээрх арга хэмжээний хүрээнд эрчим хүч хэмнэх хууль эрх зүйн орчныг сайжруулах, өвлийн оргил ачааллын цагуудад цахилгаан эрчим хүчний хэрэглээг бууруулах зохицуулалтыг хэрэгжүүлэх, хэрэглэгч, олон нийтэд чиглэсэн мэдээлэл, сурталчилгааны ажлыг зохион байгуулах замаар эрчим хүчийг хэмнэх дадал хэвшил бий болгох, хэрэглээний өсөлтийг хэмнэлтээр хангах нөхцөлийг бүрдүүлэх юм.

Цаашид ЭХЗХ-оос дараах ажлуудыг хэрэгжүүлэхээр ажиллаж байна.

  • “Цахилгаан, дулааны эрчим хүчний үнэ тарифыг тогтоох аргачлал”-д урамшуулалд суурилсан зохицуулалтын механизмыг тусгах,
  • Дулаан түгээх, хангах ТЗЭ-дийн дулааны тарифыг тухайн ТЗЭ-ийн ачаалал, хэрэглэгчийн тоо, хүчин чадал, шугам сүлжээ, тоног төхөөрөмж зэрэг холбогдох хүчин зүйлүүдээс хамааруулан тооцох тогтолцоог бүрдүүлэх,
  • Тусгай зөвшөөрлийн зохицуулалтыг Зөвшөөрлийн тухай хуульд нийцүүлэн ил тод, түргэн шуурхай хэрэгжүүлэх зорилгоор “E-license” цахим системийг бүрэн ашиглах,
  • Улаанбаатар хотод дулаан хангамжийн үйл ажиллагаа эрхэлж байгаа дулаан түгээх, хангах тусгай зөвшөөрөл эзэмшигчдийн дулааны эрчим хүчний төлбөрийн мөнгөний урсгалыг зохицуулах Нэг худалдан авагчтай загварыг энэ оноос хэрэгжүүлж эхлээд байна.

         Эрчим хүчний салбарын санхүү, эдийн засгийн үйл ажиллагааг сайжруулах, эрчим хүчний хэмнэлтийг дээшлүүлэх зорилгоор айл өрхийн цахилгааны шатлан нэмэгдэх тарифын тогтолцоог бүрдүүлэх, ахуйн хэрэглэгчдэд цагийн ялгаварт 3 тарифын ангилал нэвтрүүлэх, дулааны тарифыг бүсчилсэн хэлбэрээр нэмэгдүүлэхээр төлөвлөж байна.

Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Улстөр нийгэм

МАН Г.Сайханбаярыг нэр дэвшигчээс эргүүлэн татах албан бичгийг СЕХ-нд хүргүүллээ

Огноо:

,

Засгийн газрын хэрэг эрхлэх газрын дарга Д.Амарбаясгалан өнөөдөр /2024.06.18/ Сонгуулийн ерөнхий хороонд бичиг хүргүүллээ. Тодруулбал, УИХ-ын сонгуулийн нэгдүгээр тойрогт нэр дэвшигч Г.Сайханбаярын ухуулагч хүний аминд хүрсэн хэрэгтэй холбоотойгоор ёс зүйн хүрээнд нэр дэвшигчийг эргүүлэн татах болсон талаар МАН-аас өнгөрсөн Ням гаригт мэдэгдсэн. Тэрбээр үүнтэй холбоотойгоор тайлбар өглөө.

ЗГХЭГ-ын дарга Д.АМАРБАЯСГАЛАН:

-Монгол Ардын намын сонгуулийн төв штабаас улс төрийн шийдвэр гаргаад нэр дэвшигч Г.Сайханбаярын сонгуулийн сурталчилгааны үйл ажиллагааг зогсоох, эргүүлэн татах асуудлаар Сонгуулийн ерөнхий хороонд албан ёсоор албан бичгээр хандлаа. Уг асуудал үүссэн нөхцөлийн тухайд энэ сарын 15-16-нд шилжих шөнө золгүй явдлын улмаас иргэн Б амиа алдсан эмгэнэлт үйл явдал тохиолдсон. Тиймээс бусдын амийг хөнөөсөн П.Отгонбаатар нь нэр дэвшигч Г.Сайханбаярын штабтай гэрээ байгуулж, ухуулагчаар ажиллахаар явж байсан учраас бид ёс зүйн хариуцлага хүлээлгэсэн.

Нэр дэвшигч Г.Сайханбаяр тус гэмт хэрэгт холбогдогчтой өөрөө уулзаж, албан ёсны гэрээ хэлцэл байгуулаагүй. Амь хохирогч этгээд нь сонгуулийн сурталчилгааны ажилд оролцож эхлээгүй байсан хэдий ч МАН-ын зүгээс төрийн эрх барих дээд байгууллагын сонгуулийн үйл ажиллагааг илүү хариуцлагатай, ёс зүйтэй явуулах үүднээс ийм шийдвэрийг гаргасан болно.

Мөн түүнчлэн үүнийг тодорхой улс төрийн намын удирдлага, тухайн тойрогт нэр дэвшиж байгаа нэр дэвшигчид нь нэхүү золгүй явдлыг улс төрийн сонгуулийн компанит ажилдаа ашиглаж байгаад Г.Сайханбаяр харамсч байгаагаа илэрхийлсэн. Бид хариуцлагын тогтолцоог улам сайжруулна. Тэгэхээр улс төрийн намууд, улстөрчид уг асуудал дээр анхааралтай байхыг хүсч байна.

Бидний хувьд нэр дэвшигч Г.Сайханбаярын сонгуулийн үйл ажиллагааг бүрэн зогсоох, сурталчилгааг үргэлжлүүлэхгүй байх шийдвэр гаргасан. Гэхдээ хуулийн дагуу санал авах хуудаст нэр дэвшигчийн нэр бичигдэнэ. Нэр дэвшигчийн сонгуулийн компанит ажлыг бүрэн зогсоосон байгаа.

Хоёр намын дарга энэ асуудлаар уулзсан. Мэдээж, үндэсний эв нэгдэл, үндэсний зөвшилцөл бүх улс төрийн намуудад байх ёстой. Төрийн сонгуулийг эмх цэгцтэй, замбараатай, хариуцлагатай зохион байгуулах нь улс төрийн намуудад оноогдсон үүрэг.

Сонгуулийн компанит ажлыг зохион байгуулахдаа золгүй явдлыг улс төржүүлэх, ард иргэдийг талцуулах үйл ажиллагаа явуулах нь улс орны аюулгүй байдалд шууд аюул учруулдаг зүйл болдог учир ялангуяа эрх баригч нам, голлох сөрөг хүчний зүгээс хариуцлагатай байх үүднээс намын дарга нар уулзсан. МАН өнгөрсөн хугацаанд парламентыг бэхжүүлэх, парламент дахь улс төрийн намуудыг оролцоог сайжруулах үүднээс Үндсэн хуулийн нэмэлт өөрчлөлтийг санаачилж, парламентын гишүүдийн тоог нэмэх, холимог системийг нэвтрүүлэх санаачилга гаргасан.

Дэлгэрэнгүй унших

Улстөр нийгэм

Зүүн бүсэд нэр дэвшигчид Хэнтий аймгийн Дадал, Норовлин, Батноров, Баян-Адарга сумын иргэдтэй уулзав

Огноо:

,

УИХ-ын сонгуулийн VI тойрог буюу зүүн бүсийн Дорнод, Сүхбаатар, Хэнтий аймагт МАН-аас нэр дэвшигчид сонгуулийн сурталчилгааны уулзалт “Монголын нууц товчоо” болон түүхэн эх сурвалжуудад бичигдэж үлдсэн дурсгалт газруудын өлгий болсон Хэнтий аймгийн Баян-Адарга, Дадал, Норовлин, Батноров сумдад үргэлжлүүлэв. 

МАН-ын дарга, Ерөнхий сайд Л.Оюун-Эрдэнээр ахлуулан зүүн бүсэд нэр дэвшиж буй Мөнгөнцогийн Ганхүлэг, Пүрэв-Очирын Анужин, Ухнаагийн Отгонбаяр, Лхагвасүрэнгийн Соронзонболд, Мягмарсүрэнгийн Бадамсүрэн, Цагаанхүүгийн Идэрбат нар аймаг, сум, бүс нутгаа хөгжүүлэх 2024-2028 оны мөрийн хөтөлбөрөө иргэдэд танилцуулж, тулгамдаж буй асуудлыг нь сонсож байна.

Орон нутгийн иргэд, аж ахуй эрхлэгчдийн зүгээс МАН-ын мөрийн хөтөлбөрт хөдөө аж ахуй, эрчимжсэн мал аж ахуй, малчдын амьдралд онцгой анхаарсан эдийн засгийн тэргүүлэх чиглэлийн бодлогууд, түүхэн аялал жуулчлалыг тусгасанд талархалтай байна.

Баян-Адарга суманд “Шинэ хоршоо” хөдөлгөөний хүрээнд 16 хоршоо байгуулагдсан. Мөн НҮБ-ын санхүүжилтээр малын ашиг шимийг дээшлүүлэх төслүүд амжилттай хэрэгжиж байна. Сүүлийн жилүүдэд ЗДТГ-ын шинэ байр, цэвэр бохирын нэгдсэн систем, сургуулийн өргөтгөл, соёлын төвийн дээврийн засвар, эрүүл мэндийн төвийн өргөтгөл, ЕБС-ийн урсгал засварыг хийжээ. Энэ онд сумын төв дотроо 2.8 км засмал зам тавихаар төсөвт тусгасан байна. Тус сум байгаль, түүхийн дурсгалт үзэсгэлэнт газар ихтэй. “Хатдын өргөө” цогцолбор, Хүннүгийн үеийн язгууртны 300-аад булш зэрэг жуулчдыг татах биет олдвор, бүтээн байгуулалттай түүхэн аялал жуулчлалын цөм нутгуудын нэг юм. 

Дадал суманд өнгөрсөн жилүүдэд Нутгийн удирдлагын ордон, ЕБС-ийн дотуур байр, сумын төвийн нэгдсэн халаалтын зуух, спорт цогцолбор, дулаан болон цэвэр усны шугам сүлжээ, 35 кв-ийн цахилгаан дамжуулах шугамын өргөтгөл, “Дэлүүн болдог” онгоцын буудал, сумын төвийн авто зам зэрэг бүтээн байгуулалтуудыг улсын төсөв болон олон улсын хандив тусламжаар хэрэгжүүлсэн байна.

Норовлин суманд Хэнтий аймгийн түүхэн аялал жуулчлалын зургаан гол бүтээн байгуулалтын нэг “Шихихутаг-Нууц товчоо” цогцолбор баригдаж байгаа бөгөөд 90 гаруй хувьтай үргэлжилж байна. Мөн улсын төсвийн хөрөнгө оруулалтаар хэрэгжиж буй Хэнтий-Норовлин чиглэлийн 130 км авто замын барилгын ажил хугацаанаас нэг жилийн өмнө буюу энэ онд ашиглалтад орох аж.

Өнгөрсөн дөрвөн жилд улсын төсвийн хөрөнгөөр Батноров суманд сургуулийн 320 хүүхдийн барилгын өргөтгөл, эрүүл мэндийн төвийн өргөтгөл хийгдэж, “Шинэ сум” төслийн хүрээнд цэвэршүүлэх байгууламж шийдэгдсэн. Ингэснээр эмнэлэг, сургууль зэрэг төрийн байгууллага дотроо ариун цэврийн байгууламжтай болжээ. Ирэх онд сум доторх болон “Тэнгэрийн андгай” цогцолбор хүртэлх 20 гаруй км автозам тавигдвал жуулчдын хөдөлгөөн нэмэгдэж, иргэдийн орлого нэмэгдэнэ гэж нутгийн иргэд үзэж байна. Өнгөрсөн оны статистикаар тус цогцолборыг сард 5000-6000 хүн ирж үзжээ.

 

Түүхэн аялал жуулчлалын бүс нутаг болгох шийдвэрийг Засгийн газраас бүс нутгийн хэмжээнд дэвшүүлж Хэнтий аймагт оршдог “Монголын нууц товчоо”-ны дурсгалт газруудыг Дорнод, Сүхбаатар аймаг дахь байгалийн үзэсгэлэнт, түүхэн газруудтай холбож, дэд бүтэц татахаар болсон нь маш оновчтой  шийдвэр хэмээн нутгийн иргэд хүлээн авч байв. 

Сум бүрийн онцлогт тохирсон бүсчилсэн хөгжлийн бодлого хэрэгжүүлснээр Хэнтий, Дорнод, Сүхбаатар аймгийн хөгжлийг эрчимжсэн мал аж ахуй, аялал жуулчлал, боомт, дэд бүтэц, төмөр замын чиглэлээр эрчимжүүлэхээр МАН-ын төрийн хөтөлбөрт тусгагдсан. Зүүн бүс нутаг нийт долоон хилийн боомттой. Боомтуудын өргөтгөл, нэвтрүүлэх хүчин чадал нэмэгдэж, тэдгээрийг холбосон дэд бүтэц, дагасан бүтээн байгуулалтын үр өгөөж хэнтийчүүдэд ч мөн хүрч чадна гэдгийг нэр дэвшигчид онцолж байна.

Ерөнхийдөө өнгөрсөн найман жилд Хэнтий аймгаа төлөөлж МАН-аас парламентад сонгогдсон УИХ-ын гишүүд болон Ерөнхий сайд, нутгийн хүү Л.Оюун-Эрдэнийг нутаг орныхоо хөгжлийн төлөө ажиллаад зогсохгүй улс орны хувь заяаны төлөө хангалттай зүтгэж байгаа, амласнаа ажил болгодог улстөрч хэмээн үнэлж, талархаж явдгаа олон хүн хэлж байсан. Энэ сонгуулиар ч төр, түмний төлөө ажиллаж чадах түүний багийг нүүр бардам сонгож, Ерөнхий сайдаа улираан ажиллуулах боломжийг Сэцэн ханчууд олгох учраас түүхэн сонгуулиар АРД ТҮМНИЙ ЯЛАЛТ-д манлайлна гэдгээ илэрхийлж байлаа.  

 

Дэлгэрэнгүй унших

Улстөр нийгэм

Налайх, Багануур, Багахангай дүүрэгт ипотекийн 3 хувийн хүүтэй зээл олгож байгаад иргэд баяртай байна

Огноо:

,

УИХ-ын сонгуулийн XIII тойрог Налайх, Багануур, Багахангай дүүрэгт МАН-аас нэр дэвшигч Сайнбуянгийн Амарсайхан, Цэндийн Сандаг-Очир нар иргэд, сонгогчидтойгоо хийх уулзалтаа үргэлжлүүлж байна. Уулзалтын мэдээллээс тоймлон хүргэе.  

Багануур дүүргийн боловсролын салбарт 2020-2024 онд 12.5 тэрбум төгрөгийн хөрөнгө орууллаа

Багануур дүүргийн төрийн захиргааны болон төрийн үйлчилгээний албан хаагчид, сургуулийн өмнөх боловсролын салбарынхантай уулзаж, намын мөрийн хөтөлбөр, өнгөрсөн дөрвөн жилд хийж хэрэгжүүлсэн ажлынхаа талаар мэдээлэл өглөө.

Өнгөрсөн дөрвөн жилийн эхний тухайд эхний хоёр жилд нь ковидтой тэмцэж, эх орон, ард иргэдийнхээ аюулгүй байдлыг хамгаалахын төлөө ажилласан. Хэдийгээр тухайн үед эдийн засаг хүндхэн байсан ч ковидын дараах хоёр жилд Шинэ сэргэлтийн бодлого, Эдийн засгаа сэргээх 10 их наядын хөтөлбөрийг хэрэгжүүлж, эдийн засгийн өсөлтийг 7.8 хувьд хүргэлээ.

Багануур дүүрэгт төрийн захиргааны болон нийтлэг үйлчилгээний нийт 1499 албан хаагч ажилладаг. Тэдний ажиллах орчин, нийгмийн асуудлыг шийдвэрлэх хүрээнд өнгөрсөн дөрвөн жилд 20 хувиар орон нутгийн нэмэгдэл, Шүүхийн шийдвэр гүйцэтгэх албаны албан хаагчдад 30 сарын үндсэн цалинтай тэнцэх мөнгөн урамшуулал олгож эхэлсэн.

Багануур дүүрэгт сургуулийн өмнөх боловсролын байгууллагуудад 368 багш, ажилтан ажиллаж байна. Багануур дүүргийн боловсролын салбарт өнгөрсөн дөрвөн жилийн хугацаанд нийт 12.5 тэрбум төгрөгийн хөрөнгө оруулалтыг хийжээ. Үүнээс товчхон дурдвал хоёр болон дөрөвдүгээр хороонд 100 хүүхдийн ортой цэцэрлэг ашиглалтад орсон. Мөн 40 жилийн түүхтэй 132 дугаар цэцэрлэг шинэ байртай болсноор дөрвөн бүлэгт 100 хүүхэд хүлээн авах хүчин чадалтай болж өргөжлөө. Үүнээс гадна Замчин хэсэгт бага сургууль, цэцэрлэгийн цогцолборын барилгын 6.2 тэрбум төгрөгийг улсын төсөвт тусгууллаа.

 Багахангай дүүрэгт 2020-2024 онд нийт 26.2 тэрбум төгрөгийн хөрөнгө оруулалтын ажил хийгдлээ

Багахангай дүүрэгт Улаанбаатар төмөр замын харьяа байгууллагын албан хаагчид болон төрийн үйлчилгээний байгууллагын төлөөлөлтэй УИХ-ын ээлжит сонгуульд МАН-аас дэвшүүлж буй мөрийн хөтөлбөрийг танилцууллаа.

Багахангай дүүрэгт 2020-2024 онд улсын төсвөөс нийт 26.2 тэрбум төгрөгийн хөрөнгө оруулалт хийгдсэн. 

Улс, нийслэлийн төсвийн хөрөнгө оруулалтаар дүүрэгт хийгдэж буй онцлох ажлуудаас дурдвал:

  • Гэр бүл, хүүхэд залуучуудын хөгжлийн хэлтсийн барилга-2.7 тэрбум төгрөг
  • Соёлын ордны барилга-5.1 тэрбум төгрөг
  • Орон сууцын байруудын их засвар-3.8 тэрбум төгрөг
  • Замчин нуурын гэр хорооллын “Дэд бүтцийн төв”-ийн гадна инженерийн хангамжийн шугам-14.3 тэрбум төгрөг
  • 150 хүний суудалтай спорт цогцолборын барилга-2.4 тэрбум төгрөгийн бүтээн байгуулалтын ажил өрнөж байна.

Бүсчилсэн хөгжлийн хөтөлбөрт тусгагдсанаар ирээдүйн Багахангай “Зүүн бүсийн тээвэр ложистикийн түшиц газар, худалдаа үйлчилгээ, Үйлдвэрлэл технологийн парк, нийгэм, эдийн засгийн хөгжлийг дэмжих бүх салбартаа инновац нэвтрүүлж, мэдлэг шингээсэн шинэлэг хот” болон хөгжинө. 

Налайхчууд орон сууцны ипотекийн 3 хувийн хүүтэй зээлд хамруулж байгаад талархалтай байгаагаа илэрхийллээ

Налайх дүүргийн иргэд, сонгогчидтойгоо уулзаж, өнгөрсөн дөрвөн жилд хийж хэрэгжүүлсэн ажил, цаашид хийх ажил, МАН-ын мөрийн хөтөлбөрийн тухай иргэд, сонгогчидтойгоо ярилцлаа. Мөн уулзалтын үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар хүрэлцэн ирж, иргэдийн асуултад хариулт өглөө. 

2020-2024 онд Налайх дүүргийн цэцэрлэгийн хүртээмжийг 100 хувьд хүргэж, шинэ сургууль, өргөтгөл, Бага сургууль, цэцэрлэгийн цогцолбор, Спорт цогцолбор, гэрэлтүүлэг, камержуулалт, зам, дэд бүтэц гээд бүхий л салбарт бүтээн байгуулалт, хөрөнгө оруулалтын ажил өрнөсөн.

Төр засгийн бодлогын түвшинд Налайх, Багануур, Багахангай дүүргийг алслагдсан гэх ойлголт, тодорхойлолтоос салгаж, хот, дагуул хот болгон тэлж хөгжүүлэх бодлогыг хэрэгжүүлж эхэллээ. Иймдээ ч Шинэ сэргэлтийн бодлогын хүрээнд 20 хувийн орон нутгийн нэмэгдэл, ипотекийн 3 хувийн хүүтэй орон сууцын зээл зэргийг шийдвэрлэж, улмаар үр шимийг нь хүртэж байгаад налайхчууд талархалтай байгаагаа илэрхийллээ. Үүнээс гадна иргэдийн зүгээс түрээслээд өмчлөх орон сууцанд хамруулах, уурхайчдад нөхөн олговор олгох, тэтгэврийг нэмэгдүүлэх, багшийн урамшууллыг олгох гэхчлэн асуудлыг хөндөж байлаа. 

 

Тэтгэвэр, тэтгэмжийг үнийн өсөлттэй уялдуулан жил бүр нэмэгдүүлэх бодлого баримтална

Багануур дүүргийн 1, 3, 5 дугаар хорооны иргэд, сонгогчидтойгоо уулзлаа. Өнөөдрийн байдлаар нэгдүгээр хороонд 2609 өрх, гуравдугаар хороонд 2336 өрх, тавдугаар хороонд 1946 өрх амьдардаг. Эдгээр иргэдийн аюулгүй ажиллаж, амьдрах орчин нөхцөлийг сайжруулах, эрүүл мэнд, боловсрол, зам, дэд бүтцийн асуудлыг шийдвэрлэхээр өнгөрсөн дөрвөн жилийн хугацаанд анхаарч ажиллалаа. 

“Шинэ сэргэлтийн бодлого”-ын хүрээнд өнгөрсөн хугацаанд авлигатай хийх тэмцэл идэвхэжсэнээр Монгол Улсын нэгдсэн төсвийн орлого 2023 онд 1.5 их наяд төгрөгөөр давж биелэсэн. Улмаар далд эдийн засаг ил болсноор ахмадын тэтгэврийн зөрүүг арилгаж, ахмад настны дундаж тэтгэврийг 787 мянган төгрөг болгож, төрийн албан хаагчдын цалинг 50 хүртэл хувиар нэмэгдүүлээд байгаа юм. “Шинэ сэргэлтийн бодлого-Бүсчилсэн хөгжлийн реформ” мөрийн хөтөлбөрт тусгасанчлан цаашид тэтгэвэр, тэтгэмжийг үнийн өсөлттэй уялдуулан жил бүр нэмэгдүүлэх бодлогыг баримтална гэдгийг энэ үеэр танилцуулсан юм.  

 

 

Дэлгэрэнгүй унших
сурталчилгаа
Улстөр нийгэм2024/06/18

МАН Г.Сайханбаярыг нэр дэвшигчээс эргүүлэн татах албан бичгийг СЕХ-н...

Улстөр нийгэм2024/06/18

Зүүн бүсэд нэр дэвшигчид Хэнтий аймгийн Дадал, Норовлин, Батноров, Б...

Улстөр нийгэм2024/06/18

Налайх, Багануур, Багахангай дүүрэгт ипотекийн 3 хувийн хүүтэй зээл ...

Улстөр нийгэм2024/06/18

УИХ-ын сонгуулийн I тойрогт нэр дэвшигч Г.Сайханбаяр бүх шатны хуу...

Улстөр нийгэм2024/06/18

Баянзүрх дүүргийн иргэд, сонгогчид МАН-ын нэр дэвшигчдэд итгэл хүлээ...

Улстөр нийгэм2024/06/18

Хан-Уулчууд хамтад нь дэмжиж, багаар нь сонгоно гэдгээ илэрхийлсээр ...

Улстөр нийгэм2024/06/18

Бутаны Хаант Улсаас Монгол Улсад суух Элчин сайд Итгэмжлэх жуух бичг...

Улстөр нийгэм2024/06/18

Фижи улсын Ерөнхий сайд асан Фрэнк Байнимарама нэг жил шоронд хоригд...

Улстөр нийгэм2024/06/18

Гадаад улсад байгаа 13095 иргэн сонгуульд оролцохоор бүртгүүллээ

Цаг үе2024/06/18

Хөгжлийн банкны гэх тодотголтой 80 хүн, 4 хуулийн этгээдэд холбогдох...

Санал болгох