Бидэнтэй нэгдэх

Цаг үе

Уул уурхай, хүнд үйлдвэрийн сайд Г.Ёндон мэндчилгээ дэвшүүллээ

Огноо:

,

Эх орны хөрсөнд үнэт шигтгээ болж үеэс үед өвлөгдөн ирсэн эрдэс баялгийн салбарыг эдийн засгийн эргэлтэд оруулж улс орныхоо хөгжил, дэвшлийг түүчээлэх үйлсэд хүчин зүтгэж ирсэн үе үеийн геологичид, уурхайчид, салбарын нийт хамт олон Та бүхэнд Монгол Улсад уул уурхайн салбар үүсэж, хөгжсөн түүхт 98 жилийн ойн баярын мэндийг Уул уурхай, хүнд үйлдвэрийн яамны хамт олны нэрийн өмнөөс болон өөрийн чин сэтгэлийн угаас хүргэж байна.

Дэлхий дахинаа нүүрлэсэн цар тахлын хүнд үе манай орныг дайрч, улсын маань эдийн засаг “Ковид-19”хэмээх шинэ тахалтай нүүр тулсан ч түүний өмнөөс хүч сөрөн зогсох тэнхээтэй байгаа нь уул уурхай, хүнд үйлдвэрийн салбарт ажиллаж буй мянга мянган ажилтан та бүгдийн хичээл зүтгэл, хөдөлмөрийн үр шим билээ.

Уул уурхай, хүнд үйлдвэрийн сайдын эрхлэх асуудлын хүрээнд геологи, уул уурхай, газрын тос, хүнд үйлдвэр гэсэн үндсэн дөрвөн салбар хамаарч байна. Бид ДНБ-ий 20 хувь, аж үйлдвэрийн салбарын үйлдвэрлэлийн 70 хувь, экспортын бүтээгдэхүүний 90 хувь, гадаадын шууд хөрөнгө оруулалтын 70 гаруй хувийг тус тус бүрдүүлснээр ирэх жилүүдийн төлөвлөгөөгөө биелүүлэх өөдрөг төсөөлөлтэй болж чадлаа.

Харин одообид өмнөө тавьсан зорилгоо үл умартан дэлхийн жишиг уул уурхайн салбарыг бүх шатанд хөгжүүлж, онцгой ач холбогдол бүхий орд газруудыг ашиглалтад оруулах ажлыг эрчимжүүлж, өрсөлдөх чадвараа нэмэгдүүлэн эдийн засгийн үр өгөөжөө дээшлүүлэх ажилд ханцуй шамлан орж байна.

Баялаг бүтээгч та бүхнийг эх орныхоо газрын хэвлийг хаягдалгүй бүрэн ашиглаж, нэмүү өртөг шингэсэн бүтээгдэхүүн үйлдвэрлэж, хариуцлагаа өндөржүүлэн байгаль, орчноо хайрлан хамгаалж, дэлхийн чиг хандлагыг нутагшуулах зэргээр салбарынхаа хөгжлийг хурдасгаж, аж үйлдвэржсэн чинээлэг улс болохын төлөө хамтын хүчээр зүтгэнэ гэдэгт итгэл төгс байна.

Та бүхэнд аз жаргал, амжилт бүтээлийн дээдийг хүсэн ерөөе!

МОНГОЛ УЛСЫН ЗАСГИЙН ГАЗРЫН ГИШҮҮН,
УУЛ УУРХАЙ, ХҮНД ҮЙЛДВЭРИЙН САЙД  Г.ЁНДОН

Дэлгэрэнгүй унших

Сэтгэгдэл

Цаг үе

Улаанбаатарт өдөртөө 31 хэм дулаан

Огноо:

,

Малчид, иргэд, тээвэрчдийн анхааралд: Өнөөдөр ихэнх нутгаар халж, хуурайшилт нэмэгдэх тул гал түймрийн аюулаас сэрэмжтэй байхыг анхааруулж байна.

2024 оны тавдугаар сарын 21-ний 08 цагаас 20 цаг хүртэл: Үүлшинэ. Монгол-Алтай, Хөвсгөлийн уулархаг нутаг, Увс нуурын хотгороор бороо орно. Бусад нутгаар багавтар үүлтэй, бороо орохгүй. Салхи нутгийн хойд хэсгээр баруун өмнөөс баруун хойш эргэж, бусад нутгаар баруун өмнөөс секундэд 5-10 метр, нутгийн зарим газраар секундэд 12-14 метр хүрч ширүүсэж, шороон шуурга шуурна. Монгол-Алтайн уулархаг нутгаар 16-21 хэм, Увс нуур болон Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчмоор 21-26 хэм, Орхон-Сэлэнгийн сав газар, говийн бүс нутгаар 32-37 хэм, бусад нутгаар 26..31 хэм дулаан байна.


УЛААНБААТАР ХОТ ОРЧМООР: Багавтар үүлтэй. Бороо орохгүй. Салхи баруун өмнөөс секундэд 6-11 метр. Өдөртөө 29-31 хэм дулаан байна.

БАГАНУУР ОРЧМООР: Багавтар үүлтэй. Бороо орохгүй. Салхи баруун өмнөөс секундэд 8-13 метр. Өдөртөө 29-31 хэм дулаан байна.

ТЭРЭЛЖ ОРЧМООР: Багавтар үүлтэй. Бороо орохгүй. Салхи баруун өмнөөс секундэд 6-11 метр. Өдөртөө 26-28 хэм дулаан байна.


2024 оны тавдугаар сарын 22-ноос 2024 оны тавдугаар сарын 26-ныг
хүртэлх цаг агаарын урьдчилсан төлөв

22-нд баруун болон зүүн аймгуудын нутгийн хойд, төвийн аймгуудын ихэнх нутгаар, 23-нд баруун болон говийн аймгуудын нутгийн зарим газар, төвийн аймгуудын ихэнх нутгаар, 24-нд нутгийн хойд хэсгээр, 25-нд нутгийн зүүн хагаст бороо орно. Салхи ихэнх хугацаанд секундэд 6-11 метр, 22-нд Алтайн уулархаг нутаг болон говь, тал, хээрийн нутгаар, 23-нд Алтайн салбар уулсаар, 24-нд говь, тал хээрийн нутгаар секундэд 14-16 метр хүрч ширүүсэж, шороон шуурга шуурна. Ихэнх хугацаанд нутгийн хойд хэсгээр сэрүүсэж, Монгол-Алтай, Хангай, Хөвсгөл, Хэнтийн уулархаг нутаг, Дархадын хотгор, Эг, Үүр, Тэрэлж, Онон, Улз, Халх голын хөндийгөөр шөнөдөө 1-6 хэм, өдөртөө 14-19 хэм, Завхан голын эх, Хүрэнбэлчир орчим, Идэр, Тэс, Орхон, Хараа, Ерөө, Туул голын хөндийгөөр шөнөдөө 6-11 хэм, өдөртөө 20-25 хэм, говийн бүс нутгийн өмнөд хэсгээр шөнөдөө 16-21 хэм, өдөртөө 31-36 хэм, бусад нутгаар шөнөдөө 10-15 хэм, өдөртөө 25-30 хэм дулаан байна.

Дэлгэрэнгүй унших

Цаг үе

"Нарантуул" захын уулзвараас "Өгөөмөр" зах хүртэлх авто замыг засварлаж байна

Огноо:

,

"Нарантуул" захын уулзвараас "Өгөөмөр" зах хүртэлх авто замд засвар, шинэчлэл хийх гэж байна. Тодруулбал, 2024 оны тавдугаар сарын 20-ны өдрийн 23:00 цагаас 2024 оны тавдугаар сарын 23-ны өдрийн 06:00 цагийн хооронд авто замыг хааж хэсэгчилсэн засвар, шинэчлэлтийн ажлыг хийж гүйцэтгэнэ.

Энэ ажлын хүрээнд хашлага өндөрлөж зорчих хэсгийн түвшинд тааруулах, зорчих хэсгийн худгийн таг өндөрлөх, асфальтбетон хучилт, тэмдэг тэмдэглэгээний ажлууд хийнэ. 

Иймд иргэд, жолооч та бүхэн бусад замыг сонгон хөдөлгөөнд оролцоно уу гэж Нийслэлийн Замын хөгжлийн газраас мэдээллээ. 

Дэлгэрэнгүй унших

Цаг үе

Хувийн хэрэглээний зориулалтаар улсын хилээр нэвтрүүлэхийг хориглосон эм бэлдмэлүүд

Огноо:

,

Яаралтай тусламжийн 7 хүртэл хоногийн эм, удаан хугацаанд нөхөх эмчилгээ шаардах чихрийн шижин, хорт хавдар, сэтгэцийн эмгэг, дархлалын олдмол хомсдол зэрэг өвчтэй хүмүүсийн хэрэглэх Зорчигчийн хувийн хэрэглээний эмийг улсын хилээр нэвтрүүлэх боломжтой.

Зорчигчийн хувийн хэрэглээний эмийг эмнэлгийн байгууллагын магадалгааг үндэслэж тоо хэмжээг нь тогтоож улсын хилээр нэвтрүүлдэг
Энэ тохиолдолд бол тусгай зөвшөөрөл шаардахгүй, ямар нэгэн татвар ногдуулахгүй. Хувийн хэрэглээний зориулалтаар улсын хилээр нэвтрүүлэхийг хориглосон дараах төрлийн эм бэлдмэлүүд байдаг.

Үүнд:

- судсаар сэлбэх шингэн,
- антибиотик  тариа,
- мансууруулах, сэтгэцэд нөлөөт эм,
- цусны бэлдмэл сийвэн орлох эм,
- нийтлэг дархлаажуулалтад хэрэглэх эм, бэлдмэл байдаг гэж Гаалийн Ерөнхий газраас мэдээллээ.

Дэлгэрэнгүй унших

Санал болгох