Бидэнтэй нэгдэх

Улстөр нийгэм

УИХ-ын сонгуулийн тухай хуулийн төслийг баталлаа

Огноо:

,

УИХ-ын 2019 оны 12 дугаар сарын 20-ний өдрийн үдээс өмнөх нэгдсэн хуралдаанаар  УИХ-ын сонгуулийн тухай хуулийн төсөл болон хамт өргөн мэдүүлсэн хуулийн төслүүд-ийн эцсийн хэлэлцүүлгийг үргэлжлүүлж, Байнгын хорооноос гаргасан зарчмын зөрүүтэй саналын томьёоллуудаар санал хураалт явуулж шийдвэрлэв.

Уг хуулийн төслийн эцсийн хэлэлцүүлгийг чуулганы өчигдрийн нэгдсэн хуралдаанаар хийж, хуулийн төслүүдийг эцсийн хэлэлцүүлэгт бэлтгэх шатанд Төрийн байгуулалтын байнгын хорооноос бэлтгэж ирүүлсэн зарчмын зөрүүтэй 14 саналын томъёоллоос 7 саналын томъёоллоор нь нэг бүрчлэн санал хураалт явуулж шийдвэрлэсэн. Гэвч төслийн 21 дүгээр зүйлд “Улсын бүртгэлийн асуудал эрхэлсэн төрийн захиргааны байгууллага ээлжит сонгуульд оролцохоор бүртгүүлсэн нам, эвслийг төлөөлөх эрх бүхий этгээдийн хүсэлтийн дагуу энэ хуулийн 21.9-д заасан сонгогчдын нэрийн жагсаалтын сонгогчдын эцэг /эх/-ийн нэр, өөрийн нэр, регистрийн дугаар, байнга оршин суугаа газрын хаяг бүхий хэсгийг санал авах өдрөөс 20-иос доошгүй хоногийн өмнө цахим хэлбээрээр нэг удаа олгоно” гэсэн агуулгатай хэсгийг нэмж, дугаарыг өөрчлөхөөр Байнгын хорооноос дэмжигдсэн зарчмын зөрүүтэй санал нэгдсэн хуралдаанд оролцсон гишүүдийн олонхын дэмжлэг авч чадаагүй.

Харин УИХ-ын гишүүн С.Бямбацогт, С.Эрдэнэ нар дээрх зарчмын зөрүүтэй саналыг хэлэлцэж шийдвэрлэсэн талаарх чуулганы өчигдрийн хуралдааны санал хураалтыг хүчингүйд тооцох горимын санал гаргасныг нэгдсэн хуралдаанд оролцсон гишүүдийн 80.9 хувь нь дэмжив. Ингээд санал хураалт явуулахад чуулганы нэгдсэн хуралдаанд оролцсон гишүүдийн 73.5 хувь нь дэмжсэнээр хуулийн төслийн 21 дүгээр зүйлд “Улсын бүртгэлийн асуудал эрхэлсэн төрийн захиргааны байгууллага ээлжит сонгуульд оролцохоор бүртгүүлсэн нам, эвслийг төлөөлөх эрх бүхий этгээдийн хүсэлтийн дагуу энэ хуулийн 21.9-д заасан сонгогчдын нэрийн жагсаалтын сонгогчдын эцэг /эх/-ийн нэр, өөрийн нэр, регистрийн дугаар, байнга оршин суугаа газрын хаяг бүхий хэсгийг санал авах өдрөөс 20-иос доошгүй хоногийн өмнө цахим хэлбээрээр нэг удаа олгоно” гэсэн агуулгатай хэсгийг нэмж, дугаарыг өөрчлөхөөр тогтов. Уг санал дэмжигдсэнтэй холбогдуулан УИХ-ын гишүүн Ц.Нямдорж одоо мөрдөгдөж байгаа бүртгэлийн тухай хуулиар иргэний регистрийн дугаар, овог нэр, байнга оршин суугаа хаягийн талаарх мэдээлэл нь хязгаартай мэдээлэлд багтдаг учраас сонгогчдын нэрийн жагсаалтыг цахим хэлбэрээр авсан улс төрийн намууд хувилж олшруулахгүй, тараахгүй байх үүрэг хүлээх учиртай тул энэ талын зохицуулалтыг хуульд тусгах шаардлагатай гэсэн байр суурьтай байгаагаа хэллээ. Иймээс  Байнгын хороо энэ асуудлыг эцсийн хэлэлцүүлгийн явцад анхаарахыг хуралдаан даргалагч чиглэл болгосон юм.

Төрийн байгуулалтын байнгын хорооны хуралдаанаар хуулийн төслийн анхны хэлэлцүүлгийг хийх үед УИХ-ын гишүүн Т.Аюурсайхан төслийн 30 дугаар зүйлд “Авлига, албан тушаалын гэмт хэрэг үйлдэж шүүхээр ял шийтгүүлж байсан бол нэр дэвшихийг хориглоно” гэсэн агуулгатай 30.8 дахь хэсгийг нэмэх саналын бичгээр гаргасан нь дэмжигдэж, улмаар чуулганы нэгдсэн хуралдаанд оролцсон гишүүдийн олонх нь уг саналыг дэмжээд байв.  Харин хуралдаан даргалагчаас өгсөн чиглэлийн дагуу Байнгын хороо эцсийн хэлэлцүүлгийн шатанд төслийн энэ заалт нь Үндсэн хуульд болон Үндсэн хуулийн цэцийн дүгнэлттэй нийцэж буй эсэхийг дахин нягтлах шаардлагатай гэж үзээд холбогдох лавлагаа материал гаргуулан судалж нягталсан байна. Үндсэн хуулийн цэцийн 2008 оны 6 дугаар дүгнэлтэд тухайн үеийн хуульд тусгагдсан нэр дэвшигч нь “ялгүй байх” гэсэн заалтыг Үндсэн хууль зөрчсөн байна гэж дүгнэснийг Улсын Их Хурал 2008 оны 5 дугаар сарын 20-ны өдрийн нэгдсэн хуралдаанаараа хүлээн зөвшөөрөх нь зүйтэй хэмээн үзэж, тогтоол баталжээ. Иймээс төслийн анхны хэлэлцүүлгийн шатанд дэмжигдсэн дээрх саналыг хасахаар ажлын хэсгээс гаргасан зарчмын зөрүүтэй саналыг дэгийн хуулийн дагуу Байнгын хорооны хуралдаанд оролцсон гишүүдийн гуравны хоёроос доошгүй нь дэмжсэн. Харин чуулганы нэгдсэн хуралдаанд оролцсон гишүүдийн олонх нь энэ заалтыг хасахыг дэмжсэнгүй. Иймээс гишүүний гаргасан зарчмын зөрүүтэй санал төсөлд хэвээр үлдэв.

Ингээд хуралдааны явцад УИХ-ын дарга “Сонгуулийн хуулийг маргаан, зөрчилгүй, улс төрийн намуудын зөвшилцлийн хүрээнд, холбогдох байгууллагуудын саналд үндэслэн эцэслэн батлах ёстой” гэдэг байр суурийг илэрхийлж, УИХ-ын чуулганы нэгдсэн хуралдаанаар Монгол УИХ-ын сонгуулийн тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг явуулах бэлтгэлийг бүрэн хангах үүргийг Төрийн байгуулалтын байнгын хороонд өгсөн юм.

Энэ үндсэн дээр чуулганы нэгдсэн хуралдааны дундуур Төрийн байгуулалтын байнгын хороо дахин хуралдаж, хуулийн давхцал, зөрчлийг арилгах, хууль хоорондын уялдааг хангах үүднээс хуулийн төслийн зарим хэсэг, заалттай холбогдуулан ажлын хэсгээс гаргасан саналын томьёоллоор санал хурааж шийдвэрлэсэн юм. Тухайлбал, төслийн 28 дугаар зүйлийн 28.10 дахь хэсгийг “Эвслийн аль нэг нам даргаараа нэр дэвшүүлэх, намын сонгуулийн данснаас бие даан зарлага гаргах, өөр намуудын эвсэлд нэгдэн орох, бие даан болон өөр эвсэл байгуулан нөхөн, дахин сонгуульд оролцохыг хориглоно. Эвсэлд нэгдсэн намуудын олонх нь эвслээс гарсан тохиолдолд эвслийг тарсанд тооцно” гэж өөрчлөн найруулахаар тогтсоныг нэгдсэн хуралдаанд оролцсон гишүүдийн 72.5 хувь нь дэмжив. Мөн төслийн 33 дугаар зүйлийн 33.3.10, 33.3.12 дахь хэсэгт “авлига, албан тушаалын хэргээр ял шийтгүүлж байсан эсэх талаар цагдаагийн төв байгууллагын мэдээллийн сан хариуцсан нэгжийн лавлагаа” гэсэн агуулгатай хэсгийг нэмэх Байнгын хорооны саналыг нэгдсэн хуралдаанд оролцсон гишүүдийн олонх нь дэмжлээ.

Мөн төслийн "Хууль хүчин төгөлдөр болох" гэсэн 85 дугаар зүйлд хуулийг дагаж мөрдөх хугацааг "Энэ хуулийг 2019 оны 12 дугаар сарын 23-ны өдрөөс эхлэн дагаж мөрдөнө" хэмээн тодорхойлж тусгах саналыг дэмжсэн Байнгын хороо саналын томьёоллыг чуулганы нэгдсэн хуралдаанаас дэмжив.

Түүнчлэн улсын бүртгэлийн асуудал эрхэлсэн төрийн захиргааны байгууллага нь ээлжит сонгуульд оролцохоор бүртгүүлсэн нам, эвслийг төлөөлөх эрх бүхий этгээдийн хүсэлтийн дагуу энэ хуулийн 21.9-д заасан сонгогчдын нэрийн жагсаалтын сонгогчдын эцэг /эх/-ийн нэр, өөрийн нэр, регистрийн дугаар, байнга оршин суугаа газрын хаяг бүхий хэсгийг санал авах өдрөөс 20-иос доошгүй хоногийн өмнө цахим хэлбээрээр нэг удаа олгох санал дэмжигдсэн болон хуралдаан даргалагчаас өгсөн чиглэлийн дагуу УИХ-ын сонгуулийн тухай хуулийн төсөлтэй хамт өргөн мэдүүлсэн Зөрчлийн тухай хуульд нэмэлт, өөрчлөлт оруулах тухай хуулийн төслийн зохих зүйлд “сонгогчдын нэрийн жагсаалтыг хувилж олшруулах, тараах зөрчил гаргасан хүнийг таван мянган нэгжтэй тэнцэх, хуулийн этгээдийг тавин мянган нэгжтэй тэнцэх төгрөгөөр торгоно” гэсэг агуулгатай хэсэг нэмэхээр тогтлоо.

Ингээд Монгол УИХ-ын сонгуулийн тухай хуулийн төслийг бүхэлд нь батлах санал хураалт явуулахад чуулганы нэгдсэн хуралдаанд оролцсон 51 гишүүний 39 нь буюу 76.5 хувь нь дэмжиж, хуулийн төсөл эцэслэн батлагдав. Мөн уг хуулийн төсөлтэй хамт өргөн мэдүүлсэн бусад хуулийн төслүүдийг эцэслэн баталлаа.

Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Улстөр нийгэм

Сүүлийн 30 жилийн алдааг засах гэж системийн авлигатай тэмцэж байгааг Дундговьчууд сайшааж, багаар нь дэмжинэ гэв

Огноо:

,

Монгол Ардын намын дарга, Ерөнхий сайд Л.Оюун-Эрдэнэ Дундговь аймгийн иргэд сонгогчидтой уулзаж, 2024 оны УИХ-ын сонгуулийн онцлог, Үндсэн хуульд өөрчлөлт оруулж, холимог тогтолцоонд шилжсэнээр Монгол Улс анх удаа 126 гишүүнтэй парламенттай болж, нийгмийн төлөөлөл нэмэгдэх боломж бүрдсэн талаар танилцууллаа. 

Тэрбээр “Өнгөрсөн гурван жил гаруй хугацаанд авлига, хулгайтай тэмцсэний дүнд эдийн засаг -4.6 хувиас 7 хувь болж, валютын нөөц 5 тэрбум долларт хүрсэн. Тоо худлаа хэлдэггүй. Та бүхэн бидний эхлүүлсэн ажлыг үргэлжлүүлж, Монгол Ардын намаас нэр дэвшигчдийг багаар нь дэмжээрэй. Тусгаар тогтнол, бүрэн эрхт байдал, парламентын засаглалаа хамгаалан бэхжүүлэх сонголт юм шүү” гэлээ.

УИХ-ын сонгуулийн 7-р тойрогт Монгол Ардын намаас Б.Дэлгэрсайхан, Ө.Золбаяр, Б.Саранчимэг, Г.Батсуурь, Г.Мөнхцэцэг, Т.Энхтүвшин, Н.Наранбаатар нар нэр дэвшиж байна.

Сүүлийн 30 жилийн алдааг засах гэж системийн авлигатай тэмцэж, хөгжлийн чөдөр тушаа болсон олон зүйлийг өөрчлөхийн төлөө зоригтой, хурдтай ажиллаж буй Ерөнхий сайдынхаа эхлүүлсэн ажлыг үргэлжлүүлж, үр дүнг нь үзэхийн төлөө нэр дэвшигчдийг багаар нь дэмжихээ Дундговьчууд илэрхийлж байв. Мөн Ерөнхий сайдыг цар тахлын дараах эдийн засгийн хүндрэлийг давахдаа “Шинэ сэргэлтийн бодлого”, тэр дундаа Боомтын сэргэлтийг санаачлан эхлүүлснийг иргэд сайшааж, говь нутгийн хөгжлийн төлөө багаараа нэг сэтгэлтэй ажиллахыг нэр дэвшигчдэд захилаа.

Дундговь аймагт 2016-2024 онд улсын төсөв болон гадаадын зээл, тусламжийн эх үүсвэрээр нийт 303.9 тэрбум төгрөгийн хөрөнгө оруулалтын төсөл, арга хэмжээг хэрэгжүүлсэн байна. Тухайлбал, аймгийн төвийн бохир ус цэвэрлэх байгууламж, Төв цэнгэлдэх хүрээлэн, Ахмадын хөгжлийн төв, хөгжлийн бэрхшээлтэй иргэний төв, аймгийн нэгдсэн эмнэлэг, Өлзийт мандал өрхийн эмнэлгийн өргөтгөл, Хулд сумын эрүүл мэндийн төв, Дэлгэрцогт, Сайхан-Овоо, Эрдэнэдалай сумын инженерийн дэд бүтэц, Сайхан-Овоо сумын хүүхдийн сургууль, Адаацаг сумын сургуулийн спорт заал, Гурвансайхан, Луус сумын хүүхдийн дотуур байр, аймгийн төвийн 2-р цэцэрлэг,  Дэлгэрцогт сумын цэцэрлэг, Өлзийт, Эрдэнэдалай сумын Соёлын төв, аймгийн төвийн цахилгаан станцын хуваарилах сүлжээний шинэчлэл, Мандал дэд станцын өргөтгөлийг ашиглалтад оруулж, бусад төслийн ажил эхэлсэн байна.

Харин ирэх дөрвөн жилд Өрнө-Дорно, Өмнөд-Умардын орнуудын авто замын сүлжээнд холбогдох говийн босоо тэнхлэгийн Тавантолгой-Мандалговь чиглэлийн 130 км төмөр зам, аймгийн төвд шинэ дулааны станц барьж, хог хаягдал боловсруулах үйлдвэр байгуулахаар Монгол Ардын намын мөрийн хөтөлбөрт тусгасан. Мөн мянганы төмөр замын хэсэг Мандалговь-Чойр чиглэлийн 180 км төмөр замыг барьж, хүрэн нүүрсийг Бичигт боомтоор гаргахаар төлөвлөж байна.

 

 

 

 

Дэлгэрэнгүй унших

Улстөр нийгэм

Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурдтай, сайн ажиллаж байгаа учир бодлогоо үргэлжлүүлэх ёстой

Огноо:

,

Өмнөговь аймагт 2016-2024 онд улсын төсөв болон гадаадын зээл, тусламжийн эх үүсвэрээр нийт 1.6 их наяд төгрөгийн хөрөнгө оруулалтын төсөл, арга хэмжээг хэрэгжүүлсэн гэдгийг Монгол Ардын намын дарга, Ерөнхий сайд Л.Оюун-Эрдэнэ Өмнөговь аймагт ажиллах үеэрээ онцоллоо. 

Тэрбээр “Дэлхийд гайхагдсан элсэн манхан, үлэг гүрвэлийн өндөг,  эрдэс баялгийн охь болсон, оюунлаг Өмнөговьчууд та бүхэнтэйгээ дахин уулзаж байгаадаа баяртай байна. Ерөнхий сайдын хувиар Өмнөговь аймагт өнгөрсөн хугацаанд зургаан удаа буюу хамгийн олон ажиллажээ. Энэ удаагийн сонгууль ард түмэн ялах уу, авлигачид ялах уу гэдгийг шийдэх учир Өмнөговьчууд та бүхэн Монгол Ардын намд саналаа өгч, эхлүүлсэн ажил, шударга ёсны төлөөх тэмцлийг нь үргэлжлүүлээрэй. Нүүрсний хулгайтай тэмцэсний дүнд монголчууд бид нийтээрээ байгалийн баялгаасаа өгөөж хүртэж эхэлсэн. “Эрдэнэс Тавантолгой”-н 1072 хувьцааг амилуулж ногдол ашгаа тараасан. Үндэсний баялгийн сангаа байгуулж чадсан, эдийн засаг өссөн, анх удаа төсөв ашигтай гарсан гээд олон сайн мэдээ, эерэг өөрчлөлтүүд гарлаа. Ард түмэн ялах уу, хилийн чанадаас ажиглаж буй бүлэглэл ялах уу гэдэг сонголтын өмнө та бид хамтдаа байна” гэлээ.  

Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурдтай, сайн ажиллаж байгаа учир бодлогоо үргэлжлүүлэх ёстой. Үүнд УИХ-ын сонгуулийн 7-р тойрогт Монгол Ардын намаас нэр дэвшиж буй Б.Дэлгэрсайхан, Ө.Золбаяр, Б.Саранчимэг, Г.Батсуурь, Г.Мөнхцэцэг, Т.Энхтүвшин, Н.Наранбаатар нар хүч нэмж, мөрийн хөтөлбөрөө биелүүлж ажиллах учиртайг Өмнөговьчууд захиж байв. Мөн тус намын энэ удаагийн сонгуульд дэвшүүлсэн мөрийн хөтөлбөр бодитой, жагсаалтаар нэр дэвшүүлсэн төлөөллүүд нэр цэвэр, тойрогт нэр дэвшин өрсөлдөж буй хүмүүс нь эв нэгдэлтэй, ажил, мэргэжлийн өндөр туршлагатай байна. Энэ нь бусад нам, улс төрийн хүчний нэр дэвшигчдээс ялгарч байгаа учраас Монгол Ардын намын нэр дэвшигчдийг багаар нь сонгохоо илэрхийлж байлаа.

Ерөнхий сайд өмнө нь Өмнөговь аймагт ажиллах үеэр иргэдийн гаргасан санал хүсэлтийн дагуу шаардлагатай төсөл арга хэмжээг эрэмбэлсэн. Энэ хүрээнд:

-Гашуунсухайт, Шивээхүрэнгийн хилийн боомтын шинэчлэл,

-Баяндалай-Гурвантэс чиглэлийн 80 км хатуу хучилттай авто замын ажил ( улсын төсөв )

-Гурвансайхан нисэх буудлын аэродромын өргөтгөл, навигацийн тоног төхөөрөмж (зураг төсөв)

-Аймгийн төвийн цэвэрлэх байгууламж

-Өмнөговь аймгийн төвийг нийслэлтэй холбосон авто замын “Шар тээг”-ийн уулзвараас Цогтцэций сумын төв хүртэлх 59.6 км хатуу хучилттай авто зам төсөл

-Оюутолгой-Цагаан суварга чиглэлийн агаарын шугам, дэд станц төсөл хэрэгжиж байна.

Харин ирэх дөрвөн жилд хойд, урд хөрштэй холбогдох босоо тэнхлэгийн авто зам, төмөр замын төслүүд хэрэгжүүлэхээ Ерөнхий сайд онцоллоо. Тухайлбал, Шивээхүрэн-Арцсуурь боомтын чиглэлийн баруун босоо төмөр замын 143 км-ийг, Арвайхээр - Шивээхүрэн боомт чиглэлийн 115 км авто зам, Тавантолгой-Мандалговь чиглэлийн 100 км төмөр зам барьж, Гашуунсухайт боомтыг олон улсын зэрэглэлтэй болгох, Шивээхүрэн, Ханги боомтыг өргөжүүлж нэвтрүүлэх хүчин чадлыг нэмэгдүүлж, Өмнөговь аймгийн нисэх буудлыг 4D ангиллынх болгон өргөтгөх юм.

Мөн Тавантолгойн бүлэг ордыг түшиглэн хүнд үйлдвэрлэлийн “Үйлдвэр технологийн парк” байгуулах ажлыг эхлүүлж, говийн бүсийг усаар хангах “Хэрлэн тоонот”, “Орхон Онги” төслийн ус дамжуулах шугамыг үе шаттайгаар барихаар Монгол Ардын нам мөрийн хөтөлбөртөө тусгажээ. 

 

 

Дэлгэрэнгүй унших

Улстөр нийгэм

Т.Мөнхсайхан, Л.Нинжжамц, Ж.Алдаржавхлан нарын иргэд, сонгогчидтой хийх уулзалт үргэлжилж байна

Огноо:

,

-Төрийн албанд түүртэлгүй зүтгэх залуус тул дэмжинэ-

2024 оны УИХ-ын сонгуулийн Xll тойрог, Хан-Уул дүүрэгт Монгол Ардын намаас нэр дэвшигч, хүний их эмч Т.Мөнхсайхан, Хан-Уул дүүргийн Засаг дарга Ж.Алдаржавхлан, УИХ-ын дарга Г.Занданшатарын зөвлөх, хэвлэл мэдээллийн тод төлөөлөгч, сэтгүүлч Л.Нинжжамц нар Хан-Уул дүүргийн 11, 16, 17, 21 дүгээр хорооны иргэдтэй уулзаж, Монгол Ардын намаас дэвшүүлсэн "Шинэ сэргэлтийн бодлого-Бүсчилсэн хөгжлийн реформ" мөрийн хөтөлбөрөө дэлгэрэнгүй танилцуулж, санал хүсэлтийг нь сонслоо. Уулзалтын үеэр иргэдийн зүгээс зам харилцааны асуудал, дахин төлөвлөлт, сургууль, цэцэрлэгийн хүртээмж, барилгын хүртээмж стандарт зэрэг олон асуудлыг хөндөж байлаа.

Дүүргийн Засаг дарга Ж.Алдаржавхлан сургууль, цэцэрлэгийн хүртээмжийг нэмэгдүүлэхийн тулд сул байгаа газруудын зөвшөөрлийг цуцлуулж, ААН, компаниудтай зөвшилцсөний үндсэн дээр газрыг нь шилжүүлэн авч, улс, нийслэлийн төсвөөр нийтэд хэрэгтэй шаардлагатай байгаа сургууль, цэцэрлэгийг нэмж бариулах боломжтой болохыг тайлбарлав.

Ж.Алдаржавхлан “Их хуралд нэрээ дэвшүүлэх болсон шалтгаан нь хороо, дүүргийн ажил ямар байдгийг мэдэхийн хувьд анхан шатны нэгжид тулгамддаг асуудлыг бодлогын хэмжээнд шийдвэрлэхэд чиглэж байгаа. Мөн хийж дуусгаагүй байгаа олон бүтээн байгуулалтын ажлаа үргэлжлүүлэн хийнэ. Үр дүнг нь иргэдийнхээ хамт үзнэ” гэлээ. Түүний хувьд 20 минутын хот төсөл хөтөлбөрийн гол санаачлагчдын нэг бөгөөд “Энэ хөтөлбөрийг МАН мөрийн хөтөлбөртөө оруулж, улмаар хууль болгон батлан гаргасан. Ирэх оны нэгдүгээр сараас хэрэгжиж эхэлснээр нийслэл хот цоо шинэ бүтцээр ажиллаж, хөгжинө” гэдгийг иргэдэд тайлбарласан юм.  

Нэр дэвшигч Л.Нинжжамцын хувьд нийгмийн сайн сайхны төлөө, тодруулбал, өрх толгойлсон аав, ээж, хөгжлийн бэрхшээлтэй иргэд, залуусын нийгмийн асуудалд илүү анхаарахаа илэрхийллээ. Түүнийг иргэд “Өндөр боловсролтой, төрд олон жил ажилласан туршлагатай эмэгтэй. Ажилгүйдэл, ядуурал, хүн амын өвчлөл, гэр бүлийн хүчирхийлэл, тэгш бус боловсрол, хүний эрхийн тал дээр бусдаас илүү мэдрэмжтэй байж, сайн ажиллаж чадна гэдэгт итгэж байна” хэмээж байв.

Нэр дэвшигч, Төрийн соёрхолт их эмч Т.Мөнхсайхан мэргэжлээрээ ГССҮТ-д 10 гаруй жил ажиллахдаа Монгол Улсад хийгддэггүй байсан хэд хэдэн мэс заслыг нутагшуулсан ачтай. Мөн хамгийн хүнд хэцүү үе болох ковидын үед Эрүүл мэндийн сайдаар сайн ажилласан болохыг иргэд сайшааж байв. Түүнчлэн ахмадууд хэдэн сараар хүлээж байж авдаг байсан хөнгөлөлттэй эмийн дарааллыг арилгаж, эм бичүүлж авах ажлыг хялбар болгосонд ам сайтай байв.

Нэр дэвшигч Т.Мөнхсайхан “Эмч хүний хувьд цагаан халадтай, чагнууран гоёлтой, төрдөө тангараг өргөсөн учраас энэ удаад зөв сонгууль хийнэ. Сүүлийн үед надтай холбоотой гүтгэсэн сөрөг мэдээлэл яваад байна. Хөгшин настай аавын минь зураг, дуу хоолойг ашигласан мэдээлэл цацах болов. Мэдээлэлд эмзэглэхгүй байгаа. Тиймээс гүтгэдэг хар сонгууль биш зөв жишгийг тогтоосон цагаан сонгууль хийх болно. Улстөрийн зөв соёлыг бий болгоё” хэмээн уриаллаа.

Ийнхүү санал бодлоо хуваалцсаны дараа нэр дэвшигчид “Их төрөө төвхнүүлэх, эрх үүрэг хүлээсэн сонгогч та бүхэндээ баярлалаа. МАН-аас Хан-Уул дүүрэгт нэр дэвшигчдийг багаар нь дэмжиж байж бид гурвын хэлэх үг, хийх ажил хүчтэй байна шүү” хэмээв. 

 

Дэлгэрэнгүй унших
сурталчилгаа
Улстөр нийгэм12 цаг 51 минут

Сүүлийн 30 жилийн алдааг засах гэж системийн авлигатай тэмцэж байгаа...

Улстөр нийгэм14 цаг 59 минут

Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурд...

Улстөр нийгэм17 цаг 51 минут

Т.Мөнхсайхан, Л.Нинжжамц, Ж.Алдаржавхлан нарын иргэд, сонгогчидтой х...

Улстөр нийгэм2024/06/22

Халхголчууд Засгийн газрын бодлогыг тогтвортой үргэлжлүүлж, МАН-ыг б...

Цаг үе2024/06/22

Монгол Ардын намаас Төвийн бүсэд нэр дэвшигчид Дархан-Уул аймагт ажи...

Улстөр нийгэм2024/06/22

Баянзүрх дүүргийн 13, 14, 42 дугаар хорооны иргэд МАН-ын нэр дэвшигч...

Улстөр нийгэм2024/06/22

Ерөнхий сайдын эхлүүлсэн ажлыг үргэлжлүүлэхийн тулд Монгол Ардын нам...

Улстөр нийгэм2024/06/22

Налайх, Багануур, Багахангай дүүргийн бүтээн байгуулалтыг үргэлжлүүл...

Улстөр нийгэм2024/06/22

Говьсүмбэрчүүд хийсэн ажил, хэлэх үгтэй нэр дэвшигчдэд итгэл хүлээлг...

Улстөр нийгэм2024/06/22

Монгол Ардын намаас Сонгинохайрхан дүүрэгт нэр дэвшигчид “Улаа...

Санал болгох