Бидэнтэй нэгдэх

Чөлөөт цаг

Хашаа байшингаа даатгуулах тохиолдолд иргэд юуг анхаарах вэ?

Огноо:

,

Санхүүгийн зохицуулах хороо нь зохицуулагч үүргийнхээ хүрээнд, аливаа даатгалд хамрагдаж байгаа иргэдийн эрх ашиг, тэдний өмнө даатгалын компаниудын хүлээсэн үүрэг, хариуцлагад хяналт тавьж ажилладаг. Иргэд орон сууц, хашаа байшин зэрэг үл хөдлөх хөрөнгө болон бусад даатгалын бүтээгдэхүүн, үйлчилгээ эрхлэгчдийн үйл ажиллагаатай холбоотой аливаа гомдол маргааныг Хороонд хандаж шийдвэрлүүлэх боломжтой юм.

Тухайлбал, хашаа байшингаа даатгуулах тохиолдолд иргэд юу юуг анхаарах ёстойг дараах зөвлөмжөөр хүргэж байна.

Иргэд даатгалын компаниар үйлчлүүлэхдээ мэдлэг мэдээлэлгүйгээс хохирох зарим талын эрсдэл үүсч болно. Тэгвэл эд хөрөнгө, цаг хугацаа, санхүүгийн хувьд эрсдлээс урьдчилан сэргийлэхийн тулд иргэн та өөрөө даатгалын компаниасаа бүрэн мэдээлэл авч, гэрээний нөхцөлтэй сайтар танилцан, баталгаажуулах хэрэгтэй.

1. Та хашаа байшингаа даатгуулах даатгалын компаниа сонгоно. Уг компани тань Санхүүгийн зохицуулах хорооноос тусгай зөвшөөрөлтэй эсэхийг сайтар үзээрэй.

2. Сонгосон компани дээрээ очиж “Хашаа байшингийн даатгалын нөхцөл заавар”, даатгалын гэрээнд заасан нөхцөлийг уншиж танилцана.

3. Хашаа байшингаа хэдэн төгрөгөөр үнэлж даатгуулах талаар өөрөө сонголтоо хийнэ. Та аль болох зах зээлийн үнээр нь даатгуулбал учирсан аливаа хохирол бүрэн төлөгдөх боломжтой болно. Харин бодит үнээс хоёр гурав дахин дээгүүр үнэлж даатгуулбал даатгалын гэрээ хүчингүй болдогийг анхаараарай.

4. Энэ үнэлгээгээ даатгалын компанийн ажилтантай тохиролцоно.

5. Хашаа байшингаа үер ус бороо цас, шуурга, гал гэх мэт осол эрсдэлийн алинаар нь даатгуулахаа та даатгагчтай тохиролцоно.

6. Одоо даатгалын гэрээний бусад хэсгүүдийг сайтар харна. Даатгалын компани нөхөн төлбөрөө ямар нөхцөлд өгөх эсвэл өгөхгүй эсвэл бууруулж өгөх гэдэг талаар сайтар ярилц.

7. Даатгалын компани болон даатгагч таны хүлээх үүрэг, эдлэх эрхийг гэрээнд хэрхэн тусгасан талаар үзэж танилц.

8. Даатгалын осол эрсдэл учирсан бол ямар хугацаанд даатгагчид мэдэгдэх талаар лавла.

9. Тодорхой хэмжээний мөнгөн төлбөр буюу даатгалын хураамжийг даатгалын компанид төлдөг. Даатгалын хураамж хэдэн хувиар төлөхөө тодруулж асуугаад хураамжаа төлөх нь зүйтэй.

10.Сүүлийн шатанд даатгалын гэрээ болон даатгалын баталгаагаа баттай, мартахгүй газар хадгалаарай...

Дэлгэрэнгүй унших
сурталчилгаа

Сэтгэгдэл

Чөлөөт цаг

МҮОНРТ "Шинэ тутамд хөгжиж буй хэвлэл мэдээллийн байгууллага” шагнал хүртлээ

Огноо:

,

БНХАУ-ын Засгийн газар болон ССTV хамтран зохион байгуулсан “Нэг бүс-Нэг зам” хөтөлбөрийн хүрээнд зохион байгуулагдсан медиа форум өнгөрсөн долоо хоногт урд хөршид болсон. Дэлхийн 30 гаруй орны 400 гаруй төлөөлөгч оролцсон тус форумд Монголын үндэсний олон нийтийн радио, телевизийн “Монголын мэдээ” сувгийн Ерөнхий продюсер Ц.Цэнд, МҮОНР-ийн "Хурд" агентлагийн дарга Ж.Нарангэрэл нар энэ сарын 9-12-нд оролцлоо.

Мөн “Нэг бүс-Нэг зам” медиа форумын үеэр Монголын үндэсний олон нийтийн радио, телевиз "Шинэ тутамд хөгжиж буй хэвлэл мэдээллийн байгууллага” номинацын шагнал хүртсэн юм.

Дээрх арга хэмжээний хүрээнд газар зүйн байршлаараа нэг бүсэд харьяалагдах орнуудын болон дэлхийн хөгжингүй орны хэвлэл мэдээллийн салбарынхан нэг дор цуглаж, “Даяарчлагдаж буй өнөөгийн нийгэмд хэрхэн хамтран ажиллах вэ” сэдвийн хүрээнд нэгдсэн хуралдаан болон салбар хуралдаанд оролцсон. Түүнчлэн энэ үеэр МҮОНРТ-ээс “How to promote the news cooperation through Co-production Program” сэдвээр илтгэл хэлэлцүүлэв. Мөн БНХАУ, Вьетнам, Герман, Франц улсын төлөөлөгчидтэй туршлага хуваалцаж, цаашид хамтран ажиллах талаар санал солилцсон байна.

Дэлгэрэнгүй унших

Чөлөөт цаг

Энхийг сахиулагчид Жанжин тугандаа хүндэтгэл үзүүллээ

Огноо:

,

Бүгд Найрамдах Өмнөд Судан улсад явагдаж байгаа НҮБ-ын мандаттай энхийг сахиулах "UNMISS" ажиллагаанд үүрэг гүйцэтгэх Монгол Улсын Зэвсэгт хүчний IX ээлжийн мотобуудлагын батальон ажиллагааны өмнөх бэлтгэл сургалтаа хангаж дуусаад өдгөө газар орныг зориход бэлэн боллоо.

Хурандаа Д.Баттүвшин захирагчтай тус батальоны монгол цэргийн оройн дээд шүтээн Жанжин туганд хүндэтгэл үзүүлэх ёслолын ажиллагаа энэ сарын 18-нд боллоо.

Ёслолын арга хэмжээнд Батлан хамгаалахын дэд сайд Т.Дуламдорж, ЗХЖШ-ын нэгдүгээр орлогч дарга, хошууч генерал Р.Сүхбат тэргүүтэй БХЯ, ЗХЖШ, төрлийн цэргийн командлал, ХХЕГ, ТЕГ, Дотоодын цэргийн штабын удирдлагууд, энхийг сахиулагчдын ар гэрийн төлөөлөл оролцсон юм. БНӨСУ дахь НҮБ-ын энхийг сахиулах ажиллагаанд Монгол Улсын Зэвсэгт хүчний мотобуудлагын батальон 2012 оноос эхлэн үүрэг гүйцэтгэж эхэлсэн бөгөөд энэ цаг үед гэхэд хурандаа Д.Жавхланбаяр захирагчтай наймдугаар ээлжийн мотобуудлагын батальон ажиллагааны газар оронд үүргээ амжилттай гүйцэтгэж байна.

Батлан хамгаалахын дэд сайд Т.Дуламдорж энхийг сахиулагчдад хандаж хэлсэн үгэндээ "Монгол Улсын Зэвсэгт хүчин хуулиар хүлээсэн үндсэн чиг үүргийнхээ зэрэгцээ даян дэлхийн энх тайван аюулгүй байдлыг сахин хамгаалах, бэхжүүлэх ариун үйлсэд эх орон ард түмнээ төлөөлөн оролцож Монгол Улсынхаа нэр хүндийг дэлхийн тавцанд өргөн мандуулж, Зэвсэгт хүчнийхээ түүхийн хуудсыг улам бүр баяжуулсаар байна.

Газар зүй, байгаль цаг уурын ямар ч хүнд нөхцөлд манай цэргийн алба хаагчид нэгдмэл санаа зорилго, чанд сахилга баттай байж, үүрэг гүйцэтгэлтээрээ гайхагдаж байгаад салбарын дэд сайд хувьд маш их баяртай байдгаа энэ дашрамд хэлье. Бусад орны цэргийн алба хаагчдад мэргэжил, ур чадвараараа хүлээн зөвшөөрөгдөж, үлгэр дуурайлал болж байгаа энэ сайхан замналыг та бүхэн нэр төртэй авч явна гэдэгт итгэлтэй байна. Эх орныхоо захиас даалгаврыг биелүүлэхээр хөлгийн жолоо залах гэж байгаа хүүгийнхээ, ханийнхаа, аав ээжийнхээ бат найдвартай ар тал болсон ар гэрийнхэнд нь чин сэтгэлийн талархал илэрхийлье" гэсэн юм.

Ташрамд онцлоход, ажиллагааны газар орныг зорих гэж байгаа тус батальоны бүрэлдэхүүний 40 гаруй хувь өмнө нь энхийг сахиулах үүрэг гүйцэтгэж байсан туршлагатай аж. Тэд удахгүй ажиллагааны газар орныг зорино.


Дэлгэрэнгүй унших

Чөлөөт цаг

“ICT-Expo-2019” үзэсгэлэн энэ сарын 27-ноос 29-ны өдрүүдэд болно

Огноо:

,

Жил бүр уламжлал болгон зохион байгуулдаг “ICT-Expo-2019” үзэсгэлэн есдүгээр  сарын 27-ноос 29-ны өдрүүдэд “Мишээл экспо” төвд болно. Үзэсгэлэнг Засгийн газрын тохируулагч агентлаг Харилцаа холбоо, мэдээллийн технологийн газраас “Дижитал хөгжилд хамтдаа” уриан дор 13 дахь удаагаа зохион байгуулах гэж байна.

Үзэсгэлэнд төрийн болон хувийн хэвшлийн байгууллагууд оролцож, харилцаа холбоо, мэдээллийн технологийн дэвшил, шинэ бүтээгдэхүүн, үйлчилгээг олон нийтэд танилцуулна.

“ICT-Expo-2019” Үзэсгэлэнгийн хүрээнд мэдээлэл технологийн салбарын хөгжлийн чиг хандлага, нийгэмд үзүүлж буй үр нөлөөллийн асуудлыг хэлэлцэх “DIGITAL DEVOLEPMENT” форум есдүгээр сарын 24-ний өдөр “Туушин” зочид буудлын “Соёмбо” танхимд зохион байгуулах гэж байна. Тус форумд техник технологи нэвтрүүлэгч, хэрэгжүүлэгч дотоодын болон олон улсын байгууллагууд оролцож илтгэл тавьж хэлэлцүүлнэ.

“ICT-Expo-2019” үзэсгэлэнг хамтран зохион байгуулагчаар Харилцаа холбооны зохицуулах хороо, Ерөнхий ивээн тэтгэгчээр үүрэн холбооны Мобиком корпораци, Юнител групп, Скайтел групп ажиллаж байна.

Хэрэглэгч, үйлчлүүлэгч та бүхнийг харилцаа холбоо, мэдээллийн технологийн салбарын хамгийн сүүлийн үеийн дэвшилтэт технологи, шинэ бүтээгдэхүүн, үйлчилгээтэй танилцахыг урьж байна.

Үзэсгэлэнгийн талаарх дэлгэрэнгүй мэдээллийг www.ictexpo.mn цахим хуудсаар авах боломжтой. Үзэсгэлэнгийн үеэр МУБИС-аас “Мишээл экспо” төвийн чиглэлд автобус үнэ төлбөргүй үйлчилнэ гэж Харилцаа холбоо, мэдээллийн технологийн газраас мэдээллээ.

Дэлгэрэнгүй унших

Санал болгох