Цаг үе
“Тогтвортой хөгжил-Ногоон ирээдүй” үзэсгэлэн худалдааг амжилттай зохион байгууллаа
Ногоон хөгжлийг дэмжигч Төрийн банк “Тогтвортой хөгжил-Ногоон ирээдүй” үзэсгэлэн худалдааг энэ сарын 17-23-ны өдрүүдэд хоёр дахь жилдээ зохион байгууллаа. Энэ удаад арга хэмжээний цар хүрээ улам тэлж, төр, хувийн хэвшлийн идэвх оролцоо нэмэгдсэнээрээ онцлогтой байлаа.
Үзэсгэлэн худалдааны үеэр харилцагчид байгальд ээлтэй, сүүлийн үеийн, дэвшилтэт технологиудтай танилцаж, ногоон зээлүүдийг газар дээр нь судлуулснаас гадна Төрийн банкны харилцагчдад сонирхсон бүтээгдэхүүнээ тэр дор нь худалдаж авах боломжийг бүрдүүлснээрээ давуу талтай байсан юм. Мөн энэ жил амины ногоон орон сууцны шийдлүүдийг танилцуулах аж ахуйн нэгжүүдийн тоо өссөнөөр зогсохгүй тэдний дуу хоолойг бодлого тодорхойлогчдод хүргэж чадсанаараа арга хэмжээ ихээхэн ач холбогдолтой байв.
“Тогтвортой хөгжил-Ногоон ирээдүй” үзэсгэлэн худалдааны үеэр “Тогтвортой хөгжил-ногоон барилга” сэдвийн хүрээнд хэлэлцүүлэг зохион байгуулж, хэлэлцүүлэгт салбарын яам болон бизнес эрхлэгчдийн төлөөлөл оролцож, ногоон барилгын салбарт тулгамдаад байгаа асуудал, бодлогын дэмжлэгүүдийн талаар санал солилцсон юм.
Хэлэлцүүлгийн панелист, Хайбрид хаус ХХК-ийн гүйцэтгэх захирал Ц.Бат-Эрдэнэ “Өнгөрсөн хугацаанд банк санхүүгийнхэн ногоон барилга худалдан авч байгаа иргэдэд л зээл их олгосноос биш үйлдвэрлэгчдэд чиглэсэн зээл санхүүжилтийн бодлого нь дутмаг байсан” хэмээн учирласан бол Төрийн банкны тогтвортой хөгжил хариуцсан дэд захирал Ц.Энхмөрөн ногоон шийдлүүдийн санхүүжүүлэх бүтээгдэхүүн үйлчилгээгээ хөгжүүлэхэд ихээхэн анхаарч байгаагаа онцолсон юм. Тэрбээр Төрийн банкнаас зах зээлд нэвтрүүлээд буй бэлтгэн нийлүүлэгчийн зээлийн хүрээнд ногоон барилгын бизнес эрхлэгчид ч зээл санхүүжилт татах боломжтойг хэлж байв.
Мөн ХББОСЯ-ны Орон сууц санхүүжилтийн хэлтсийн дарга Э.Батболд төрөөс амины ногоон орон сууцыг дэмжих хэд хэдэн шалтгаан бий гэдгийг тодотгож байсан нь анхаарал татаж байсан юм. Тэрбээр “Зах зээл дээрх нийтийн зориулалттай орон сууцны үнэ амины орон сууцныхаас өндөр байна. Түүнчлэн гэр хорооллын нэг айлыг инженерийн шугам сүлжээнд холбоход дунджаар 50-70 сая төгрөг шаардлагатай бол ногоон барилгын үзүүлэлтэд нийцсэн инновацлаг технологиудаар амины орон сууцны инженерийн байгууламжийг шийдэхэд 30 сая төгрөг болно. Энэ бол төрөөс амины орон сууцыг дэмжих гол шалтгаан. Хүн амыг орон сууцжуулах гол гарц” гэсэн юм.
Бусад панелист ч мөн амины ногоон орон сууцны хүртээмжийг сайжруулахын тулд бодлогын дэмжлэг хэрэгтэйг онцолж байв. Тухайлбал, Амины орон сууцны инновац хөгжлийн төвийн гүйцэтгэх захирал А.Отгончимэг “Ногоон барилгынхан тийм ч их ашиг олдоггүй. 20-30 хувийн ашиг харж байгаа компаниудаас НӨАТ-ын 10 хувь хасчихаар урт хугацаанд хүртээмжтэй ажиллах хүчийг нь тамирдуулаад байдаг. Хэрэв хөрс, агаарын бохирдлын эсрэг төр, хувийн хэвшил нэгдье гэвэл аль аль нь вин-вин зарчмаар ажиллах хэрэгтэй. Ингэж байж амины ногоон орон сууцны хүртээмж нэмэгдэнэ” гэсэн юм.
Ногоон хөгжлийг дэмжигч Төрийн банк
Цаг үе
Улаанбаатар хотод 450 км дугуйн замын сүлжээ бий болгоно
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Монголын дугуйн холбооны төлөөллүүдийг хүлээн авч уулзлаа. Уулзалтаар Улаанбаатар хотод дугуйн спортыг хөгжүүлэх, дэд бүтцийн асуудлыг шийдвэрлэх, иргэдийн идэвхтэй, эрүүл амьдралын хэв маягийг дэмжих чиглэлээр санал солилцлоо.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Нийслэлийн дугуйн замыг нэмэгдүүлж, дугуй унаж буй хүмүүст ээлтэй хотыг бий болгох зорилгоор энэ жил 76 км дугуйн зам барьж байгууллаа. Ирэх жил 115 км дугуйн замыг нэмж, Улаанбаатар хотын нийт дугуйн замын сүлжээг 450 км хүргэнэ. Ингэснээр Өнөр хорооллоос Амгалан хүртэл дугуйгаар зорчих нөхцөлийг бүрдүүлэх юм. Олон улсын хотуудын жишгээр Туул голыг дагасан экосистем цэцэрлэгт хүрээлэн, дугуйн зам, явган хүний зам, гүйлтийн замтайгаар хийгдэнэ. Зайсангаас төв талбай хүрэх гүүрэн байгууламжтай дугуйн замыг 2027 онд барихаар М-Си-Эс групптэй зөвшилцсөн. Нийслэл дугуй унах, дугуйн спортыг дэмжинэ” гэлээ.
Монголын дугуйн холбооны ерөнхийлөгч Б.Гүрсоронзон “Нийслэл олон км дугуйн замыг бодлогоор барьж байгаад нийт дугуйчид болон дугуй сонирхогч залуусын өмнөөс талархал илэрхийлье. Монголын дугуйн холбоо нийтийн биеийн тамирыг хөгжүүлэх, замын хөдөлгөөний аюулгүй байдлыг сурталчлах чиглэлээр гол ажлуудаа хийж байна. Олон улсын жишгийг хангасан дугуйн спортын тэмцээн, уралдаан зохион байгуулна. Өнгөрсөн наймдугаар сард Цонжинболдогт “Gravel Gran Fondo Ulaanbaatar 2026 & Yam Trail Run” олон улсын дугуйн тэмцээнийг зохион байгуулсан. Энэ тэмцээнийг 2027 оны наймдугаар сард мөн хийнэ. Одоогийн байдлаар 20 орчим гадаадын тамирчин оролцох хүсэлтээ илэрхийлсэн” гэв.
Цаг үе
Нийслэлийн хэмжээнд 16 мянган тонн давс, бодис нөөцлөөд байна
Өвөлжилтийн бэлтгэл ажлын нэгдсэн төлөвлөгөөнд 573 ажил тусгаснаас хэрэгжилт 90 хувьтай байна. Давс 10016 тонн, бодис 6140 тонныг нөөцөлсөн. Нэмэлтээр 1000 тонн давс, 1500 тонн бодис худалдан авахаар тендер зарлаад байна.
Мөн давс, бодис цацагч 96, зам цэвэрлэгээний 432 тусгай зориулалтын машин, техникийн бэлэн байдлыг хангаад байна. Нийслэлийн хэмжээнд тохижилт үйлчилгээний чиглэлээр 48 байгууллага үйл ажиллагаа явуулдаг. Үүнээс зам, талбайн цэвэрлэгээ үйлчилгээ явуулдаг орон нутгийн төсөвт 17, хувийн хэвшлийн 20 байгууллага байна. Захирагчийн ажлын албанаас “Өвөлд бэлэн үү” үзлэг, шалгалтыг эхлүүлсэн байна.
Цаг үе
Жуковын цэцэрлэгт хүрээлэнгийн тохижилт арваннэгдүгээр сарын 15-нд 90 хувьд хүрнэ
Баянзүрх дүүргийн 4 дүгээр хороо, Жуковын хөшөөний арын 6000 ам метр газрын зөвшөөрлийг цуцалж, цэцэрлэгт хүрээлэн байгуулах шийдвэрийг зургаадугаар сарын 19-нд нийслэлийн Засаг дарга Б.Пүрэвдагва гаргасан.
Энэ хүрээнд долоодугаар сараас бэлтгэл ажил явж, гүйцэтгэгч шалгаруулж, аравдугаар сарын 9-нд тохижилтын ажлыг эхлүүлжээ. Өнөөдрийн байдлаар тохижилтын ажил 15 хувьтай байна. Тухайн байршилд нийслэлийн Засаг дарга бөгөөд Улаанбаатар хотын Захирагч Б.Пүрэвдагва, Баянзүрх дүүргийн Засаг дарга И.Баттөгс ажиллалаа.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Улаанбаатар хотын нэг хүнд ногдох ногоон байгууламж 5.9 ам метр буюу дэлхийн дунджаас 60 хувиар бага. Тиймээс хотын ногоон байгууламжийг нэмэгдүүлэх, цэцэрлэгт хүрээлэн барих ажилд онцгой анхаарч байгаа. ХААН банктай хамтарч, Ногоон нуурын 5.5 га газрыг цэцэрлэгт хүрээлэн болгох ажлыг ирэх хавар эхэлнэ. Улаанбаатар цэцэрлэгт хүрээлэнгийн 10.2 га талбайн менежментийг нийслэл хариуцаж байна. "Рио Тинто Монгол” ХХК гэр хорооллын бүсэд 2 цэцэрлэгт хүрээлэн тохижуулна. Баянгол дүүргийн хойд дэнжийн 10 га газрын тохижилт, Гандангийн тохижилт зэрэг гэр хорооллын бүс, орон сууцны нягтаршилтай бүсийн ногоон байгууламжийг шат дараатай нэмэгдүүлнэ. Цаашид 42 ногоон байгууламж байгуулахаар төлөвлөсөн. Өнөөдрийн байдлаар 13 байршилд зураг төсөл хийгдэж байна. Энэ 13 ажил 2027 оны төсөвт суугдана” гэв.
Жуковын цэцэрлэгт хүрээлэнгийн тохижилтын ажлыг гүйцэтгэгч “Гарден сити” ХХК нийт 4160 ам метр талбайд дайрга дэвсэн индүүдэж, тэгшилсэн. 35.5 метр түшиц хана, тус бүр 10 ам метр хоёр пандуус, шат цутгасан. Хар шороо, дайрга, явган замын хашлага, хавтанг бэлтгэж нөөцлөөд байгааг “Гарден сити” ХХК-ийн гүйцэтгэх захирал Д.Цэрэнпагма хэллээ.
Мөн тохижилтын ажилд зориулж 14 улиас, 38 голт бор, 29 өрөл, 92 нохойн хошуу, 1060 шар хуайсыг бэлтгэжээ. Жуковын цэцэрлэгт хүрээлэнгийн тохижилтын ажлыг арваннэгдүгээр сарын 15-нд 90 орчим хувьд хүргэж, ирэх хавар цэцэрлэгт хүрээлэнг бүрэн ашиглалтад оруулахаар төлөвлөлөө.
