Улстөр нийгэм
ОХУ-ын Красноярск мужийн амбан захирагчийг хүлээн авч уулзлаа
Монгол Улсад албан ёсны айлчлал хийж байгаа ОХУ-ын Красноярск мужийн амбан захирагч Александр Викторович Усс тэргүүтэй төлөөлөгчдийг Нийслэлийн иргэдийн Төлөөлөгчдийн Хурлын дарга Ж.Батбаясгалан хүлээн авч уулзлаа. Уулзалтын үеэр хотуудын найрсаг харилцаа хамтын ажиллагааг тэлэх, нэг бүс нутагт оршдог хотуудын хувьд ижил төсөөтэй байдалд түшиглэсэн хөгжлийн бодлого хэрэгжүүлэх талаар талууд санал солилцлоо. Амбан захирагч А.В. Усс “Монгол Улсад хийж буй айлчлал үр дүнтэй байж, Улаанбаатар, Красноярск хот хооронд харилцааны шинэ шатанд гарна гэдэгт итгэлтэй байна. Манай хоёр хотод ижил төстэй тал олон. Улаанбаатар хотод Монгол Улсын нийт хүн амын тал нь амьдардаг бол, Красноярскт Сибирийн бүс нутгийн иргэдийн дийлэнх олонх нь байна. Мөн хоёр хотын хөгжлийн боломж ижил учраас талууд харилцан ашигтай хамтран ажиллах бүрэн боломжтой...” гэсэн юм.
Нийслэлийн ИТХ-ын дарга Ж.Батбаясгалан “...Айлчлалын үеэр яригдсан ажил хэрэгч яриа, гэрээ хэлэлцээрийг эдийн засгийн үр өгөөжтэй төсөл хөтөлбөр болгон хэрэгжүүлэхэд хотын зүгээс анхаарч, манлайлан ажиллах болно. Монгол Улсын Ерөнхийлөгчийн санаачилгаар 1 тэрбум мод тарих хөдөлгөөн орон даяар өрнөж байна Сибирь бол дэлхийн уушги болсон ногоон бүс. Ийм туршлагатай хөрш манай хойно байгаад бид мөн олзуурхаж байгаа...“ гэдгийг онцоллоо. Мөн Монгол Улсад хийж буй албан ёсны айлчлалаараа олон салбарт хамтын ажиллагааг хөгжүүлж, бэхжүүлэх өргөн бүрэлдэхүүнтэй ирсэнд талархаж буйгаа илэрхийлээд, уулзалтаар яригдсан асуудлууд, байгуулсан санамж бичиг, хэлэлцээр үр дүнд хүрнэ гэдэгт итгэлтэй байгааг дурдлаа.
Уулзалтын үеэр Монголын талаас Нийслэлийн ИТХ-ын Төлөөлөгч Д.Ихбаяр, Ү.Оюунзул, Б.Мягмар, Б.Өнөбат болон Хурлын нарийн бичгийн дарга бөгөөд Ажлын албаны дарга Б.Батбямба, хэлтсийн дарга М.Халтар нар оролцсон бол нөгөө талаас ОХУ-аас Монгол Улсад суух Онц бөгөөд Бүрэн эрхт Элчин сайд И.К Азизов болон албаны бусад хүмүүс байлцлаа.
Улстөр нийгэм
ЗГ: Эм, эмнэлгийн хэрэгслийн тухай хуулийн шинэчилсэн найруулгын төслийг өргөн мэдүүлнэ
Засгийн газрын ээлжит хуралдаан 2024 оны дөрөвдүгээр сарын 24-нд болж дараах асуудлыг хэлэлцэн шийдвэрлэлээ.
Эм, эмнэлгийн хэрэгслийн тухай хуулийн шинэчилсэн найруулгын төсөл, түүнтэй холбогдуулан бусад хуульд нэмэлт, өөрчлөлт оруулах хуулийн төслийг хэлэлцээд УИХ-д өргөн мэдүүлэхээр тогтлоо.
Эм, эмнэлгийн хэрэгсэл, биологийн идэвхт бүтээгдэхүүний үнэ, чанарын өнөөгийн байдалд хяналт шалгалт, үнэлгээ хийсэн.
Үнэлгээнд хамрагдсан эмийн 90 гаруй хувьд 45 хүртэл хувиар нэмэгдсэн, дотоодын үйлдвэрийн дийлэнх эмийн бөөний үнэ 40-өөс дээш хувиар нэмэгджээ. Иймд иргэд эрүүл мэндийн тусламж, үйлчилгээ авахдаа санхүүгийн эрсдэлд орохоос сэргийлэх, бууруулах зорилгоор эмийн үнийн зохицуулалтын хууль, эрх зүйн орчныг боловсронгуй болгох хэрэгцээ, шаардлага байна.
Нийгмийн эрүүл мэндийн ноцтой байдал, гамшгийн үеийн эрүүл мэндийн тусламж үйлчилгээний нөөцийн бэлэн байдлыг хангах, яаралтай горимоор тусламж үйлчилгээнд нэвтрүүлэх эм, эмнэлгийн хэрэгслийг бүртгэх, хадгалах, эмийн нөөц бүрдүүлэхтэй холбогдсон эрх зүйн зохицуулалтыг илүү оновчтой болгох шаардлагатай байгааг 2020 оны коронавируст халдварын цар тахлын сургамж харуулсан.
Эм, эмнэлгийн хэрэгслийн тухай хууль /Шинэчилсэн найруулга/ хэрэгжиж эхэлснээр эм, эмнэлгийн хэрэгслийн зохицуулалт олон улсын жишигт хүрэх ач холбогдолтой гэж үзэж байна.
Улстөр нийгэм
Ерөнхий сайд Л.Оюун-Эрдэнэ Бүгд Найрамдах Киргиз Улсын Парламент Жогорку Кенеш-ийн дарга Н.Шакиевт бараалхав
Mонгол Улсын Ерөнхий сайд Л.Оюун-Эрдэнэ Монгол Улсад албан ёсны айлчлал хийж буй Бүгд Найрамдах Киргиз Улсын Парламент Жогорку Кенеш-ийн дарга Нурланбек Шакиевт бараалхлаа.
Ерөнхий сайд Л.Оюун-Эрдэнэ Киргиз Улсын Парламентын даргын түвшинд анх удаа хийж буй уг айлчлалд Монгол Улсын Засгийн газар өндөр ач холбогдол өгч байгааг тэмдэглээд энэхүү айлчлал нь манай хоёр улсын уламжлалт найрсаг харилцааг гүнзгийрүүлэн хөгжүүлэх, хамтын ажиллагааг бүхий л салбарт өргөжүүлэхэд чухал хувь нэмэр оруулна гэдэгт итгэлтэй байгаагаа илэрхийлэв.
Мөн Монгол, Киргизийн найрсаг харилцааг өргөжүүлэн хөгжүүлэх, эдийн засгийн агуулгаар баяжуулах зорилгоор Монгол Улсын Ерөнхий сайдын хувиар 2023 онд Киргиз Улсад анх удаа айлчилсныг дурдаад айлчлалын үр дүнд худалдаа, эдийн засаг, боловсрол, уул уурхай зэрэг салбарын хамтын ажиллагаа өргөжин хөгжиж, тэр дундаа алт цэвэршүүлэх салбарын хамтын ажиллагааны эхлэл тавигдсанд сэтгэл хангалуун буйгаа тэмдэглэлээ.
Уулзалтын үеэр талууд сүүлийн жилүүдэд хоёр улсын харилцаа, хамтын ажиллагаа эрчимжиж, улс төрийн яриа хэлэлцээ, харилцан итгэлцэл идэвхжиж байгааг онцлоод дээд, өндөр түвшний айлчлалын үеэр яригдсан асуудлуудыг бодит ажил хэрэг болгоход хүчин чармайлт гарган нягт хамтран ажиллахаа харилцан нотлов. Түүнчлэн цаашид худалдааны эргэлтийг нэмэгдүүлэх, аялал жуулчлал, боловсрол, хөдөө аж ахуй, уул уурхайн салбарын хамтын ажиллагааг өргөжүүлэх, Монгол, Киргизийн харилцааны бэлгэ тэмдэг, нэрийн хуудас болсон хөдөө аж ахуй, хөнгөн үйлдвэрийн салбарт хамтарсан төсөл хөтөлбөр хэрэгжүүлэх боломжийн талаар ярилцлаа.
Улстөр нийгэм
УИХ: Энэ долоо хоногт чуулганы нэгдсэн хуралдаанаар
Монгол Улсын Их Хурлын 2024 оны Хаврын чуулганы энэ долоо хоногийн /2024.04.25-26/ нэгдсэн хуралдааны тов, хэлэлцэх асуудлуудыг танилцуулж байна.
Сэтгэгдэл