Шударга мэдээ
Ухаалаг хот ба гео оройн зайн мэдээллийн технологи семинар боллоо
НЗДТГ, АНУ-ын Вашингтон хотын Потомакийн их сургууль хоорондын хамтын ажиллагааны хүрээнд Ухаалаг хот ба гео орон зайн мэдээллийн технологи семинар өнөөдөр боллоо. Семинарт нийслэлийн нутгийн захиргааны 33 байгууллагын хот төлөвлөлт, хотын тулгамдсан асуудлыг хариуцан ажилладаг албан хаагчид, инженерүүд зэрэг 71 албан хаагч хамрагдав.
Тус семинарт АНУ-ын Вашингтон хотын Потомакийн их сургуулийн Эрдмийн зөвлөлийн декан, бизнесийн ухааны доктор, профессор С.Андроников оролцсон юм. Тэрбээр илтгэлээрээ Улаанбаатар хотын тулгамдаж буй асуудал, Улаанбаатар хотыг хэрхэн тогтвортой, үр ашигтай хөгжүүлэх вэ, ухаалаг хот ба орон зайн мэдээллийн технологийн уялдаа, ухаалаг хотын шийдэл, дүрэм, засаглал, ухаалаг хотын сайн туршлага, гео орон зайн мэдээллийн технологийн орчин үеийн чиг хандлага зэрэг сонирхолтой мэдээллийг хүргэлээ.
Семинарт оролцогчид газар зүйн орон зайн мэдээллийг аль талаас нь судалбал үр өгөөжтэй вэ, Улаанбаатар хотын боломжийг хэрхэн харж байна вэ, бидэнд ямар давуу тал байгаа вэ, дата өгөгдлийг хэрхэн бий болгох вэ, бид юун дээр анхаарах вэ, орон зайн технологийг хөгжүүлэхэд эрсдэл нь юу вэ зэрэг сонирхсон асуултдаа хариулт авсан юм.
Доктор, профессор С.Андроников Улаанбаатар хотыг ухаалаг хот болгон хөгжүүлэхэд хямд өртгөөр виртуал хотыг бий болгох боломжуудыг эрэлхийлэх, төрийн байгууллагууд дата мэдээллээ нээлттэй солилцож, асуудлыг цаг тухайд нь шуурхай шийдэх орчинг бүрдүүлэх нь чухал болохыг онцоллоо.
Шударга мэдээ
Баянхошуунд 260 айлын ногоон орон сууцны төсөл хэрэгжиж байна
Улаанбаатар хотын агаар, хөрсний бохирдлыг бууруулах, гэр хорооллыг орон сууцжуулж иргэдийн ая тухтай, таатай орчинд амьдрах нөхцөлийг бүрдүүлэх зорилтын хүрээнд “Нийслэлийн орон сууцны корпораци” ХК-иас Сонгинохайрхан дүүргийн есдүгээр хороонд найман блок нийт 260 айлын ногоон орон сууцны төслийг хэрэгжүүлж буй.
Тус төсөл нь Баянхошуу дэд төвийн төлөвлөгөөний дагуу хэрэгжиж байгаа бөгөөд эхний ээлжийн барилгуудын каркас цутгалтын ажлыг хийж, барилгын суурийг хөөмөл шилэн дулаалгаар дулаалсан бөгөөд барилга угсралтын ажил 50 хувьтай үргэлжилж байна. Түүнчлэн дараагийн ээлжийн дөрвөн блок 150 айлын ногоон орон сууцны барилга угсралтын ажил эхлээд байна.
Ташрамд дурдахад тус төслийн барилга угсралтын ажлын гүйцэтгэгчээр “Хаппи бьюлдинг”, “Сити ландмарк “, “Содон номин констракшн” болон “Цамхаг Констракшн” ХХК шалгарсан бол гадна инженерийн сүлжээний ажлын гүйцэтгэгчээр “Сан” ХХК шалгарч төслийн ажил үргэлжилж байна. “Нийслэлийн орон сууцны корпораци” ХК-ийн Гүйцэтгэх Захирал М.Говьсайхан гүйцэтгэгч компаниудад төслийг төлөвлөсөн хугацаандаа ашиглалтад оруулахыг үүрэг болголоо гэж Нийслэлийн орон сууцны корпораци ХК-иас мэдээллээ.
Шударга мэдээ
ЕБС-иудын хичээлийн жил 3 улиралтай болно
Боловсролын сайдын 2024 оны 7 дугаар сарын 19-ний өдрийн А/01 тоот тушаалаар өмчийн бүх хэлбэрийн Ерөнхий боловсролын сургуулийн хичээлийн жилийн бүтцийг батлав. Үүнийг сургуулиудад даруй хүргүүлэх аж. Хичээлийн шинэ жилийн бүтцийг эрт өгснөөр сургуулиуд бүтэн жилийнхээ тогтмол ажлын төлөвлөгөөг (ТАТ) боловсруулан, эцэг эх, сурагчдад эртхэн мэдээлэх боломжтой болно.
Үүний үр дүнд гэр бүлийн амралт, аялал, эцэг эхийн ажлын төлөвлөлтийг эртхэн хийх боломжтой болох юм. Бид хугацаа тулгасан, гэнэтийн цочроосон шийдвэр гаргахгүй байхыг анхаарч ажиллана.
Энэ хичээлийн жилийн төлөвлөлтийн нэг онцлог нь бие даалтыг оруулж ирсэн явдал болно. Бие даалтын хугацаанд музей, театр үзэх, 6 настнуудыг нүд, шүд, зүрх судасны оношилгоо, гамшгийн сургалтад хамруулах зэрэг ажлыг зохион байгуулах болно гэж Боловсрол, шинжлэх ухааны яамнаас мэдээллээ.
Шударга мэдээ
30 дугаар сургуулийн хуучин барилгыг нурааж, шинэ сургууль барина
Нийслэлийн ИТХ-ын Зөвлөл өнөөдөр хуралдлаа. Мэргэжлийн байгууллагын дүгнэлтийг үндэслэн Нийслэлийн ЕБ-ын 30 дугаар сургуулийн хуучин барилгыг буулгаж, шинээр сургуулийн барилга барихаар болсон. Тиймээс тус сургуульд бүртгэлтэй барилга байгууламжийг акталж, нийслэлийн өмчийн бүртгэлээс хасах асуудлыг танилцууллаа.
Энэхүү барилга нь 1996 онд ашиглалтад орсон, гурван давхар, 3693 м/кв талбайтай юм. Мэргэжлийн байгууллагын дүгнэлтээр барилга нуралтад орж, даацын хийц эвдрэл гарч эхэлсэн, дулаан алдагдал ихтэй, шугам сүлжээнд тогтмол засвар үйлчилгээ хийж байгаагүйгээс мөн эвдэрсэн байна. Хуучин барилгыг нурааж, 11665 м/кв талбайтай шинэ сургуулийн барилга барих юм.
Зөвлөлийн хуралдаанаас Нийслэлийн ИТХ-ын ээлжит бус 22 дугаар хуралдааныг 2024 оны долоодугаар сарын 24-ний өдөр хуралдуулахаар товлов. Хуралдаанаар дээрх болон бусад асуудлуудыг хэлэлцэн шийдвэрлэнэ гэж НИТХ-ын ХМТ-өөс мэдээллээ.
