Бидэнтэй нэгдэх

Үзэл бодол

Б.Баянжаргал: Бид Жэжүгийн аялалыг 12 жил хамгийн хямдаар зохион байгуулж байна

Огноо:

,

Аялал жуулчлалын улирал эхэлж байгаатай холбоотойгоор Монголчуудын сүүлийн үед ихэд сонирхох болсон шууд нислэгтэй аялалыг түлхүү зохион байгуулж байгаа “АэрМаркет Холидэй” компаний гүйцэтгэх захирал Бямбадоржийн Баянжаргалтай ярилцлаа.

-Юуны өмнө компаниа танилцуулна уу?

“АэрМаркет Холидэй” компани аялал жуулчлалын үйл ажиллагаа эрхлэн явуулдаг, тэр дундаа чартер буюу захиалгат нислэгээр аялал зохион байгуулдаг гэдгээрээ бусад аяллын компаниас ялгарах онцлогтой

-Сүүлийн үед чартер нислэгтэй аяллууд олшрох болжээ. Ийм аялалын давуу талууд нь юу вэ?

Олон давуу тал байна. Үндэсний авиакомпаниуд болох МИАТ, Изнис аэрвэйс, Хүннү Аэр гээд авиакомпаниудаасаа онгоц түрээслэн авч аялал гаргадаг. Энэ нь үндэсний компаниа дэмжиж байгаа хэрэг юм.

Өвлийн улиралд дулаан оронлуу шууд нислэг гаргаснаар олон дамжин нисэж цаг хугацаа алдахгүй, мөн дамжин нислэгийн үнээс харьцангүй хямд зардлаар аялах боломж олгодог. Жишээ нь өвөл бол Арабын Нэгдсэн Улсын Дубай хот, Филиппиний Сэбү арал, Вьетнамын Ханой, Начянг, Индонезийн Бали арал гээд дамжин нислэгээр 1-2 хоног зарцуулж очдог хотуудруу шууд нислэгээр 5-9 цаг нисч цаг хугацаа, мөнгөө хэмнэнэ. Богино хугацаанд -30 хэмээс +30 хэмийн халуун оронд бууж аялал шууд эхэлдэг.

Зуны улиралд нислэгийн компаниудын онгоцны суудал гадаадаас ирэх жуулчдаар дүүрч, ачаалалттай байдаг учраас Япон, Хятад, Солонгос жуулчдыг мөн чартер нислэгээр авч, очих онгоцондоо Монгол аялагчдаа зөрүүлж суулгаж аялуулдаг тул Монгол аялагчдын хувьд маш хямдаар энэ чиглэлүүдийн аялалыг санал болгож чаддаг. Ингэж зөрж жуулчин авдаг Жэжү арлын нислэгийг 12 жил тасралтгүй хийж байна. Жилд багадаа 3 удаагийн онгоц түрээслэн аялал гаргадаг, тиймээс ч энэ чиглэлд аяллын чанараар хамгийн шилдэгт ордог.

- Солонгосруу аялахыг хүсдэг Монголчуудын хувьд виз бараг л “шүдний өвчин” нь болдог. Гэтэл Жэжү арлын аялалд виз хэрэггүй гэдгийг тайлбарлаач?

Бүх улсын иргэд визгүй 30 хоног аялж болдог Солонгосын ганц бүс нутаг л даа. Сөүл болон Бусанаар дамжиж очих бол виз заавал авах шаардлагатай. Монголчуудын хувьд визгүй зорчих 2 боломжтой чиглэл байгаа. 1 нь Бээжингээр дамжин нисэх, нөгөөх нь шууд нислэгээр УБ-аас Жэжү нисэх нислэг юм. Бээжингээр очих тийз нь дангаараа 2,1 сая байдаг бол шууд нислэгтэй аяллын бүх зардал багтаад 2,2 сая байдаг гэхээр зөрүү нь тодорхой харагдаж байгаа байх.

- Жэжү арал юугаараа онцлог болоод Солонгосын аялал жуулчлалын тэргүүлэгч бүс болчихвоо?

Бүх улсын иргэдийг визгүй болгосон нь хамгийн их нөлөөлдөг байх, мөн улсаас нь бодлогоор аялал жуулчлалаа маш их дэмждэг. Нутгийн иргэдийн 90% нь аялал жуулчлалын салбарт шууд болон шууд бусаар хамааралтай хамтран ажилладаг гэсэн судалгаа байдаг. Арал дээр үйлдвэр байхгүй гэж өөрсдөөрөө их бахархана. Арлын бүх үзвэр үйлчилгээг үзье гэвэл бүтэн жил зарцуулах байх шүү.

-Танай шууд нислэгтэй аяллаар явбал яг ямар сонирхолтой хөтөлбөрүүдэд хамрагдах вэ?

12 жилийн турш аялал хийхдээ дандаа ижил хөтөлбөрөөр аялал хийнэ гэж байхгүй. Жил бүр Монгол хүнд юу таалагдах уу, ямар зүйл шинээр нэмэгдсэн байна гээд судалж нэмж хасаад шилдэг гэсэн бүрийг л хэдхэн хоногт аль болох үзүүлхээр оруулдаг. Энэ олон жил ганц үзвэр огт өөрчдөгдөөгүй нь Монгол Морин Цирк л байгаа. Тоглолтонд 100% монгол хүүхэд, залуус оролцдог тул үзсэн хэн ч байсан тэднээр бахархаж, огшиж байдаг. Солонгосчууд ч гэсэн Жэжү аралд очвол заавал үзэх жагсаалтандаа дээгүүрт оруулсан байдаг үзвэр.

-Жэжүгийн шууд нислэгтэй аялалд оролцохыг хүсвэл юуг анхаарах ёстой вэ?

Гадаал паспорт 6 сараас дээш хүчинтэй байх, өмнө нь Солонгосын визний зөрчил гаргаж байгаагүй байх гэсэн шаардлагууд л тавигддаг.

- Монголчууд далайн эрэгт амрах, устай холбоотой хөтөлбөрүүдэд оролцох, казинодох, шопингдох сонирхол ихтэй байдаг. Хөтөлбөрт энэ зүйлс багтсан уу?

Хамгийн чухал нь далайн эрэг, наран шарлагийн газар очих, энэ нь хөтөлбөрт байгаа. Мөн усан онгоцонд сууж аралтай танилцах ч багтдаг. Наран шарлагын газар нь 6 сарын 1 нээс 10 сарын 1 хүртэл ажилладаг болохоор тухайн орны аялал жуулчлалын оргил үеэр нь аялуулдаг гэсэн үг. Казино, шоппинг хөтөлбөрт албан ёсоор багтдаггүй, аялагчдад 1 бүтэн өдрийг чөлөөт өдөр гэж өгдөг, тэр өдөр сонголтоороо эдгээрийг хийж болно.

- Унаа бол шууд нислэг учир ойлгомжтой байна. Харин буух буудал болон, хоол хүнс нь аялалын тав тухын салшгүй хэсэг. Энэ тал дээр хэрхэн анхаардаг вэ?

Дийлэнхи Монгол хүмүүс Солонгос хоолонд дуртай байдаг, гэхдээ нийтээрээ биш тул халуун ногоотой эсвэл далайн бүтээгдэхүүнтэй хоолны сонголт оруулдаггүй. Халуун ногоогүй, мах их орсон аль болох буффет хоол нилээн түлхүү оруулсан байдаг тул хоолны сонголт дээр асуудалгүй.

Зочид буудлын сонголт дээр Монгол аялагчдын хүсэлд нийцүүлж дотроо бассейнтай буудал сонгодог. Мөн буудал нь дэлгүүр, хоолны газар, залуучуудын гудамжтай ойрхон хотын төвд байрлалтай. Түүнээс гадна далайн эрэг, наран шарлагын газар луу таксигаар 8000 вон гардаг бөгөөд чухал гэсэн бүх зүйлтэй ойрхон шинэ 4 одтой буудал.

- Зиа ярилцаж байгаа надад ч явмаар санагдаж эхэллээ. Хэзээ хэзээ аялах боломжтой вэ?

Жилд шууд нислэгийг 2-3 удаа л захиалж хийдэг, бас яг Солонгост жуулчны улирлаар нь тааруулж нисдэг. Одоо хамрагдах боломжтой нь 7 сарын 11-нээс 15 нд наадмын урт амралтаар дараагийх нь 8 сарын 8 наас 13 нд 6 өдрийн аялалд хамрагдаж болно

- Аялахаар шийдсэн хүмүүс танайхтай яаж холбогдох вэ?

Их дэлгүүрийн урд байрлах АэрМаркет билетийн касстай байранд ирж бүртгүүлж болно. Утсаар 77009900, 99083650, 88050850, 99104650 дугааруудаас асууж тодруулж бас болно.

-Ярилцсанд баярлалаа. Аялагч болгон тань сэтгэл хангалуун байх болтугай.

Г.Ариунчулуун

 

Дэлгэрэнгүй унших
сурталчилгаа

Сэтгэгдэл

Үзэл бодол

Г.Занданшатар: Газар, газрын хэвлийн баялгийн ашиглалт, хуулийн хэрэгжилтийн талаар нээлттэй сонсгол хийнэ

Огноо:

,

Монгол Улсын Их Хурлын дарга Г.Занданшатар 2024 оны хоёрдугаар сарын 19-ний өдөр Хөрөнгө оруулалтын тухай хуульд тусгагдсан гадны иргэн, аж ахуйн нэгжид газар ашиглах, эзэмшүүлэх зохицуулалтын талаарх болон нээлттэй сонсгол зохион байгуулах асуудлаар сэтгүүлчдэд мэдээлэл хийлээ.

Хэвлэлийн бага хуралд Улсын Их Хурлын Аюулгүй байдал, гадаад бодлогын байнгын хорооны дарга Б.Энх-Амгалан, Хууль зүйн байнгын хорооны дарга Д.Цогтбаатар, Ёс зүй, сахилга хариуцлагын байнгын хорооны дарга Б.Баттөмөр, Инновац, цахим бодлогын байнгын хорооны дарга Э.Батшугар нар оролцов.

Улсын Их Хурлын дарга мэдээллийн эхэнд, хэдийгээр хаврын сар гарч байгаа ч цас, зудын байдал нийт монгол орныг хамарч, хүндхэн байгаа тул аюул, эрсдэлийг гарз хохирол багатай даван туулахад онцгой анхаарах шаардлагатай гэлээ. Мал хэдийгээр малчдын өмч мөн боловч Монгол Улсын баялаг, тусгаар тогтнолын баталгаа тул төрийн бус байгууллагаас эхлүүлсэн малчдадаа тусламж дэмжлэг үзүүлэх “Сэтгэлийн тусгал” аянд нэгдэхийг нийт монголчууддаа хандан уриалав.

Монгол Улсын иргэн Н.Номун-Эрдэнэ “Газрыг гадаадын иргэн 100 жилээр ашиглах, эзэмшихийг цуцлах” сэдэвтэй нийтийн өргөдлийг УИХ-ын “D-Өргөдөл” цахим системд нийтлүүлснийг 2024 оны 02 дугаар сарын 19-ний өдрийн байдлаар буюу 17 хоногийн хугацаанд 100.252 иргэн дэмжиж гарын үсгийг зурсан тул Монгол Улсын Их Хурлын чуулганы хуралдааны дэгийн тухай хуульд заасны дагуу иргэдийнхээ засаглах эрхийн хүрээнд гаргасан энэхүү саналыг хүлээн авч, хэлэлцэж холбогдох байгууллагуудад уламжлах зохицуулалттай. Иймд УИХ-аас Хөрөнгө оруулалтын тухай хуулийн холбогдох заалтыг хүчингүй болгох хуулийн төслийг боловсруулан УИХ-ын даргын дэргэдэх зөвлөлөөр хэлэлцүүлэхэд, Байнгын хороодын бүх дарга нар дэмжсэн гэдгийг  Улсын Их Хурлын дарга Г.Занданшатар онцлон тэмдэглэсэн. 

Мөн энэхүү хуулийн төсөлд Засгийн газраас санал авахаар хүргүүлсэн бөгөөд Монгол Улсын Их Хурлын хаврын ээлжит чуулганаар хэлэлцүүлэх бэлтгэл ажлыг бүрэн хангахыг мэдэгдэв.

Түүнчлэн Газрын тухай хуулийн хэрэгжилт ил, тод бус байна. Иргэд 0.07 га газраа тэгш, шударгаар эзэмшиж чадахгүй, хуулийн хэрэгжилт хангалтгүй байгааг уламжлах болсон тул Монгол Улсын иргэн бүрд газрыг эзэмшүүлэх асуудлыг УИХ анхааралдаа авахаар болсон гэв. Мөн Газрын тухай болон Ашигт малтмалын тухай хууль тогтоомжийн хэрэгжилт, газрын зөвшөөрөл олголт, ашигт малтмалын нөөц ашигласны төлбөрийн хувийг тооцох, төлбөр ногдуулах, тайлагнах, төсөвт төлөх үйл ажиллагаанд хяналт шалгалт хийж, санал, дүгнэлт гаргах, шаардлагатай бол Хянан шалгах түр хороо байгуулах бэлтгэлийг хангах үүрэг бүхий Ажлын хэсэг байгуулсныг зарлалаа.

Ажлын хэсэг Улсын Их Хурлын Эдийн засгийн байнгын хороо, Аюулгүй байдал, гадаад бодлогын байнгын хороо, Хууль зүйн байнгын хороо, Инновац, цахим бодлогын байнгын хорооны дарга нар болон Засгийн газраас Хууль зүй, дотоод хэргийн болон Цахим хөгжил, харилцаа холбооны сайд нарын бүрэлдэхүүнтэй ажиллах аж. Дэд ажлын хэсгийг төрийн хууль, хяналт шалгалтын байгууллагууд болон төрийн бус байгууллагууд, энэ чиглэлээр ажилладаг шинжээчид, эрдэмтэн судлаачдын бүрэлдэхүүнтэй байгуулах бөгөөд Улсын Их Хурлын хаврын чуулган эхлэх өдөр буюу гуравдугаар сарын 15-ныг хүртэл түр хороо байгуулах, сонсгол хийх бэлтгэлийг бүрэн хангаж ажиллахыг үүрэг болгосон байна.

Улсын Их Хурлын дарга Г.Занданшатар,  Монгол Улсын болоод Монгол Улсын иргэдийн халдашгүй дархан өмч болсон газар, цаашлаад газрын хэвлийн баялаг, ашигт малтмалын нөөцтэй газраа гадаадын иргэнд 100 жилээр эзэмшүүлэх, ашиглуулах хууль цаашид ч батлагдах ёсгүйг тодотгов. 2013 онд Засгийн газраас өргөн барьж батлуулсан одоо мөрдөгдөж буй Хөрөнгө оруулалтын тухай хуулийн холбогдох заалтыг хүчингүй болгох зайлшгүй шаардлагатай бөгөөд хэдийгээр энэ хуулийн заалт Газрын тухай хуульдаа тусгагдаж хэрэгжээгүй боловч цаашдаа энэ мэтээр Монгол Улсын газар, газрын хэвлийн баялгийг гадаадын иргэнд эзэмшүүлэх, ашиглуулах, улмаар бүрэн эрхт байдал, тусгаар тогтнолд халтай хууль өргөн баригдах нөхцөлийг бүрмөсөн хааж өгнө гэж байлаа.

Энэ асуудалд Монгол Улсын Ерөнхийлөгч, Монгол Улсын Их Хурлын дарга, Монгол Улсын Ерөнхий сайд нар нэгдмэл байр суурьтай байгааг мэдэгдлээ гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.   

Дэлгэрэнгүй унших

Үзэл бодол

Х.Нямбаатар: Урт цагааны цэцэрлэгт хүрээлэнг доороо автомашины зогсоол, дээрээ ногоон байгууламжтай байхаар төлөвлөсөн

Огноо:

,

Чингэлтэй дүүргийн 3 дугаар хороонд байрлах Нийслэлийн өмчийн III байр буюу “Урт цагаан” худалдаа, үйлчилгээний төвийн барилгыг буулгаж, чөлөөлсөн талбайд цэцэрлэгт хүрээлэн байгуулах, эсвэл дахин төлөвлөж барилга барихаар иргэдээс санал авахад 96 хувь нь цэцэрлэгт хүрээлэн байгуулахыг дэмжсэн.

Үүнтэй холбоотойгоор чөлөөлсөн байршилд байгуулах ногоон байгууламж, цэцэрлэгт хүрээлэнгийн төлөвлөлтийн талаар Нийслэлийн Засаг дарга бөгөөд Улаанбаатар хотын Захирагч Х.Нямбаатар мэдээлэл өглөө.

Тэрбээр "Урт цагааны чөлөөлсөн талбай болон урд талын авто замын зорчих хэсгийг оруулаад 1 га орчим талбайд цэцэрлэгт хүрээлэн байгуулахаар төлөвлөсөн. Төлөвлөлтийг эхний байдлаар олон нийтэд танилцуулахад иргэдээс автомашины зогсоолын талаар ялгаатай санал, байр суурь илэрхийлж байна. Цэцэрлэгт хүрээлэнг доороо 196 автомашины зогсоол, дээрээ ногоон байгууламжтай байхаар төлөвлөж, зураг төсөл урьдчилсан байдлаар гарсан. Нийслэлийн Зураг төслийн хүрээлэнгийн инженерүүд ирэх долоон хоногт тухайн орчмын иргэдийн автомашинаа гараашинд байрлуулдаг байдал, Урт цагаан орчмын болон Бага тойруу руу орж ирэх автомашины зорчих хөдөлгөөнийг тооцоолж шийдвэр гаргах юм. Түүнчлэн уг цэцэрлэгт хүрээлэнд Улаанбаатар хотын түүх, түүний талаар сэдэвчилсэн судалбар зургуудыг байрлуулахаар төлөвлөж байгаа.

2024 оныг “Тохижилт, бүтээн байгуулалтын жил” болгон зарласан. Энэ хүрээнд нийтийн эзэмшлийн зам, талбайг тохижуулан, явган хүний замуудыг стандартад нийцүүлэн засварлаж, ногоон байгууламжуудыг хийхээр төлөвлөж байна. Мөн дүүргүүдэд бичил цэцэрлэгт хүрээлэн байгуулж, Хүүхдийн паркийн тохижилтыг энэ онд дуусган, иргэдэд амарч зугаалах орчныг стандартын дагуу бүрдүүлнэ" гэлээ.

Урт цагааны барилга нь 1958-1961 онд ашиглалтад орсон бөгөөд баригдсанаас хойш засвар, шинэчлэл хийгээгүйгээс нурах эрсдэлтэй болж, мэргэжлийн хяналтын байгууллагаас иргэдийг бэртэж гэмтэхээс сэргийлэн удаа дараа нэн даруй нураах шаардлагатай гэсэн дүгнэлтийг гаргасан юм.

Дэлгэрэнгүй унших

Үзэл бодол

Эмгэнэл

Огноо:

,

2024 оны нэгдүгээр сарын 23-24-нд шилжих шөнө, нийслэлийн Баянзүрх дүүргийн 26 дугаар хорооны нутаг дэвсгэрт шингэрүүлсэн байгалийн хий тээвэрлэж явсан хүнд даацын автомашин суудлын автомашинтай мөргөлдсөн зам тээврийн ослын улмаас томоохон хэмжээний дэлбэрэлт болж, нөхөж баршгүй хохирол учирлаа.

Ослын уршгаар өргөсөн тангарагтаа үнэнчээр зүтгэж, ард иргэдийнхээ аюулгүй байдлын төлөө ажил үүргээ гүйцэтгэж яваад алтан амиа алдсан Гал түймэр унтраах, аврах 63 дугаар ангийн гал сөнөөгч, ахлагч Даваажавын Барсүрэн, ахлах ахлагч Ширнэнгийн Амгаланбаяр, ахлагч Эрдэнэдаваагийн Түвшинтөр нарын эцэг эх, гэр бүл, үр хүүхдүүд, төрөл төрөгсөд, мөрдөс нэгт хамт олонд гүн эмгэнэл илэрхийлье. Та бүхний баатарлаг үйлсийг Монгол Улсын төр засаг, ард түмэн үеийн үед дурсах болно.

Монгол Улсын Засгийн газар, Улсын Онцгой Комисс ослын шалтгааныг тогтоох, хохирлыг тооцоолох, осолд өртсөн иргэдэд эмнэлгийн тусламж үзүүлэх, иргэдийн аюулгүй байдлыг хангах, шаардлагатай тусламж үйлчилгээг зохион байгуулах чиглэлээр шуурхай ажиллаж байна.

Монгол Улсын Засгийн газар

Дэлгэрэнгүй унших
сурталчилгаа
Улстөр нийгэм16 цаг 33 минут

Малчдын зээлийн эргэн төлөлтийг зургаадугаар сар хүртэл хойшлуулахаа...

Цаг үе16 цаг 46 минут

Малайз Улсын Авлигын эсрэг хороотой хамтран ажиллах санамж бичиг бай...

Улстөр нийгэм17 цаг 1 минут

Баянзүрх дүүрэгт гарсан галын улмаас 228 иргэн, 15 аж ахуйн нэгж эд ...

Шударга мэдээ17 цаг 3 минут

Мал эмнэлгийн хүрээлэнгийн эрдэмтэд зудтай бүс нутагт ажиллана

Улстөр нийгэм17 цаг 5 минут

Сургуулийн автобус мөргөсөн осол бүртгэгджээ

Шударга мэдээ17 цаг 7 минут

Шатахууны хангамжийг тогтвортой байлгах талаар ОХУ, Монгол Улсын Зас...

Цаг үе17 цаг 9 минут

Согтуугаар тээврийн хэрэгсэл жолоодсон 35 зөрчил бүртгэгдлээ

Цаг үе17 цаг 14 минут

Өнөө маргаашдаа ихэнх нутгаар хүйтэн жавартай байна

Цаг үе17 цаг 18 минут

Үс шинээр үргээлгэх буюу засуулахад тохиромжгүй

Цаг үе2024/02/20

Өвөлжилт хүндэрсэн аймаг, сумдад өвс, тэжээл хүргэх тусламжийн цуваа...

Санал болгох