Бидэнтэй нэгдэх

Урлаг спорт

“Фауст” жүжгийг үзэх 5 шалтгаан

Огноо:

,

ШАЛТГААН №1. “СЭХЭЭТЭН” ЭСВЭЛ “ЭЛИТ” ГЭДГЭЭ МЭДЭРМЭЭР БАЙВАЛ...

“Фауст” жүжгийн тухай дуулаагүй хүн ховор. Өөрийгөө боловсролтой гэж боддог, үгүй ядахнаа боловсролтой хүмүүсийн хүрээнд хамаатуулахыг дотроо хичээж явдаг хэн болов ч “Фауст” тавигдах нь гэсэн зарыг тогтож уншилгүй өнгөрнө гэж байхгүй. Манайд энэ хүрээллийг хуучин цагт “сэхээтэн” гэдэг байв. Одоо цагт бол “элит” гэх болжээ.  Энэ хүрээнийхний оюун санааны хэрэгцээ, хэрэглээ нь жирийн дундаж ард олноос дээгүүр байх нь ойлгомжтой. Үгүй ядахнаа тэгж харагдах хэрэгтэй болно. Олонх хүний хувьд цочирдмоор шинэлэг тавилттай, хүний түүхэнд бичигдсэн хамгийн агуу зохиол гэгдсэн “Фауст” жүжиг бол чухам л сэхээтэн гэдгээ хэн нэгэнд, эсвэл өөртөө ч юм уу нотлох сайхан боломж. Мэдээж хүн бүхэн Гётегийн “Фауст”-ыг унших боломжгүй. Уншаад ч ухаж ойлгох нь юу л бол. Гэхдээ л дэлхийн сэхээтнүүд, элитүүд энэ жүжгийг үзсээр ирсэн, үзсээр ч байх бололтой. Тэгэхээр монголчууд юугаар дутахав.

Монголд дээд зэрэглэлийн, сонгодог гэсэн тодотголтой бүхэн хүлээлтэндээ хүрч чаддаггүйг хэн хэнгүй мэднэ. Өндөр хүлээлттэй, байдгаараа гоёж очоод, өвлийн шөнө сэтгэл дундуур даарсхийн харих ямар олиг байх билээ. Анхны тавилтыг нь өндөр хүлээлттэй үзсэн хүний хувьд найруулагч М.Батболдын “Фауст” жүжиг үзэгчээ сэтгэл дундуур гаргахгүй л болов уу гэж найдаж байна. Үзэгчээс ямар нэг зүйл, санаашрал ч юм уу, баяр баясал ч юм уу эсвэл бүр үзэн ядалт ч юм уу танхимдаа авч үлдэх нь уран бүтээлчдийн зорилго байдаг. Манайд сүүлийн үед тавигдсан жүжгүүдээс тэр зорилгодоо хамгийн дөхөж очсон бүтээл бол “Фауст” байж магадгүй. Гэхдээ “магадгүй” шүү!

ШАЛТГААН №2. ХҮН ЧАНАРАА “ЛОМБАРД”-НД ТАВЬСАН ЭСЭХЭЭ МЭДЭХИЙГ ХҮСВЭЛ...

“Фаустын домог” уг нь Ариун библийн Иовын номноос эхлээд хар домч, алхимичдийг хамарсан алдартай домог. Гэхдээ үнэн бодит юм шиг санагддаг цөөхөн домгийн нэг шүү! Хамгийн энгийнээр ойлговол чөтгөрт сүнсээ худалдаж, зүйрлэшгүй шид чадварыг олсон хүний түүх юм. Өөрөөр хэлбэл хүний оршихуйгаас хэтийдэхийн тулд, хүний чадвараас давсан үйл бүтээхийн тулд өөрийн амин сүнсээ чөтгөрт барьцаалсан хүн. Орчин үед буулгаж ойлговол хүн чанараа ямар нэг “ломбард”-нд тавьчихаад хүүнд нь барьцаалагдаад есөн жорын жаргал зовлон туулж яваа хүний түүх.

Европт чөтгөртэй гэрээлсэн санваартны тухай, бүр чөтгөртэй хийсэн гэрээ нь олдсон тухай цуу яриа,  инквизаторууд зэтгэртэй гэрээлэгсдийг илрүүлэн устгасан түүх тоо томшгүй олон бий. Тэдний дундаас хамгийн алдартай нь Европыг хэрэн хэсэж амьдарсаар 1540-өөд онд Германы Виттенбергт дуулиантайгаар нас эцэслэсэн Иоханн Фауст хэмээх санваартны түүх юм.  Хар домч, алхимичээрээ алдаршсан энэ эрийн чөтгөртэй байгуулсан гэрээ ч олдсон гэлцдэг.

Төд удалгүй энэ түүхээс сэдэвлэж, Шекспирийн үед Шекспирээс ч алдартай байсан Кристофер Марлоу жүжиг бичжээ. Марлоугийн жүжгээс 300 гаруй жилийн дараа Германы их бичгийн хүн Иохан Вольфанг Фон Гёте “Фауст” хэмээх жүжиг бичсэн нь эдүгээ ертөнцийн хамгийн агуу жүжиг гэгдэх болжээ. Гэхдээ сэдэл болсон домгоос нь болж “Фауст” жүжгийг христийн шашинтай хольж ойлговол үнэхээр утгагүй төөрөгдөл болно. Шашинжуулахдаа тулвал, “Чи буддист бол Фаустыг нэн даруй үз, чи итгэгч бол Фаустыг үзэхгүй өнгөрч болно гэж үү?” гэж хэлэх байна.

ШАЛТГААН №3. “АГУУ”, “СОНГОДОГ” ГЭХ МЭТ СҮРЖИН ТОДОРХОЙЛОЛТЫН УЧРЫГ ОЙЛГОХЫГ ХҮСВЭЛ...

Сүнсээ чөтгөрт худалдсан хүний түүх юу нь тэгтлээ сонирхолтой байна гэх асуух хүн гарах байх. И.В.Ф Гётегийн насан туршдаа бодож байж бичсэн гэлцдэг энэ жүжигт зөвхөн дээрх домгийн тухай өгүүлэхгүй.

Зохиолч энэ жүжгээр ёс суртахуун, хүний оршихуйн мөн чанар, хайр дурлал, мөнхийн хайр бий эсэх, цаг хугацаа, үйлийн үр гэж бий юу, хойд насны амьдрал, насны бөгсөнд эд баялаг, эрдэм мэдлэг хоёрын аль нь үнэндээ чухал вэ, аль эсвэл аль нь ч хэрэггүй хог юм уу зэрэг тоо томшгүй асуулт тавьж, түүндээ хариулт эрсэн байдаг. Хүн насан туршдаа өөрөөсөө асууж, өөртэйгээ зөрчилдөж явдаг үр бодлуудыг Фауст хэмээх ухаантны амьдралд сүлжиж орхисон хэрэг. Энэ сүлжээсийг хэрхэн тайлах нь хүн төрөлхтний хувьд гоо зүйн эрэл хайгуул болж үлдсэн. Сонгодог жүжгүүд мөнхөд тоглогдсоор байдгийн гол шалтгаан нь энэ. Сонгодог зохиол гэдэг хариулт, сургаалиудаар дүүрэн биш асуулт, хариулахад хэцүү асуултуудаар л дүүрэн байдаг юм.

Агуу зохиол гэдэг асар олон талтай, сэтгэхүй, үйлдлийн систем бөгөөд түүнийг тайлна гэдэг найруулагчийн хувьд ч, жүжигчний хувьд ч, үзэгчийн хувьд ч сэтгэхүйн том дасгал, оюун санааны аялал байдаг. Чухам тэрхүү тайллаараа найруулагч, уран бүтээлчид үнэлэгддэг. М.Батболд шиг залуухан, туршлага багатай найруулагчийн хувьд “Фауст”-ыг тавихаар зориглох нь амиа хорлосноос ялгаагүй хэрэг. Чухам энэ зоригтой сонголт нь урлагийн хүрээний олон хүний сониучирхал, зэвүүрхлийг төрүүлсэн. Үүнийг бичиг ч бас сониу, зэвүү тээсээр анх үзсэнээ нуух юун...                    

ШАЛТГААН №4. УЛАМЖЛАЛТ ТЕАТРААС УЙДАЖ ЗАЛХСАН БОЛ...

Найруулагч М.Батболд бол Орос ах нарын бүтээгдэхүүн. С.Гэндэн, Л.Ванганаас эхлээд монголын театрын уран сайхны бодлогыг сүүлийн 30 гаруй жилийн турш зангидсан Н.Сувд гуай гээд театрын гол уран бүтээлчид бүгд орос школоор хүмүүжиж, эх орондоо хэрэгжүүлсэн улс. Монголын урлагийнхан 10 гаруй жилийн өмнөөс оросууд өөр болчихож, оросын театр өөрчлөгдөж байна гэх мэтээр жиг жуг гэх болсон. Гэхдээ яаж өөрчлөгдөөд, өөр болоод байгааг нь очиж үзээд, монголдоо авч ирж хэрэгжүүлсэн нь харамсмаар цөөхөн. Хэдийгээр найруулагчдын нэгэн шинэ үе гарч ирж, эрэл хайгуул хийсээр байгаа ч монголын театр үзэгчдийнхээ оюуны хэрэгцээ, таашаалыг хангаж, сэтгэлийн цэнгэл эдлүүлж чадаж байгаа юу гэвэл үгүй.

Яг ийм нэг сонирхолтой ч юм шиг, уйтгартай ч юм шиг зурвас үед М.Батболд хэмээх шинэ найруулагч театрын ертөнцөд орж ирж байна. Манай үеийнхний гадаадын мэргэжлийн сэтгүүл, цахим орон зайнаас л олж үзэж ирсэн динамиктай, орон зай шаардсан чөлөөт тавилтыг М.Батболдын “Фауст” жүжгээс үзсэн нь таашаал төрүүлснийг нуугаад яахав. Гэхдээ анхны тавилтаа Соёлын төв өргөөнд хийсэн нь учир дутагдалтай байв. Соёлын төв өргөө бол хошин шогийн гараа, концерт хийхэд тохиромжтой болохоос драмын жүжиг тавихад тохиромжгүй тайз юм. Тийм ч учраас М.Батболд найруулагчийн зарим орон зайн шийдэл, тоглолтууд үзэгчдэд хүрэхгүй сарниад байгаа нь мэдрэгдсэн. Харин энэ удаа “The Corporate Hotel and Convention Centre”хэмээх монголдоо л сайнд тооцогдох танхимд тавигдах гэж байгаа нь сонирхол татаж байна.

“Найруулагчийн тавилт” гэдэг энэ үг өөрөө их марзан үг л дээ. Гэхдээ үйл явдал, шийдлийг нь урьдчилан задлахгүйгээр тавилтыг нь базаж дүгнэвэл, үзэгч энэ жүжгээс монголд урьд өмнө нь үзээгүй театрын олон боломж байдгийг олж харах болно.

ШАЛТГААН №5. ХИЙМЭЛ БУС БОДИТ ЖҮЖИГЛЭЛТ ҮЗМЭЭР БАЙВАЛ...

“Фауст” жүжиг гол хоёр дүртэй. Нэг нь ертөнцийн явдалыг бясалгаж, бараг л гэгээрлийн гарман дээр ирсэн Фауст гуай. Манай нийгэмд Фаустархуу дүр байна уу гэж миний бие бодож үзээд, яруу найрагч Д.Урианхайгаас өөр хүн олоогүй. Өөрөөр хэлбэл Фауст бол Д.Урианхай гуайрхуу л ховор хувь хүн, бодьгал гэсэн үг. Энэ дүрд жүжигчин Г.Мягмарнаран, С.Болд-Эрдэнэ нар тоглоно. Хөгшин залуу хоёр жүжигчин нэр дурьдагдахыг үзээд гярхай үзэгч нэгийг тааварлах нь лавтай. Хоёулаа драмын театрын сонгодог, арилжааны, хүүхдийн гээд бүх л жүжгийг нуруун дээрээ үүрч гарч сурсан туршлагатай “тайзны хүмүүс”. Тэдний хослол найруулагч М.Батболдын “орон зайн тавилт” дээр хэрхэн буух нь үзэгчдэд сонирхолтой байх. 

Жүжгийн нөгөө нэг гол дүр нь бурхадтай дэнчин тавьж, Фаустын сүнсийг авахаар ертөнцөд бууж ирэх Мефистофел. Хамгийн сонирхолтой энэ дүрд монголын хошин урлагийн оддын нэг “Аглуу” буюу Л.Баттулга тоглоно. Л.Баттулгын тоглолт, жүжигчний ажиллагаан дээр ярих юм их байгаа ч жүжгээ хүлээж буй үзэгчдийг хүндлээд одоохондоо хэлээ хазъя. Ямартай ч энэ жүжигт дүр бүтээж буй жүжигчид өөрийн тогтсон хэв маягаасаа аль болох зайлсхийхийг хичээж байсныг нь дуулгах нь зүйтэй байх. Басхүү жүжигчдийн тоглолтонд сонгодог бүтээлд дүр бүтээж байгаа гэсэн дотоод хиймэл хичээнгүйлэл бага байсныг урьдчилан дуулгамаар байна.

Монгол шинээр тавигдаж буй нэгэн шинэ жүжгийн тухай үзэгчдэд хэрэг болох болов уу гэсэн санаануудаа нуршихад ийм байна. Үүнээс цаашихыг мөнх хөх тэнгэр ч биш, урлагийн бурхан Янжинлхам, Гэгээн Муза ч биш гагцхүү үзэгч таны мэргэн оюун мэдмой!

СУИС-ийн Театрын Урлагийн Сургуулийн багш Я.Баяраа

Дэлгэрэнгүй унших
сурталчилгаа
Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна. SHUDARGA.MN сайтын редакц

Урлаг спорт

“MNB Гэр бүл” суваг нээлтээ хийж, туршилтын эфирээ цацаж эхэллээ

Огноо:

,

Монголын үндэсний олон нийтийн радио, телевиз хүүхэд, гэр бүлд чиглэсэн нэвтрүүлгийн бодлоготой, үндэсний хэмжээнд соён гэгээрүүлэх үйл ажиллагаа явуулдаг телевизийн сувагтай болох том төслийг Засгийн газар, Хөдөлмөр, нийгмийн хамгааллын яамны дэмжлэгтэйгээр хэрэгжүүлж эхэлсэн.

Тэгвэл хүүхэд, гэр бүл, залуучуудын хөгжлийг дэмжих, тэдэнд нэн шаардлагатай боловсрол, эрүүл мэнд, танин мэдэхүй, түүх уламжлал, соёл ёс заншил, хууль эрх зүй зэрэг бүхий л мэдээллээр дагнасан “MNB Гэр бүл” суваг өнөөдөр нээлтээ хийж, туршилтын эфирээ цацаж эхэллээ. МҮОНРТ-ийн уг отгон суваг зөвхөн хүүхэд, залуучууд гэлтгүй ахмад настан, хөгжлийн бэрхшээлтэй иргэд зэрэг нийгмийн бүх бүлгийн хэрэгцээнд нийцсэн, амьдралд нь хэрэг болохуйц мэдлэг мэдээлэл өгөх нэвтрүүлэг, контентыг дагнан хүргэнэ.

МҮОНРТ-ийн уран бүтээлчид нас насны уран үзэгчдийн сонирхолд нийцсэн контентыг бүтээж, хүргэнэ

MNB Гэр бүл” сувгийн нээлтэд уригдсан зочид, уран бүтээлчдээс гэр бүлийн телевизийн сувгийн ач холбогдлын талаар хариулт авлаа.

УИХ-ын гишүүн, Засгийн газрын гишүүн, Хөдөлмөр, нийгмийн хамгааллын сайд С.Чинзориг: ““MNB Гэр бүл” суваг эх орны ирээдүй болсон хүүхэд залуусыг хөгжих, төлөвших, эх орон, байгаль дэлхий, үндэсний уламжлал, түүх, хэл бичиг, өв соёл, урлаг, ахмад үеэ хайрлах үзэл, хүмүүжил төлөвшүүлэх, олон талын өргөн мэдээлэл өгөх танин мэдэхүйн үр дүнтэй нэвтрүүлэг, контент бүтээж хүргэнэ. Гэр бүлийн телевизийн суваг хөдөлмөр, нийгмийн хамгааллын чиглэлээс гадна боловсрол, эрүүл мэнд, хууль эрх зүй, өрхийн төсөв зэрэг сэдвээс гадна байгаль эх дэлхийгээ, эх орноо хайрлах болоод иргэний эрх, үүргийг сануулах цэнхэр дэлгэцийн уран бүтээлийг үзэгчдэд хүргэдэг. МҮОНРТ-ийн уран бүтээлчид нас насны уран үзэгчдийн сонирхолд нийцсэн контентыг бүтээж, хүргэнэ гэдэгт итгэлтэй байна” гэсэн юм.

олон нийтийн телевизийн хөгжлийн чиг хандлага, олон улсын жишгийн дагуу тав дахь сувгаа нээх зорилтыг дэвшүүлсэн

МҮОНРТ-ийн Үндэсний зөвлөлийн дарга Б.Энхмандах: ““MNB Гэр бүл” шинэ суваг Монголын үндэсний олон нийтийн радио, телевизийн хөгжлийн бодлогын баримт бичгийн дагуу нээгдэж байгааг нэн түрүүнд хэлмээр байна. Бид 2014 оноос эхлэн МҮОНРТ-ийн стратегийг дөрвөн жилээр баталж ирсэн. 2014-2018 оны дөрвөн жилийн хөтөлбөр амжилттай хэрэгжиж, олон нийтийн телевизийн дөрөв, радиогийн гурван сувагтай өргөн хүрээтэй үйл ажиллагаа явуулдаг хэвлэл мэдээллийн хэрэгсэл болж өргөжсөн. Дараагийн шатны стратеги буюу 2019-2023 оны дөрвөн жилийн дунд хугацааны хөтөлбөрийн хүрээнд телевизийн нэвтрүүлгийн төрлийг дахин нэмэгдүүлэх, олон нийтийн телевизийн хөгжлийн чиг хандлага, олон улсын жишгийн дагуу тав дахь сувгаа нээх зорилтыг дэвшүүлсэн. Тэгвэл энэ зорилгын дагуу “MNB Гэр бүл” сувгийн туршилтын эфирийг өнөөдөр амжилттай эхлүүллээ. Ирэх есдүгээр сараас сувгаа албан ёсоор нээж, байнгын үйл ажиллагаанд шилжүүлнэ.

МҮОНРТ-ийн хөгжлийн бодлогыг хэрэгжүүлэхэд Засгийн газар, Хөдөлмөр, нийгмийн хамгааллын яам(ХНХЯ)-наас бодитой тусламж үзүүлж “MNB Гэр бүл” суваг нээгдэж байгаа” хэмээв.

Монголын хүүхэд, залууст зориулсан хамгийн чанартай, үзүүштэй нэвтрүүлэг, контентыг бэлтгэн хүргэх болно

МҮОНРТ-ийн Ерөнхий захирал Л.Нинжжамц: “Өнөөдөр MNB Монгол Улсын Засгийн газар, ХНХЯ-ны дэмжлэгтэй тав дахь сувгаа нээж байна. Энэ сувгийг үүсгэн байгуулах болоод бүх л бэлтгэл ажлыг хангаж ажилласан МҮОНРТ-ийн уран бүтээлчид, инженер техникийн ажилтнууддаа юун түрүүнд чин сэтгэлээсээ баярлаж байгаа илэрхийлье. Телевизийн урлаг бол хамтын бүтээл. Манай хамт олон “MNB Гэр бүл” сувгаар Монголын хүүхэд, залууст зориулсан хамгийн чанартай, үзүүштэй нэвтрүүлэг, контентыг бэлтгэж хүргэх болно” гэж хэллээ.

Нийгмийн гол тулгуур гэр бүл

MNB-Гэр бүл” суваг төслийн зохицуулагч, найруулагч Н.Байгал: “МҮОНРТ-ийн  “МNB-гэр бүл” суваг гэр бүл, хүүхэд, залуучууд, ахмад настан, хөгжлийн бэрхшээлтэй иргэнд зориулсан жендерийн тэгш байдлыг хангасан үндэсний контент бэлтгэнэ. Программын бодлогын хувьд залуучуудын, хүүхдийн, гэр бүлийн, бодлогын нэвтрүүлгийн гэсэн үндсэн дөрвөн редакцтай нэвтрүүлэг, контент “үйлдвэрлэж” хоногт 17 цагийн эфирээр үзэгчдэд хүргэнэ.

МҮОНТ буюу нэгдүгээр сувгаар дээрх бүх агуулгыг нэг дор багтаан үзэгчдэд хүргэх гэхээр нэвтрүүлгийн цаг хугацаанд баригддаг, эфирийн цагийн хязгаартай байсан бол “МNB Гэр бүл” суваг нээгдсэнээр гэр бүлийн гишүүн бүрт зориулсан болон гэр бүлийн бүх гишүүн хамтдаа суугаад үздэг телевизийн контентуудыг бэлтгэн нэвтрүүлнэ. Нийгмийн гол тулгуур гэр бүл учир тэдэнд зориулагдсан нэвтрүүлэг, контент, телевизийн суваг сайн үр, нөлөө авчирна гэдэгт итгэлтэй байна” гэв.

Монголд гэр бүлийн суваг зайлшгүй шаардлагатай

MNB Гэр бүл” сувгийн эфирийн найруулагч Н.Эрдэнэдэлгэр: “Нийгмийн захиалга гэдэг шиг Монголд гэр бүлийн суваг зайлшгүй шаардлагатай гэж боддог. Монголын айл өрх, гэр бүл бүрт бий болдог, тулгамддаг том жижиг аливаа асуудлыг шийдэхэд “MNB Гэр бүл” сувгийн уран бүтээл, нэвтрүүлгүүд том тус болно гэж найдаж байна. Би Монголын үндэсний олон нийтийн телевизэд эвлүүлэгчээс ажлын гараагаа эхэлж 20-иод жил ажилласан. Өнөөдөр том ажлын ард гарч, МҮОНРТ-ийн отгон суваг болох “MNB Гэр бүл” бие даасан сувгийн туршилтын анхны эфирийг нээж, үзэгч олонд хүргэж байгаадаа маш их баяртай байна” гэлээ.

Нэг телевиз, суваг үүсгэнэ гэдэг асар том ажил

МҮОНРТ-ийн Техникийн төвийн Телевизийн техникийн албаны ерөнхий инженер Б.Насанжаргал: “Манай төв “MNB Гэр бүл” сувгийн студийн тоног төхөөрөмж, техникийн бүхий л асуудлыг хариуцан ажиллаж байгаа. Туршилтын эфир Зуны тэргүүн сарын шинийн 3-ны билэгт сайн өдөр буюу өнөөдөр 10:00 цагаас үзэгчдэд хүрлээ. Дуу дүрс чанарын өндөр түвшинд буюу HD форматаар цацагдаж байгаа. Манай MNB-ийн хамт олон 2018 оны гуравдугаар сард “MNB Спорт” сувгаа албан ёсоор нээж, тухайн оныхоо арванхоёрдугаар сард “MNB World” сувгаа нээж байсан бол үүнээс хоёр жилийн дараа тав дахь сувгаа нээж, туршилтын эфирээ цацаж эхэллээ. Нэг телевиз, суваг үүсгэнэ гэдэг асар том ажил байдаг. Энэ том ажлын ард гарч, үзэгч олондоо нэн шаардлагатай гэр бүлд, хүүхэд залууст зориулагдсан шинэ сувгийг танилцуулж, эфирээ хүргэж эхэлсэн дарга удирдлага, хамт олондоо баяр хүргэе” гэсэн юм.







Дэлгэрэнгүй унших

Урлаг спорт

“Playtime” хөгжмийн фестиваль ирэх оны зун хүртэл хойшлогдлоо

Огноо:

,

Жил бүр уламжлал болон зохион байгуулагддаг “Playtime” хөгжмийн фестиваль энэ удаад дэлхийд тархаад байгаа "COVID-19" цар тахлын улмаас ирэх оны 7 дугаар сарын 16-ныг хүртэл хойшлогдохоор болсон байна.

Энэ талаар тус наадмыг зохион байгуулагчид өөрсдийн албан ёсны фэйсбүүк хуудсаар мэдэгдлээ. Тус мэдэгдэлд "Дэлхий даяар "Covid-19"-ийн цар тахлын аюул улс оронд нэмэгдэж, олон нийтийн урлаг, соёлын арга хэмжээ, нийтийг хамарсан үйл ажиллагаа бүхий олон улсын хөгжмийн томоохон фестивалиуд хойшлогдоход хүрч хүндэрч тусч байна. Тийм учраас энэ жилийн наадмыг товыг бүтэн жилээр хойшлуулан, 2021 оны долдугаар сарын 16, 17, 18-нд зохион байгуулах боллоо. Учир нь Дэлхийн эрүүл мэндийн байгууллагаас Монгол Улсад халдвар тархах өндөр эрсдэлтэй болохыг байнга сануулж байгаа учраас Засгийн газраас авч хэрэгжүүлж байгаа шуурхай арга хэмжээг хэрэгжүүлж товоо хойшлуулахад хүрсэн" гэсэн байна.

Тус фестиваль хойшлогдсонтой холбогдуулан зохион байгуулагчид иргэдийн худалдан авсан тасалбар албан ёсоор 2021 онд шилжиж, хүчин төгөлдөр үйлчилэх аж.


Дэлгэрэнгүй унших

Урлаг спорт

МҮОНРТ-ийн "MNB Спорт" суваг, Монголын Хөлбөмбөгийн холбоо хамтран теле хичээл явуулна

Огноо:

,

МҮОНРТ-ийн "MNB cпорт" суваг, Монголын Хөлбөмбөгийн холбоо хамтран хөлбөмбөгийн теле хичээлийг хүүхдүүдэд зориулан заах гэж байна. Теле хичээлээр дамжуулан хүүхдүүдийн бие бялдарт анхаарч спортоор хичээллэж, эрүүл мэнддээ анхаардаг зөв дадлыг төлөвшүүлэхээр зорьж байгааг салбарынхан онцолж байна. Теле хичээл 6 дугаар сарын 1-нээс "MNB спорт" сувгаар хүүхдүүдэд хүрнэ.

Дэлгэрэнгүй унших

Санал болгох