Бидэнтэй нэгдэх

Үзэл бодол

Монголын сэтгүүлчид Дэлхий дахинаа

Огноо:

,

МСНЭ-ИЙН ОЛОН УЛСЫН БАЙГУУЛЛАГАД ЭЗЛЭХ БАЙР СУУРЬ, ХАМТЫН АЖИЛЛАГААТАЙ УЛС, ОРНУУД

  • МСНЭ нь Олон Улсын Сэтгүүлчдийн Холбооны бүрэн эрхэт гишүүн /1998 он/

  • Олон Улсын Сэтгүүлчдийн Холбооны /IFJ/ Ази номхон далайн орнуудын бүс нутаг хариуцсан зөвлөхөөр МСНЭ-ийн Ерөнхийлөгч Х.Мандахбаяр /2019.06.14/

  • Олон Улсын Сэтгүүлчдийн Холбооны /IFJ/ Жендерийн хорооны Удирдах зөвлөлийн гишүүнээр, МСНЭ-ийн Хяналтын зөвлөлийн гишүүн С.Алтанцэцэг  /2019.06.14/

  “Бүс ба зам” мэдээллийн сүлжээ Олон улсын сэтгүүл зүйн байгууллагын Удирдах зөвлөлийн гишүүн  МСНЭ-ийн Ерөнхийлөгч Х.Мандахбаяр  /2019.04.25/

  • Ази номхон Далайн сэтгүүлчдийн холбоог үүсгэн, санаачлагч МСНЭ /2019 он/

МСНЭ-ийн Удирдах зөвлөлөөс  2019 оныг “Гадаад харилцааны жил” болгон зарласантай холбоотойгоор МСНЭ нийт 30 улстай хамтран ажиллах гэрээ байгуулж, дөрвөн оронтой холбоо тогтоогоод байна.

1. МСНЭ. Оросын Сэтгүүлчдийн холбоо хамтран ажиллах хэлэлцээр байгууллаа.  /2018.11.14/

2. МСНЭ, Бүх Хятадын сэтгүүлчдийн холбоо хооронд байгуулсан санамж бичгийг шинэчлэн баталлаа. /2018. 09.06/

3. МСНЭ, ӨМӨЗО-ы Ардын засгийн газрын хэвлэл мэдээллийн хооронд байгуулсан санамж бичгийг шинэчлэн баталлаа. /2018.09.06/

4. МСНЭ, Солонгосын сэтгүүлчдийн холбоотой хамтран ажиллах санамж бичигт гарын үсэг зурлаа. /2014. 01./

5. МСНЭ, Беларусын сэтгүүлчдийн холбоотой хамтран ажиллах санамж бичигт гарын үсэг зурлаа. /2018.09.14/

6. МСНЭ, Энэтхэгийн сэтгүүлчдийн холбоотой  хамтран ажиллах хэлэлцээр байгууллаа. /2019.06.14/

7. МСНЭ, Арабын Нэгдсэн Эмиратын сэтгүүлчдийн холбоотой хамтран ажиллах хэлэлцээр байгууллаа. /2019.06.14/

8. МСНЭ, Африк тивийн болон Суданы сэтгүүлчдийн холбоотой  хамтран ажиллах хэлэлцээр байгууллаа. /2019.06.14/

9. МСНЭ, Тунисийн сэтгүүлчдийн  холбоотой  хамтран ажиллах хэлэлцээр байгууллаа.  /2019.06.14/

10. МСНЭ, Польшийн хэвлэл мэдээллийн холбоотой хамтран ажиллах хэлэлцээр байгууллаа.  /2019.09.06/

11. МСНЭ, Арабын сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

12. МСНЭ, Африкийн сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

13. МСНЭ, Украйны Сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

14. МСНЭ, Индонезийн цахим хэвлэл мэдээллийн холбоотой хамтран ажиллах хэлэлцээр байгууллаа.  /2019.09.06/

15. МСНЭ, Казахстаны Сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

16. МСНЭ, Кыргызстаны Сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

17. МСНЭ, ОХУ-ын Хэвлэл мэдээллийн Холбоотой хамтран ажиллах хэлэлцээр байгууллаа.  /2019.09.06/

18. МСНЭ, БН Халимаг Улсын Сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

19. МСНЭ, ОХУ-ын Эрхүү мужийн "Байкал" ашгийн бус байгууллагатай хамтран ажиллах хэлэлцээр байгууллаа.  /2019.09.06/

20. МСНЭ, БН Якут (Саха) улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.06/

 21. МСНЭ, Бүгд Найрамдах Болгар улсын Сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

22. МСНЭ, Бүгд Найрамдах  Дагестан  улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

23. МСНЭ, Бүгд Найрамдах  Чечень  улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

24. МСНЭ, Бүгд Найрамдах  Абхази улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

25. МСНЭ, Бүгд Найрамдах  Кабардино-Балкари  улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

26. МСНЭ, Бүгд Найрамдах  Алтай улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

27. МСНЭ, Бүгд Найрамдах  Башкортстан  улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

28. МСНЭ, Бүгд Найрамдах  Тува  улсын сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

29. МСНЭ, Красноярын хязгаар, Челябинск мужийн сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

30. МСНЭ Ханты-Майсийскийн автономит тойрог Юграгийн   сэтгүүлчдийн холбоотой хамтран ажиллах хэлэлцээр байгууллаа.  /2019.09.21-27/

Гадаад харилцааны чиглэлээр хийж, хэрэгжүүлсэн ажлууд

2018.03.06. МСНЭ-ийн төлөөлөл Дэлхийн сэтгүүлчдийн чуулга уулзалтад оролцлоо.

2018.3.23. “Сэтгүүлч ба Элчин сайдууд” уулзалтыг анх удаа зохион байгуулав. Уулзалтад Монгол Улсад суугаа 28 улсын Элчин сайдууд, олон улсын байгууллага, Дипломат төлөөлөгчдийн газрын суурин төлөөлөгчид, 100 гаруй сэтгүүлч, хэвлэл мэдээллийн байгууллагын удирдлагууд оролцлоо.

2018.03.28. БНХАУ-ын ӨМӨЗО-ны Ардын Засгийн Газрын Хэвлэл мэдээллийн албаны урилгаар айлчлал хийлээ.

2018.04.05. МСНЭ-ийн Ерөнхийлөгч Х.Мандахбаяр, Бүгд Найрамдах Чех Улсын Элчин сайд И.Бродски нар хамтын ажиллагааны чиглэлээр албан уулзалт хийв.

2018.04.30. Бүгд Найрамдах Чех Улсын Элчин сайдтай сэтгүүлчдийн зангиагүй уулзалтыг зохион байгуулав.

2018.05.01. Якутын Сэтгүүлчдийн холбооны 20 сэтгүүлч МСНЭ болон Монголын хэвлэл мэдээлэл, сэтгүүл зүйн салбарын шинэ дэвшилтэд хөгжилтэй танилцаж, хэвлэл мэдээллийн редакцуудтай танилцан туршлага судалж, санал солилцсон юм.

2018.05.20-26. БНХАУ-ын Төрийн зөвлөл, хэвлэл мэдээллийн албаны урилгаар МСНЭ, ГХЯ хамтран зохион байгуулан 50 сэтгүүлчдийн хамт БНХАУ-д айлчиллаа.

2018.6-6-13. Өөрчлөлт шинэчлэлт-40 жил "Бүс ба зам" төслийн хүрээнд Хятад Улс дахь аялалд Хятад, Монголын сэтгүүлчдийн хамтарсан баг оролцож, сурвалжилга зохион байгуулав.

2018.6-21-27. БНСУ болон Монгол Улсын сэтгүүлчдийн хамтын ажиллагааны таван жилийн ойгоор БНСУ-ын Сэтгүүлчдийн холбооны Монгол Улс дахь ээлжит айлчлалыг Улаанбаатар хотноо хүлээн авав.

2018.08.02-05. БНСУ-ын Сэтгүүлчдийн холбооны Монгол Улс дахь ээлжит айлчлалаар хамтран ажиллах, олон улсын тавцанд өрсөлдөх чадвар бүхий хэвлэл мэдээллийн байгууллагыг бий болгоход харилцан дэмжлэг үзүүлэх, сэтгүүлч болон контент солилцох зэрэг олон асуудлаар санамж бичигт гарын үсэг зурлаа.

2018.09.06-07. Монгол Хятадын хэвлэл мэдээллийн есдүгээр форумыг Өмнөговь аймгийн Даланзадгад хотод зохион байгуулав.

2018.09.06. Монгол-Орос-Хятадын эдийн засгийн коридор байгуулах санаачилгыг дэмжих зорилгоор МСНЭ-ийн санаачилгаар Монгол-Орос-Хятад гурван улсын хамтарсан Хэвлэл мэдээллийн форум зохион байгуулахаар санал солилцож дэмжигдлээ.

2018.09.10-14. Беларусь Улсын Минск хотноо зохион байгуулагдсан Олон Улсын 13 дахь Медиа Форумд МСНЭ-ийн Ерөнхийлөгч, төлөөллүүд оролцлоо.

2018.09.14. МСНЭ, Беларусын Сэтгүүлчдийн холбоо Хамтран ажиллах санамж бичигт гарын үсэг зурлаа.

2018.10.03-09. БНСУ-ын Сэтгүүлчдийн холбооны урилгаар МСНЭ-ийн удирдлагууд БНСУ-д албан айлчлал хийв. Энэ үеэр МСНЭ Сөүл хотод салбар оффисоо нээв.

2018.10.08-24. “Дэлхийн Монгол Сэтгүүлч” мэргэшсэн сэтгүүлч бэлтгэх үндэсний хөтөлбөрийн дор МСНЭ, ӨМӨЗО-ы Ардын Засгийн газрын Хэвлэл мэдээллийн алба, ӨМӨЗО-ы Багшийн их сургуультай хамтран залуу сэтгүүлчдэд зориулсан сургалтыг Хөх хотноо зохион байгууллаа.

2018.10.11-17. ӨМӨЗО-ы Ардын засгийн газрын хэвлэл мэдээллийн албаны урилгаар МСНЭ-ийн Гүйцэтгэх захирлаар ахлуулсан сэтгүүлчдийн баг БНХАУ-ын Чүнчинь хотод албан айчлал хийлээ.

2018.10.16.  БНСУ-аас Монгол Улсад суугаа ЭСЯ-ны Виз хариуцсан консул, нэгдүгээр нарийн бичгийн дарга ноён Кил Кан Мугтай МСНЭ-ийн дарга Х.Мандахбаяр, дэд ерөнхийлөгч Х.Батхишиг нар уулзлаа. Тус уулзалтаар сэтгүүлчдэд БНСУ-ын олон удаагийн визний журам болон асуудлаар санал солилцож, сэтгүүлчийн олон удаагийн визийг олгож эхлэв.

2018.11.05-09. МСНЭ, БНСУ-аас Монгол Улсад суугаа Элчин сайдын яам хамтын ажиллагааны хүрээнд МСНЭ-ийн УЗ-ийн гишүүн Д.Бямбацэцэгээр ахлуулсан 10 хүний бүрэлдэхүүнтэй сэтгүүлчдийн баг БНСУ-тай танилцах, сурвалжлах зорилгоор айлчлал хийлээ.

2018.11.14. МСНЭ-ийн Ерөнхийлөгч Х.Мандахбаяр Оросын Сэтгүүлчдийн холбооны урилгаар албан айлчлал хийж,  Москва хотноо МСНЭ Оросын Сэтгүүлчдийн холбоо хамтран ажиллах хэлэлцээр байгууллаа.

2018.11.16. Оросын Сэтгүүлчдийн холбооны 100 жилийн ойд МСНЭ-ийн Ерөнхийлөгч Х.Мандахбаяр мэндчилгээ дэвшүүллээ.

2018.12.24. БНСУ-аас Монгол Улсад суугаа Онц бөгөөд Бүрэн эрхт Элчин сайд Жон Жэ Намын урилгаар МСНЭ-ийн Ерөнхийлөгч Х.Мандахбаяр тэргүүтэй сэтгүүлчид санал солилцох чөлөөт уулзалт зохион байгууллаа.

2019.02.25. Бельгийн нийслэл Брюссель дэх Олон улсын сэтгүүлчдийн холбооны /ОУСХ/ төв оффист Гадаад харилцааны жилийн нээлтээ хийлээ.

2019.02.26. Москва хотноо Оросын Сэтгүүлчдийн холбооны төв оффист албан ёсны уулзалт хийв.

2019.02.28. Бельгийн Хаант Улсад Монгол Улсаас суугаа Онц бөгөөд Бүрэн эрхт Элчин сайд О.Очтой уулзаж, МСНЭ-ийн гадаад харилцааны зорилтыг танилцууллаа. Европын холбооны хэвлэл мэдээллийн албаар дамжуулан олон талт харилцааг хөгжүүлэхэд Элчин сайд туслалцаа үзүүлэхээ мэдэгдэв.

2019.03.01. Олон Улсын Сэтгүүлчдийн Холбооны /IFJ/ төв оффист зочилж Ерөнхий нарийн бичгийн дарга Энтони Беланжертай албан уулзалт хийв. Уулзалтаар Тунис Улсад болох ОУСХ-ны ээлжит конгресст МСНЭ таван мандатын эрх авав.

2019.03.07. "Элчин сайд нар ба сэтгүүлчид" уулзалтаа ГХЯ-тай хамтран хоёр дахь удаагаа амжилттай зохион байгуулж, “Медиа Тур 2019” төслийн нээлт хийлээ.

2019.03.22. "Медиа Тур 2019" төслийн хүрээнд Бүгд Найрамдах Ардчилсан Солонгос Ард Улс, Бүгд Найрамдах Казахстан Улс, Бүгд Найрамдах Чех Улсын Элчин сайдуудтай албан уулзалт хийв.

2019.03.24. Сөүл хотноо болсон Дэлхийн сэтгүүлчдийн бага хуралд МСНЭ-ийн Ерөнхийлөгч Х.Мандахбаяр, МСНЭ-ийн гадаад харилцааны зөвлөх Я.Индра, “gogo.mn” сайтын Ерөнхий редактор О.Ариунбилэг нар оролцож, МСНЭ-ийн Ерөнхийлөгч тус бага хуралд анх удаа илтгэл тавилаа. Мөн Ази номхон далайн бүсийн орнуудын сэтгүүлчдийн холбоо байгуулах санаачлагчдын бүлэгт МСНЭ багтсан юм.

2019.04.11-18. МСНЭ-ээс санаачилсан “Медиа Тур 2019” төсөл болон Монгол-Хятад хоёр улсын хооронд найрамдалт харилцаа тогтоосны 70 жилийн ойн хүрээнд хэрэгжүүлж буй “70 жилийн гэрч” хоёр улсын хамтарсан сурвалжилгыг ӨМӨЗО-ы Хөх хот, Ордос, Янь-Аньд зохион байгууллаа.

2019.04.16-20. "Азийн соёл, иргэншлийн хурал"-д гүйцэтгэх захирал Э.Болортулга оролцов.

2019.04.25. Эгнээндээ 82 орныг нэгтгэсэн “Бүс ба зам” мэдээллийн сүлжээ Олон улсын сэтгүүл зүйн байгууллагын Удирдах зөвлөлд МСНЭ-ийн Ерөнхийлөгч Х.Мандахбаяр сонгогдлоо.

2019.05.14. МСНЭ-ийн санаачилгаар БНТУ-аас Монгол Улсад суугаа Онц бөгөөд Бүрэн эрхт Элчин сайд М.Ахмет Язал Монголын сэтгүүлчидтэй зангиагүй уулзалт хийлээ.

2019.05.23-05.30. “70 жилийн гэрч” сурвалжилгын цуврал аяллыг зохион байгуулав. Уг аяллаар ӨМӨЗО-ы Баяннуур, Үхай, Алшаа, Иньчуаньд Монголын 19 сэтгүүлч, ӨМӨЗО-ын найман сэтгүүлчдээс бүрдсэн баг сурвалжилга хийв.

2019.06.14. Бүгд Найрамдах Тунис Улсад болсон Олон Улсын Сэтгүүлчдийн Холбооны /IFJ/ ХХХ Их хуралд МСНЭ-ийн зургаан хүний бүрэлдэхүүнтэй баг оролцов. Хурлын үеэр Ази номхон далайн орнуудын бүс нутаг хариуцсан зөвлөхөөр МСНЭ-ийн Ерөнхийлөгч Х.Мандахбаяр анх удаа, Жендерийн хорооны Удирдах зөвлөлийн гишүүнээр МСНЭ-ийн Хяналтын зөвлөлийн гишүүн С.Алтанцэцэг хоёр дахь удаагаа улиран сонгогдсон юм.

2019.06.14. Тунист болсон Олон Улсын Сэтгүүлчдийн Холбооны /IFJ/ ХХХ Их хурлын үеэр МСНЭ Энэтхэгийн Сэтгүүлчдийн холбоо, Арабын Нэгдсэн Эмиратын Сэтгүүлчдийн холбоо, Африк тивийн болон Суданы Сэтгүүлчдийн холбоо, Тунисын Сэтгүүлчдийн холбоотой хамтын ажиллагааны хэлэлцээр байгууллаа.

2019.06.20. МСНЭ-ээс  БНСУ-д суугаа Монголын сэтгүүлчдийн төлөөллүүдтэй уулзаж БНСУ дахь салбар зөвлөл байгуулах талаар хэлэлцэж МСНЭ-ийн гадаад орон дахь анхны салбар зөвлөлөө байгууллаа.

2019.06.21. МСНЭ, БНСУ-ын Сэтгүүлчдийн холбоо хамтран хоёр улсын сэтгүүлчдийн хамтарсан анхдугаар форумыг Улаанбаатар хотноо зохион байгуулав. Форумд хоёр орны сэтгүүл зүйн хамтын ажиллагаа, сошиал орчин дахь хуурамч мэдээлэлтэй тэмцэх (Fact check), дижитал эрин дэх сэтгүүлзүйн ирээдүйн талаар хэлэлцсэн юм. Форумд Солонгосын 25 сэтгүүлч, хэвлэлийн төлөөлөгчид ирсэн ба Монголын хэвлэл мэдээллийн салбарын 75 төлөөлөгч нийт 100 гаруй сэтгүүлчид оролцов.

2019.06.26-28. МСНЭ, Бүх Хятадын Сэтгүүлчдийн холбоо хоорондын хамтын ажиллагааны хүрээнд Бүх Хятадын Сэтгүүлчдийн холбооны төлөөлөл Монгол Улсад ажлын айлчлал хийлээ.

2019.07.02-07. Монгол, Хятадын хэвлэл мэдээллийн Х форум ӨМӨЗО-ы Ордос хотод зохион байгуулагдлаа. Энэ удаагийн форумд Монголын талаас төрийн байгууллага, хэвлэл мэдээллийн салбарын нийт 50 сэтгүүлчдээс бүрдсэн баг оролцлоо.

2019.07.08-14. Монгол, Хятад хоёр улсын Засгийн газар хоорондын хэлэлцээрийн дагуу БНХАУ-ын Төрийн зөвлөл, хэвлэл мэдээллийн албаны урилгаар Монгол Улсын сэтгүүлчид Бээжин, Ганьсу, Жючюань хотод ажиллаж газар тариалангийн бүс нутагтай танилцав.

2019.07.09. Монгол Улсын Гадаад харилцааны яам, МСНЭ-ийн удирдлагууд болон сэтгүүлчдийн төлөөлөл Зүүн Ази-Латин Америкийн сэтгүүлчидтэй дугуй ширээний уулзалт хийлээ.

2019.09.06  МСНЭ-ийн Ерөнхийлөгчийн хувийн урилга, зардлаар 14 улсын 32 сэтгүүлч, сэтгүүлчдийн байгууллагын удирдлагууд Монгол Улсад зочлов. Энэ үеэр МСНЭ нь Польшийн хэвлэл мэдээллийн холбоо, Арабын сэтгүүлчдийн холбоо, Африкийн сэтгүүлчдийн холбоо, Украйны Сэтгүүлчдийн холбоо, Индонезийн цахим хэвлэл мэдээллийн холбоо, Казахстаны Сэтгүүлчдийн холбоо, Кыргызстаны Сэтгүүлчдийн холбоо, ОХУ-ын Хэвлэл мэдээллийн Холбоо, БН Халимаг Улсын Сэтгүүлчдийн холбоо, ОХУ-ын Эрхүү мужийн "Байкал" ашгийн бус байгууллага, БН Якут (Саха) улсын сэтгүүлчдийн холбоо зэрэг 10 улстай хамтын ажиллагааны гэрээ байгууллаа.

2019.09.21-27. ОХУ-ын Сэтгүүлчдийн холбооноос зохион байгуулсан Орчин үеийн сэтгүүл зүйн “Вся Россия-2019” XXIII форумд МСНЭ-ийн Удирдах зөвлөлийн гишүүн, доктор М.Зулькафиль, төлөөллүүд оролцлоо. Энэ үеэр МСНЭ нь Бүгд Найрамдах Болгар Улсын Сэтгүүлчдийн холбоо болон ОХУ-ын харьяа Бүгд Найрамдах улс болох Дагестан, Чечень, Абхази, Кабардино-Балкари, Алтай, Башкортстан, Якут (САХА), Тува болон Красноярын хязгаар, Челябинск муж, Ханты-Майсийскийн автономит тойрог Юграгийн Сэтгүүлчдийн холбоо зэрэг 12 сэтгүүлчдийн байгууллагатай хамтын ажиллагааны гэрээ байгуулав.

 

Дэлгэрэнгүй унших
сурталчилгаа
Монгол Улсын Их Хурлын 2020 оны сонгуулийн санал хураалт дуусах хүртэл сайтын сэтгэгдэл бичих талбарыг түр хаасан тул хүлцэл өчье. SHUDARGA.MN сайтын редакц

Үзэл бодол

Ерөнхий сайд У.Хүрэлсүхийн УИХ-ын чуулганы нэгдсэн хуралдаанд хэлсэн үг

Огноо:

,

Монгол Улсын Ерөнхий сайд Ухнаагийн Хүрэлсүхийн Улсын Их Хурлын чуулганы өнөөдрийн /2020.07.02/ нэгдсэн хуралдаанд хэлсэн үгийг бүрэн эхээр нь хүргэж байна.

Манай улсын ард иргэд ээ!

Эрхэм хүндэт Монгол Улсын Ерөнхийлөгч өө!

Улсын Их Хурлын дарга, эрхэм гишүүд ээ!

Та бид туурга тусгаар улсынхаа төрийн эрх барих дээд байгууллага Улсын Их Хурлыг амжилттай сонгон байгуулж чадлаа.

Улсынхаа Ерөнхий сайдыг багаар нь дэмжиж, хийж бүтээж буй бүтээн байгуулалтын ажил, шударга ёсны төлөө тэмцлийг нь тууштай үргэлжлүүлэх нь зүйтэй хэмээн үзэж, дэмжин сонгосон ард түмэндээ чин сэтгэлийн талархал илэрхийлье.

Надад дахин итгэл үзүүлж, Монгол Улсын Ерөнхий сайдын нэр хүндтэй, хариуцлагатай албанд томилсон Монгол Улсын Их Хурал, нэр дэвшүүлсэн  Монгол Ардын Намын журмын нөхдөдөө дахин талархал илэрхийлье. 

Одоо Та бидэнд ард түмнийхээ итгэл найдварыг хичээл зүтгэлээр хариулах үлдлээ.

Сонгуулийн ялалт маань сонгуулийн хариуцлагаар солигдож байна.

Энэ удаагийн сонгууль улс төрийн намуудын өрсөлдөөн гэхээсээ илүүтэй улс төр бизнесийн бүлэглэл ялах уу?, шударга ёсыг хүсэмжилсэн ард түмэн ялах уу? гэсэн нэн амаргүй тэмцлийн дунд өрнөлөө. 

 Манай ард түмэн төр барих дээд эрхээ эдэлж, задарсныг засагладаг, ядарсныг хайрладаг төртэй байх сонголтыг хийлээ.

Сонгогч олон маань өнгө мөнгө, хоосон амлалт, улс төрийн хийрхэлд авталгүй, хийсэн бодит ажил, бүтээсэн үр дүн, хөгжлийн бодлого, тууштай зарчим, ёс зүй, шударга ёсыг үнэлдэг болсон гэдгээ дахин нотлон харууллаа.

Монголын ард түмэн тогтвортой улс төр, тогтвортой төр засагтай байх нь улс орны хөгжил дэвшил, үндэсний аюулгүй байдал, ард түмний амьдралд илүү чухал гэж үзэж байгаа нь энэ сонголтоос тод харагдаж байна.

Гадаад талд ч энэ нөхцөл байдал бас мэдрэгдэж байна. Сонгуулийн маргааш гэхэд л олон улсын зах зээл дээр манай улсын хувьцааны үнэ ханш өссөн нь төр засаг, төрийн бодлого тогтвортой байхын чухлыг нотлон харуулж байна. 

Энэхүү сонгууль нь Ардын Хувьсгалын 100 жил, Ардын Намын 100 жилийн ойн өмнө тохиож байгаагаараа түүхэн онцлогтой юм.

Энэхүү түүхт ойн босгон дээр Монгол Ардын Нам парламентын сонгуульд үнэмлэхүй ялалт байгуулсан нь Монголын ард түмэн Ардын намд өндөр итгэл найдвар үзүүлж, үүрэг хариуцлага үүрүүлж байна гэдгийг бид бүхэн гүнээ ухамсарлаж байна.

Монгол хэмээх улсын тулах хоёр баганын нэг нь Ардын нам гэвэл нөгөө нь Ардчилсан нам гэж би боддог. Амжилт ололт, алдаа дутагдалтай ч ардчилсан өөрчлөлтийн 30 жилийн түүхийг бид хамтдаа бүтээсэн. Цаашид ч манай хоёр намын харилцан ойлголцол, хамтын ажиллагаанаас Монгол Улсын ирээдүйн хувь заяа ихээхэн шалтгаална гэдгийг тэмдэглэн хэлэхийг хүсэж байна.

Ирэх 30 жилд үндэсний язгуур эрх ашгийг дээдлэн, эв нэгдлийг эрхэмлэн Монгол Улсынхаа хөгжил, дэвшлийн төлөө намууд нь зөв бодлоготой, улс төрчид нь зөв сэтгэлтэй, сахилга хариуцлагатай, ёс зүйтэй байж, хамтдаа хүчин зүтгэхийг Ууган намын дарга, Улсын Ерөнхий сайдын хувьд бүх улс төрийн нам, хүчнүүдэд уриалж байна.

Улсын Их Хурлын эрхэм гишүүд ээ!

Дэлхий нийтийг хамарсан аюулт өвчин, цар тахал, түүнээс улбаалсан нийгэм, эдийн засгийн хүндрэл, давагдашгүй хүчин зүйлүүд, ирэх 4 жилд төлөгдөх Мазаалай, Чингис, Гэрэгэ, Хуралдай зэрэг бондын 2.9 тэрбум ам.долларын өр болон бусад шийдлээ хүлээсэн олон арван асуудал, хүндрэл бэрхшээлүүд Та биднийг тосон хүлээж байна.

Шинэ Засгийн газар хүндхэн цаг үед хүнд ачааг үүрч ажиллах болно гэдгийг ч бид мэдэрч байна. Бид амаргүй он жилүүдийг хохирол багатай даван туулж, улс орныхоо эдийн засгийг хөл дээр нь босгох зайлшгүй шаардлагатай байна.

Энэ бүгдийг нарийн тооцоолж, Засгийн газрын үйл ажиллагааны мөрийн хөтөлбөрт тусган та бүхнээр хэлэлцүүлэх болно.

Шинэ Засгийн газрын ирэх дөрвөн жилийн мөрийн хөтөлбөр бол “Алсын хараа-2050” Монгол Улсын ирэх 30 жилийн хөгжлийн бодлогын эхний дөрвөн жилийн зорилт, төлөвлөлт байх болно.

Ирэх дөрвөн жилд хэрэгжүүлэх дөрвөн томоохон зорилтын талаар онцлон хэлье.

Нэг. Импортлогч улсаас экспортлогч улс болцгооё!

Монгол Улсын эдийн засаг өрийн дарамтгүй, өрсөлдөх чадвартай, бүс нутгийн худалдааны идэвхтэй оролцогч болох арга зам бол экспортыг нэмэгдүүлэх явдал юм.

Ирэх дөрвөн жилд Тавантолгой-Гашуунсухайт, Тавантолгой-Зүүнбаян чиглэлийн төмөр замыг барьж дуусган, уул уурхайн томоохон төслүүдийг дэд бүтцээр холбож, боловсруулах үйлдвэрүүд байгуулахын зэрэгцээ, Үндэсний баялгийн сангаар дамжуулан эдийн засгаа бодитой тэлэх явдал чухал байна.

Монголчууд бидний олон арван жилийн хүсэл мөрөөдөл байсан газрын тос боловсруулах үйлдвэрийг ашиглалтад оруулснаар, долларын урсгалыг дотооддоо шингээж, Дэлхийн зах зээл дээрх нефьтийн үнэ ханшны савалгаанд автахгүй байх, улсынхаа шатахууны хэрэгцээг хангаж, эдийн засгийн өсөлтийг нэмэгдүүлэх боломж бүрдүүлнэ.

Үүний зэрэгцээ улс орныхоо эрчим хүчний хэрэгцээг дотооддоо хангах томоохон зорилтыг дэвшүүлж байна. Энэ ажлын хүрээнд Таван толгойн цахилгаан станц, Эрдэнэбүрэнгийн усан цахилгаан станцыг шинээр барих бөгөөд эрчим хүчний эх үүсвэрүүдийн хүчин чадлыг нэмэгдүүлэх арга хэмжээг авч хэрэгжүүлнэ.

Мөн ОХУ, Монгол, БНХАУ-ыг холбосон байгалийн хийн хоолой барих ажил эхэллээ. Бүс нутгийн энэхүү томоохон бүтээн байгуулалтын ажил нь манай улсын эдийн засагт өндөр ач холбогдолтой төсөл байхын зэрэгцээ мөнхийн хоёр хөрштөйгөө эдийн засгийн хамтын ажиллагааны бас нэгэн шинэ хуудсыг нээн хамтын ажиллагааны интеграцид орж байна.

Үндэсний аж үйлдвэрийн сэргэлтийг бодлогоор дэмжиж, уул уурхай, хүнс хөдөө аж ахуй, органик хүнсний үйлдвэрлэл, эрчим хүч, аялал жуулчлал, бүтээлч үйлдвэрлэл, мэдээлэл технологи, тээвэр логистик зэрэг салбаруудыг тэргүүлэх салбар болгон хөгжүүлж, төр хувийн хэвшлийн идэвхтэй түншлэлийг бэхжүүлэх болно.  Нэн ялангуяа хөдөө аж ахуй, газар тариаланг дэмжиж, хүнсний хэрэгцээгээ дотоодоосоо ханган, хүнс экспортлогч орон болох зорилтыг дэвшүүлэн ажиллаж байна.

Худалдаа, хөрөнгө оруулалтын орчныг илүү таатай болгоход чиглэсэн, гадаад дотоодын хөрөнгө оруулалтыг тууштай нэмэгдүүлэхийн зэрэгцээ үндэсний үйлдвэрлэгч, баялаг бүтээгчдээ бүх талаар дэмжин төр хувийн хэвшлийн түншлэл, хамтын ажиллагааг шинэ түвшинд гаргах шаардлагатай байна.

Эдгээр арга хэмжээнүүдийг авч хэрэгжүүлсний үр дүнд олон мянган ажлын байр шинээр бий болж ажилгүйдэл, ядуурал зохих түвшинд буурна.

Хоёр. Нийгэмд шударга ёсыг тогтоож, Цахим Монгол болцгооё!

Миний бие сонгуулийн үеэр Эх орныхоо 20 аймаг, нийслэл хотын 9 дүүрэгт ажиллаж, 100 гаруй мянган иргэдтэй уулзахад хамгийн ихээр хүсэмжилж буй зүйл нь нийгэмд шударга ёс тогтоох асуудал байлаа.

Улаанбаатарын утаа манан сарниж байгаатай адил улс төрийн манан ч сарниж эхэллээ. Нам дамжсан улс төр, бизнесийн олигархи бүлэглэлүүдтэй бид тэмцэж байна.

Энэ бол ард түмний захиалга. Энэ бол Монгол Улсын аюулгүй байдал. Энэ бол Монгол Улсын тусгаар тогтнол. Энэ бол шударга ёсны төлөөх тэмцэл юм.

Шударга сайхан нийгэмд амьдрахыг ард түмэн маань хүсэж байна. Тэд ард түмнээ алагчилдаггүй, баян хоосноор нь ялгаварладаггүй, хууль дүрэм нь хэрэгждэг төр засагтай байхыг хүсэж байна.

Ард түмэн маань эх орныхоо баялагт эзэн болж, эх орондоо эзэн байхыг хүсэж байна. Тэд ирээдүй, үр хүүхдэдээ сайхан Монгол орон үлдээхийг хүсэж байна.

Энэ хүсэлтийг биелүүлэх нь Монгол төрийн эрхэм үүрэг юм.

Миний бие анх Ерөнхий сайд болохдоо “Би намаа цэвэрлэнэ, төрөө цэвэрлэнэ” гэж хэлж байсан. Энэ амлалт ажил хэрэг болж байгааг ард түмэн маань харж байгаа.

Монгол Улсыг хуульгүй мэт авирлаж байгаа этгээдүүдэд хууль байгаа, төр засаг байгаа, ард түмэн байгаа гэдгийг цаашид ч мэдрүүлэх болно.

Монгол төр шударга бусын өмнө толгой гудайлгах учиргүй. Өвөг дээдсийн маань халуун амь, бүлээн цусаар дархлагдсан Монгол төрийн алтан сүлд өнгө мөнгөний сүрэнд бүдгэрэх ёсгүй.

Цаашид нийгэмд шударга ёсыг бэхжүүлэх, төрийн албаны бүх шатанд сахилга хариуцлага, дэг журмыг тогтооход онцгойлон анхаарч ажиллах болно.

Нэн ялангуяа ард иргэдийг ихээхэн бухимдуулж байгаа дунд, доод шатны хүнд суртал, хууль, хүчний байгууллагынхан, авилга албан тушаалын гэмт этгээдүүдтэй төрийн хуулийн хүрээнд хатуу тэмцэж ажиллана.

Харин хуулиа дээдэлж, ёс зүйг эрхэмлэн шударгаар ажиллаж буй төрийн албан хаагчдаа Монголын төр бүх талаар дэмжиж, хамгаалан ажиллах болно гэдгээ хэлье.  

Цаашид бид задарсныг засагладаг, ядарсныг хайрладаг төртэй байх ёстой. Энэ төр бол Монгол төр юм.

Улс орны хөгжлийн гол асуудлын нэг бол мэдээлэл технологи, харилцаа холбооны салбарын хөгжлийг түргэтгэх явдал юм.

Энэ салбарт Засгийн газар онцгой анхаарал хандуулан ажиллах болно.

Энэ ажлын хүрээнд иргэдэд хүргэх төрийн үйлчилгээг цахимд шилжүүлэх ажлыг Засгийн газрын эхний 100 хоногт багтаан эхлүүлнэ.

Гурав. Иргэдийнхээ амьдралын чанарыг дээшлүүлж, дундаж давхаргаа тэлье!

Бид уул уурхай, байшин барилга, хөрөнгө мөнгө ярьсаар байгаад хүний хөгжлийн асуудал, ард түмнээ соён гэгээрүүлэх ажлыг орхигдуулсан тал бий.

Тийм учраас манай Засгийн газрын бодлогын гол цөм нь монгол хүн, монгол гэр бүлийн хөгжил байх болно.

Залуу гэр бүлүүд банкны өндөр зээлийн хүүд дарлуулж, орон сууцтай болохын төлөө залуу насаа бүхэлд нь зориулж байна. Эдийн засаг өссөн ч амьдралын чанар сайжрахгүй ирсэн гол шалтгаан ч үүнтэй холбоотой.

Цаашид бид орлогод нийцсэн орон сууцны хорооллууд, түрээсийн байруудыг бүсчлэн байгуулах ажлыг эхлүүлнэ.

Хуримтлалын нэгдсэн сангийн тогтолцоонд шилжиж, орон сууцны дэмжлэг, эрүүл мэндийн даатгал, боловсролын тэтгэлэг болон тэтгэвэр, тэтгэмжийн асуудлыг нэг сангаас шийдвэрлэнэ.

Нийгмийн хамгаалал, халамжийн бодлогоо илүү оновчтойгоор хэрэгжүүлж, нийгмийн суурь үйлчилгээг тэгш, хүртээмжтэй болгоно. Мөн 200 сургууль, 273 цэцэрлэг шинээр барьж, чанартай боловсролыг үр хүүхдэдээ олгож, эцэг эхчүүдийн хөдөлмөр эрхлэх боломжийг бүрдүүлнэ.   

Иргэдээ жил бүр эрүүл мэндийн оношилгоонд хамрагдах үндэсний оношилгооны тогтолцоог нэвтрүүлнэ.

Эрүүл мэнд, боловсролын шинэчлэл, өөрчлөлтийн үр шимийг монгол хүн бүр хүртэх ёстой. Улсын төсвийн хөрөнгө оруулалтыг энэ хоёр салбарт түлхүү чиглүүлэх болно.

Банк санхүүгийн системийн шинэчлэлийг гүнзгийрүүлж, банкны эздийн монополийг задалж, зээлийн хүүг сарын нэг хувьд хүргэх шат дараатай арга хэмжээ авна. Зээлийн хүү буурч, хүртээмж нэмэгдэх нь ард иргэдээ зээлийн дарамтаас ангижруулж, хийж бүтээе гэсэн иргэдээ дэмжиж байгаа төрийн дэмжлэг юм.

“Иргэд нь ажилтай, орлоготой, орон сууцтай болж, амьдралын чанар дээшилснээр нийгэм тогтвортой байна” гэж би боддог. Улс төр, нийгмийн тогтвортой байдал нь улс орон хөгжихийн үндэс юм.

Үндэсний их өв соёл, төрт ёс, түүхэн уламжлал, ёс заншил зэрэг үндэсний үнэт зүйлсээ эрхэмлэн хамгаалах, сурталчлан таниулах, өсвөр үеэ эх оронч үзлээр төлөвшүүлэн хүмүүжүүлэх, дэлхийн соёл иргэншилтэй хөл нийлүүлэн хөгжих, төрөөс соёл урлагийн талаар баримтлах бодлого, соён гэгээрүүлэх ажлыг хэрэгжүүлэх зорилгоор Соёлын яамыг бие даалган байгуулна.

Энэ бодлогынхоо хүрээнд Их эзэн Чингис хааны музей, Байгалийн түүхийн музей, Үндэсний урлагийн их театр, Төв номын сан зэрэг түүх, соёлын салбарт эхлүүлсэн бүтээн байгуулалтын ажлаа бүрэн дуусгана.

Залуучууд чөлөөт цагаа зөв боловсон өнгөрөөх, Эрүүл мэндээ хамгаалах, бие бялдараа хөгжүүлэхэд дэмжлэг үзүүлэн биеийн тамир спортын ордон, фитнес клубуудыг барьж байгуулах ажлыг төр хувийн хэвшилтэй хамтран хэрэгжүүлэх болно.

Дөрөв. Хот, хөдөөгийн хөгжлийн зохист харьцааг хангацгаая!

1990 оноос хойш төв рүү чиглэсэн их нүүдэл эхэлж, Улаанбаатар хотын хүн ам гурав дахин нэмэгдсэн. Үүнээс үүдэн гэр хороолол тэлж, агаар орчин, хөрсний бохирдол нэмэгдэж, замын түгжрэл ихэссэн зэрэг олон хүндрэл бэрхшээл, зовлонтой бид нүүр тулж байна.

Бид өнгөрсөн нэг жилийн хугацаанд Улаанбаатар хотын агаарын бохирдлыг 50 хувь бууруулж чадсан, цаашид 80 хувь хүртэл бууруулна. Мөн аймгийн төв, томоохон суурин газруудын агаарын бохирдлыг үе шаттайгаар бууруулахаар төлөвлөж байна.

Хариуцлагагүй уул уурхайг эмхэлж цэгцлэх ажил эхэлж, байгаль эхийн нуруу амарч өнгө төрх сэргэж байна.

Энэ ажлыг цаашид улам эрчимжүүлж, байгаль дэлхийгээ хамгаалах, нөхөн сэргээх, хариуцлагагүй уул уурхайг таслан зогсооход чиглэсэн арга хэмжээг тууштай авч хэрэгжүүлнэ.

Малчин түмэн, таван хошуу мал бол монгол ахуй, монгол оршихуйн үндэс юм. Тиймээс малчдын талаар баримтлах төрийн бодлогыг хэрэгжүүлэхэд онцгойлон анхаарах болно.

Орон нутгийн дэд бүтцийг сайжруулж, малын түүхий эд боловсруулах аж үйлдвэрийн цогцолборыг байгуулна. Бэлчээрийн менежментийг сайжруулж, усжуулалтын асуудлыг шийдвэрлэнэ.

Төвлөрлийг сааруулах тогтолцоог бий болгож, нийслэлийн дагуул хотууд байгуулж, хөдөөгийн хөгжлийг дэмжсэн санхүү, татварын бодлого хэрэгжүүлэх ажлаа улам гүнзгийрүүлэх болно.

Нүүдэлчдийн болон суурин соёл иргэншил зэрэгцэн оршиж буй өнөөгийн цаг үед хот, хөдөөгийн хөгжлийн зохист харьцааг хангах нь манай улсын хөгжлийн тэргүүлэх зорилтын нэг байх болно.

Эрхэм гишүүд ээ!

Сонгогч түмнийхээ өргөн дэмжлэгийг өнөөдрөөс эхлэн өндөр хариуцлага хэмээн ухамсарлан зүтгэцгээе.

Бид ард түмнийхээ итгэлийг зүтгэлээр хариулах учиртай. Манай Засгийн газар дэвшүүлсэн мөрийн хөтөлбөрөө хэрэгжүүлэхийн зэрэгцээ ёс зүйтэй, сахилга хариуцлагатай ард түмнээ гэсэн сэтгэл зүрхтэй ажиллах болно.

“Төрийн минь сүлд өршөө” гэж сүсэглэн залбирдаг ард түмний үр сад бид Монгол төрийн босгыг өндөр байлгах учиртай.

Би Монгол Улсын Ерөнхий сайдын хувьд Засгийн газрын гишүүн сайд нартаа өргөсөн тангарагтаа үнэнч, сахилга хариуцлагатай, шударга ажиллахыг хатуу шаардаж бас хариуцлага тооцон ажиллах болно.

Эх орон маань хөгжил дэвшлийнхээ гараан дээр зогсож байна. Ард түмэн маань шударга ёсны төлөө тэмцэж, хүн ардын маань итгэл найдвар сэргэж байна. Сайн сайхан амьдралд хүрэхийн төлөө та бид алхам алхмаар урагшилж байна.

Ирэх дөрвөн жил бол Монголчууд бидний хувьд хийж эхэлсэн ажлаа дуусгасан, амжилт бүтээлээ бататгасан, алдаа дутагдлаа зассан, эдийн засгаа өсгөсөн, ажилгүйдэл ядуурлыг бууруулсан, ажлын байрыг нэмэгдүүлсэн, эрх чөлөө шударга ёсыг бэхжүүлсэн шинэ сэргэлтийн он жилүүд байх болно.

Эхлүүлсэн тэмцлээ үргэлжлүүлж, эхэлсэн ажлаа дуусгахад бидэнд цаг хугацаа олгосон ард түмэндээ гүн талархал илэрхийлье. Бид бүхэн хичээн зүтгэж ажиллах болно.

Монгол түмнийг минь буурал дээдсийн цог хийморь тэтгэж,

Бурхан халдун хайрханы ноён оргил мөнхөд ивээх болтугай.

Та бүхэндээ баярлалаа.

Монгол Улсын төлөө зүтгэе!!!

Дэлгэрэнгүй унших

Үзэл бодол

Х.Амарсайхан: Цагдаагийн машин таараагүй бол хүү минь амиа алдах байсан

Огноо:

,

Зээ хүүгийнх нь амь нас дээсэн дөрөөн дээр дэнжгэнэж, замын түгжрэлд орж саатаж, яарч байсан эгзэгтэй үед цагдаагийн албан хаагч нар таарснаар амийг нь аварсан тухай Чингэлтэй дүүргийн 12-р хорооны иргэн Х.Амарсайхан бидэнтэй талархсан сэтгэгдлээ хуваалцлаа.

-Тэр өдөр яг  ямар үйл явдал болсон бэ? Зээ хүүгийн тань биеийн байдал ямар байна вэ?

-2020 оны 06 дугаар сарын 19-ний өглөө зээ хүү минь санамсар болгоомжгүйн улмаас тагтнаасаа юм авах гэж байгаад хагарсан хамгаалалтын шилэнд баруун гарын судсаа зүссэнээс болж цус их хэмжээгээр алдаж, яаран эмнэлэг явж байсан юм. Ажлын өглөө байсан болохоор зам түгжрээ ихтэй, яах аргаа мэдэхгүй сандарч, хүүгийн минь гарнаас цус алдан тогтохгүй, ёстой л дээшээ тэнгэр хол, доошоо газар хатуу мэт санагдаж байх үед “УАЗ Пургон” машинтай цагдаагийн алба хаагч нар таарсан.

Биднийг тусламж хүсэхэд найрсгаар машиндаа суулгаад шууд л дуут дохиогоо асаан, эмнэлгийн анхны тусламжийг үзүүлэн цаг алдалгүй “Гэмтэл Согог Судлалын Үндэсний Төв”-д хүргэж өгсөн. Үнэхээр тэр үед хүүгийн минь амь нас хэдхэн секундээр  хэмжигдэж байсан юм. Маш их цус алдсан учраас дусал хийлгэх, шарлага, боолт хийлгэхээс эхлээд эмчилгээ хийгдсэн, одоогоор биеийн байдал дунд зэрэг байна.

-Та бүхэнд яаралтай тусламж үзүүлсэн  алба хаагчдын тухай яривал?

-Өргөсөн тангарагтаа үнэнч залуустаа дахин дахин талархаж байна. Эргүүл хамгаалалтын газрын алба хаагч нар болох цагдаагийн дэд ахлагч Д.Болортуяа, цагдаагийн ахлагч Б.Баттогтох, цагдаагийн ахлагч цагдаа жолооч С.Тэгшбаатар нар болохыг хожим сураглаж байгаад  л мэдлээ. Мөн тэр үед тэд ажлын үүрэг авчихсан яарч явсан гэдгийг сүүлд нь мэдсэн. Дуут дохиогоо асаан маш шуурхай явж хүүг минь аварсан. Машинд явж байх үед анхны тусламж үзүүлэн, сандарч балмагдсан ээжийг нь хүртэл тайвшруулж сэтгэлийн дэм өгч байсан нь цагдаагийн алба хаагч нар иргэдэд тохиолддог гэнэтийн асуудалд албаны бэлэн байдал талаасаа болон сэтгэлзүйн хувьд хэр бэлтгэгдсэн бэ гэдгийг мэдэж авч маш их бахархсан.

-Эмнэлэгт ирэх үед хүүгийн биеийн байдал ямар байв?

-Эмч нар хэлэхдээ “Цаг алдалгүй маш түргэн ирсэн нь хүүхдийн амь насанд аюул, эрсдэл учрахаас хамгаалсан” гэсэн. Миний зээ хүү хөгжмийн сургуульд суралцдаг. Үнэхээр цаг алдалгүй эмнэлгийн тусламж авч чадсанд нь хязгааргүй их баярлаж байна. Тэдгээр алба хаагч нар бидэнд тусалж, яаралтай арга хэмжээ авснаар нэг монгол хүүгийн ирээдүй, авьяас чадварыг нь гэрэлтүүллээ. Эмч, цагдаагийн алба хаагч нартаа талархаад баршгүй. Цагдаа нар маань хүргээд өгөхөд эмч нар маань яаралтай тусламжаа үзүүлчихлээ. Одоо зээ хүүгээ бүрэн эдгэрэхийг л хүлээж байна.

-Энэ үйл явдлын дараа дуут дохиогоо асаагаад явж байгаа эмнэлэг болон цагдаагийн автомашиныг харахад танд юу бодогдож байна вэ?

-Манай гэр бүл үүнийг биеэрээ мэдэрч, ойлголоо. Дуут дохиогоо асаагаад явж байгаа эмнэлэг, гал команд, цагдаагийн байгууллагын машинд зам тавих хэрэгтэй. Дотор нь яарсан, тэвдсэн хүмүүс л хайртай хүнээ энэ амьдралд авч үлдэх үү гэдэг хэдхэн хормоор яригддаг юм байна. Хэрвээ тэгэхэд цагдаагийн машин таараагүй бол гэж бодохоор аймшигтай санагдаж байна. Бид цөөхөн Монголчууд, тус болсон хүндээ талархаж чаддаг байх хэрэгтэй. Ялангуяа цагдаагийн алба хаагч нар яг бидэнтэй л адилхан хүмүүс. Ар гэрийг нь хүртэл магтмаар. Үнэхээр амаргүй алба гэдгийг илүү ойлголоо. Тэдний ард түмний төлөө хийсэн зүйл маш их. Түүнийг нь бид үнэхээр тэр бүр ярьдаггүй. Гол төлөв муулдаг нь харамсалтай. Бахархмаар сайхан хүмүүс гэдгийг эгч нь энэ үйл явдлаас мэдэрлээ.

-Танай алба хаагч нар их даруухан юмаа гэж та хэлсэн. Яагаад ийн бодох болов?

-Тухайн үед яарч сандарсан, балмагдсан байсан болохоор бидэнд тусалсан цагдаагийн алба хаагч нарын нэрийг асуух нь байтугай машиных нь дугаарыг харах ч сөхөө байгаагүй. Аз болж нэг дугаар тэмдэглэн үлдсэн нь дэд ахлагч Д.Болортуяа байв. Хэд хоногийн дараа залган “Талархал илэрхийлье” гэхэд “Яахав ээ, эгчээ. Зээ хүүгийн тань бие л зүгээр бол болжээ” гээд ер хаана ажилладгаа тодорхой хэлдэггүй шүү. Эгч нь өөрөө эрэл сурал болж байж олж мэдсэн юм /инээв/.

-Та тэгэхээр талархлаа өөрөө зорьж утсаар мэдэгдсэн гэсэн үг үү?

-Тэгэлгүй яахав. “Засгийн Газрын Иргэд Олон Нийттэй Харилцах Төв”-ийн 11-11 дугаарт, Цагдаагийн ерөнхий газрын мэдээлэл хүлээн авах 126 дугаарын утсанд залгаж талархлаа илэрхийлсэн. Манайхан дандаа л гомдол, санал хэлдэг хэрнээ аварсан, хамгаалсан, сайн үйлд нь баярлаж бахдаж байгаагаа тэр бүр хэлэхгүй өнгөрдөгт нь би хувьдаа шүүмжлэлтэй ханддаг. Хэзээ ч сайн сайхан байна цагдаа дуудаарай гэдэггүй шүү дээ. Тэдний ажил нь ч бас ийм онцлогтой юм. Муу муухай, хэцүү бэрх бүхэнд хамгийн түрүүнд очдог цагдаагийн байгууллагын алба хаагч нарын төлөө миний хийж чадах ганц зүйл бол талархал л байсан. Энэ албыг манай гэр бүл насан туршдаа хүндлэн, хайрлах дурсамжтай үлдсэн. Та бүхэндээ ажлын амжилт хүсэж байна.

Ярилцсан: Цагдаагийн дэд ахлагч С.Мягмарсүрэн

Дэлгэрэнгүй унших

Үзэл бодол

Г.Занданшатар: Төрөө түших, түмний итгэлийг биелүүлэх журамт үүрэгтээ эзэн нь байхыг та бүхнээсээ хүсье

Огноо:

,

Монгол Улсын Их Хурлын Анхдугаар чуулганаас Монгол Улсын Их Хурлын даргаар сонгогдсон Улсын Их Хурлын гишүүн Гомбожавын Занданшатарын хэлсэн үгийг бүрэн эхээр нь та бүхэнд хүргэж байна.

  Улсын Их Хурлын Эрхэм гишүүд ээ,

    Тусгаар Монгол Улсын Бүрэн эрхт иргэд ээ,

    Монгол Улсын төрийн эрх барих дээд байгууллага Улсын Их Хурлыг сонгох 8 дахь удаагийн сонгууль амжилттай өндөрлөж, шинээр сонгогдсон гишүүд маань Монгол төрийн сүлдний өмнө төр, ард түмэндээ андгай тангаргаа өргөлөө. Ийнхүү 8 дахь удаагийн сонгуулиар бүрдсэн байнгын ажиллагаатай парламентын бүрэн эрх албан ёсоор хэрэгжиж эхэлж байна.

    Монгол Улсын Үндсэн хуулиар олгогдсон засаглах эрхээ эдэлж, төрийн үйл хэрэгт шууд оролцон, төрийн эрх барих төлөөлөгчдийн байгууллагаа сонгон байгуулсан тусгаар тогтносон Монгол Улсынхаа ард иргэдэд гүн талархал илэрхийлье.

    Ард түмнийхээ итгэл хүндлэлийг хүлээж, захиас даалгаврыг өвөрлөн, төрөө түших эрхэм хариуцлагатай, өндөр нэр хүндтэй албанд тохоон томилогдсон Улсын Их Хурлын Эрхэм гишүүд Та бүхэнд халуун баяр хүргэе.

    Төрийн эрх барих, хууль тогтоох дээд байгууллагыг тэргүүлэх үүрэг хариуцлагыг надад оноож, сонгосон Монгол Ардын Нам, Монгол Ардын Намын дарга Ухнаагийн Хүрэлсүх, журмын нөхдөдөө чин сэтгэлийн талархал илэрхийлье.

    Эрхэм гишүүд ээ,

    Энэ удаагийн сонгуульд Монгол Ардын Нам 62, Ардчилсан Нам 11, “Та бидний эвсэл”, “Зөв хүн электорат” эвсэл, бие даагчдаас тус бүр 1 хүн сонгогдож, улс төрийн 4 нам парламентад суудалтай боллоо.

    Монгол Ардын Намын энэхүү үнэмлэхүй ялалт нь Ухнаагийн Хүрэлсүхийн тэргүүлж ажилласан Засгийн газрын эхлүүлсэн шударга ёсны тэмцэл, тогтолцооны шинэчлэл, бүтээн байгуулалтын аяныг цаашид тууштай үргэлжлүүлэх, эхэлсэн ажлаа дуусгах, улсаа хөгжүүлэх, сахилга хариуцлагыг чангатгах, ёс зүйг эрхэмлэх чиглэлээр авч хэрэгжүүлж буй арга хэмжээгээ үр дүнд хүргэх, тогтвортой, хариуцлагатай, иргэнээ дээдэлсэн төрийг төвхнүүлэх алсын харааг дэмжсэн ард түмний итгэл, өндөр хариуцлага, үүрэг даалгавар гэж бид ойлгож байна.

    Ард түмнийхээ энэ итгэл, их хүчийг бид Монгол орны хөгжил дэвшил, Монголын ард түмний сайн сайхан маргаашийн төлөөх их давалгаа гэдгийг ухамсарлан ойлгож, түүний эрч хүчийг сааруулах биш, эгнээнд нь нэгдэж, хүчээ нэгтгэж, хошуучлан манлайлж зүтгэх ёстой.

    Энэ бол том зорилго, амаргүй ажил. Гэхдээ Монголын сайн сайхны төлөөх энэ зорилгоос ухрах, иргэдийнхээ итгэлийг хугалах эрх бидэнд байхгүй.

    “Том зорилго л Таныг хөдөлгүүр мэт зогсоо зайгүй ажиллуулж чадна” гэсэн мэргэн үг бий. Тиймээс Монгол орноо сэргээн мандуулах, хөгжлийн шинэ эрин үеийг эхлүүлэх том зорилгын төлөө нэгэн биеийн алжаалыг умартан зүтгэх эрхэм үүрэг эрхэм гишүүд Та бидэнд ногдож байна.

    Эрхэм гишүүд ээ,

    Шинээр байгуулагдсан Улсын Их Хурал нэн яаралтай ажилдаа орж, ард түмэндээ амласан амлалтаа биелүүлж, хүчээ нэгтгэсэн ард түмнийхээ улсаа мандуулах эрмэлзэл тэмүүллийг ажил хэрэг болгох ёстой.

    Иймээс Улсын Их Хурал дараах таван чиглэлээр Ажлын хэсгүүд байгуулж, хугацаа алдалгүй ажилд нь оруулах ёстой гэж үзэж байна.

    1. Хуулийн реформ хийх ажлаа хугацаа алдалгүй үргэлжлүүлэх хэрэгтэй байна. Монгол Улсын Үндсэн хуульд оруулсан нэмэлт, өөрчлөлтийг “амилуулах” томоохон хуулиуд биднийг хүлээж байна. Эхний ээлжинд 37 хуульд нэмэлт, өөрчлөлт оруулж, шинэчлэн найруулах шаардлагатай. Үүнд Засаг захиргаа, нутаг дэвсгэрийн нэгж, түүний удирдлагын тухай, Нийслэлийн эрх зүйн байдлын тухай, Хот, тосгоны эрх зүйн байдлын тухай, Шүүхийн тухай, Үндэсний баялгийн сангийн тухай зэрэг олон хууль биднийг хүлээж байна. Заримынх нь эхний хэлэлцүүлгийг хийсэн, төсөл нь бэлэн болсон байгаа. Шууд хэлэлцэж эхлэхэд ямар ч саад байхгүй.    

    2. Эдийн засгаа эрсдэлээс хамгаалах, өсөлтийн суурийг бүрдүүлэх, мөрийн хөтөлбөрт багтсан амлалтаа хэрэгжүүлэх ажилд шуурхайлан орох шаардлагатай байна. Коронавирусийн халдварт цар тахлын нөлөөллөөс эдийн засгаа, иргэдээ хамгаалах, ажлын байр, экспортыг нэмэгдүүлэх, нэгэнт авч хэрэгжүүлсэн арга хэмжээг үр дүнд хүргэх нь чухал байна. Тухайлбал, банк санхүүгийн реформыг үргэлжлүүлэх, зээлийн хүүг бууруулж 1 оронтой тоонд хүргэх, ипотекийн зээлийн хүртээмжийг нэмэгдүүлж, хүүг багасгах зэрэг шийдвэрийг Улсын Их Хурал нэн яаралтай гаргахыг ард түмэн хүлээж байгаа.

    3. Эдийн засгаа солонгоруулахын тулд эхний ээлжинд хос морьтой болж, уул уурхайгаас хэт хамааралтай эдийн засгаа өөрчилж, хөдөө аж ахуйн үйлдвэрлэлийг дэмжих төрийн бодлого өнөө маргаашгүй бодит ажил хэрэг болж эхлэх шаардлагатай байна. Үүний тулд хүнс, хөдөө аж ахуйн үйлдвэрлэлийг санхүү, зээл, татварын бодлогоор дэмжих, мал аж ахуйн гаралтай түүхий эдийн үйлдвэрлэлийг эрчимжүүлэх, экспортын чиг баримжаатай хөгжүүлэх зарчмыг хангасан шийдвэрүүдийг гаргах нь зайлшгүй чухал юм.

    4. Төрөө төвшитгөх, сайн засаглалыг бүрдүүлэх үүргийг бид ард түмнээсээ авсан. Энэ хүрээнд төрийн бүх шатанд сахилга хариуцлагыг бэхжүүлж, ёс зүйг сахиулахад эн тэргүүнд анхаарах хэрэгтэй байна. Иймд Улсын Их Хурлын Ёс зүйн дэд хороог Ёс зүйн байнгын хороо болгон өргөтгөх ёстой гэж Улсын Их Хурлын даргын хувьд үзэж байна. Монгол Улсын Үндсэн хуулийн нэмэлт, өөрчлөлтөд туссан Хянан шалгах түр хорооны үйл ажиллагааг нэн яаралтай журамлаж, хуульчлах хэрэгтэй байна. Энэ бүтцүүдээр дамжуулан зөвхөн Улсын Их Хурлын гишүүдийг биш, нийт төрийн албан хаагчдад хариуцлага, ёс зүйг хэвшүүлэх, тэдний үйл ажиллагааг хянан шалгах байнгын ажиллагаатай тогтолцоог бүрдүүлэх шаардлагатай гэж үзэж байна.

    5. Иргэдийн нийгмийн хамгааллын чиглэлээр нэгэнт авч хэрэгжүүлж байгаа бодлогыг цаашид тууштай үргэлжлүүлж, Монгол Ардын Намын мөрийн хөтөлбөрт багтсан “Элэг бүтэн Монгол”, “Хуримтлалын нэгдсэн сан”, “Тэтгэврийн шинэчлэл”, “Бага өртөгтэй орон сууц”, “Тогтвортой амар амгалан гэр бүл” зэрэг олон хөтөлбөрийг ойрын үед эцэслэн боловсруулж, батлуулах шаардлагатай байна.


    Эдгээр 5 чиглэлээр Улсын Их Хурлаас ажлын хэсгүүд байгуулж, ойрын үед ажилд нь оруулна. Зуны сар зургаа биш. Нөгөө талаар улсын нийгэм, эдийн засгийн байдал, цаашдын төлөвөөс дүгнэлт хийхэд бидэнд амарч суух эрх алга байна.

        Тиймээс төрөө түших, түмний итгэлийг биелүүлэх журамт үүрэгтээ эзэн нь байхыг Та бүхнээсээ хүсье.

        Хөх тэнгэрийн дор Монгол эх орон минь мөнх оршиж, төр засаг нь түвшин, түмэн олон нь амгалан байх болтугай.    

Дэлгэрэнгүй унших

Санал болгох