Бидэнтэй нэгдэх

Шударга мэдээ

“Хэрэглэгчийн аян-2022” сэдэвт аяныг зохион байгуулж байна

Огноо:

3 жил 4 сар.өмнө

,

Эрчим хүчний зохицуулах хорооноос тав  дахь жилдээ “Хэрэглэгчийн аян-2022” аяныг 2022 оны нэгдүгээр сарын 01-ний өдрөөс 2022 оны 02 дугаар сарын 15-ны өдрийг хүртэлх хугацаанд зохион байгуулж байна. Энэхүү аянд улсын хэмжээнд цахилгаан, дулаанаар зохицуулалттай хангах тусгай зөвшөөрөл эзэмшигч төвийн бүсийн 97 хуулийн этгээд, Аймаг, нийслэлийн 22 зохицуулах зөвлөлөөс дулаан үйлдвэрлэх, цахилгаан, дулаан түгээх, зохицуулалттай тусгай зөвшөөрөлтэй орон нутгийн 315 хуулийн этгээд нийт 412 тусгай зөвшөөрөл эзэмшигчид хамаарагдаж байгаа юм.

Эрчим хүчний зохицуулах хорооноос Нийслэл, орон нутагт цахилгаан, дулаан түгээх, зохицуулалттай хангах тусгай зөвшөөрлийн хүрээнд үйл ажиллагаа явуулж байгаа тусгай зөвшөөрөл эзэмшигчдийн хариуцлага, үйл ажиллагааг дээшлүүлэх, шугам тоноглолд гарч болзошгүй гэнэтийн аваар саатлын үед түргэн шуурхай арга хэмжээ авах, өвлийн оргил ачааллын үед хэрэглэгчдийг стандартын шаардлагад нийцсэн эрчим хүчээр хангах нөхцөлийг бүрдүүлэхэд холбогдох зөвлөмж, чиглэлийг өгч ажиллана.

 Үүнд: 
  • Эрчим хүчний хэрэглэгчдийг 2021-2022 оны өвлийн оргил ачааллын үед стандартын шаардлагад нийцсэн эрчим хүчээр хангахад хяналт тавих, хэрэглэгчийн хуулиар олгогдсон эрх ашгийг дээдлэн хамгаалах;
  • Цахилгаан, дулаан түгээх, цахилгаан, дулаанаар зохицуулалттай хангах тусгай зөвшөөрөл эзэмшигчдийн хариуцлага, үйл ажиллагааг дээшлүүлэх, техникийн бүрэн бүтэн байдлыг хангахад хяналт тавих;
  • Түгээх шугам сүлжээнд гарч болзошгүй аваар, саатлаас урьдчилан сэргийлэх, гарсан гэмтэл, саатлыг түргэн шуурхай засварлаж, хэвийн болгоход холбогдох зөвлөмж, чиглэл өгөх;
  • Хэрэглэгчийн санал, хүсэлтийн шийдвэрлэлт, диспетчер, хоногийн үйл ажиллагааны мэдээг нэгтгэх, хяналт тавих;
  • Эрчим хүчний хэрэглэгчдэд хуулиар олгогдсон эрх, үүргийг таниулах, эрчим хүчний зүй зохистой хэрэглээ, хариуцлагыг дээшлүүлэх талаар сурталчлах, мэдлэг, боловсрол олгоно.  
Аяны хүрээнд тусгай зөвшөөрөл эзэмшигчдийн үйл ажиллагааны хоногийн мэдээг цахимаар буюу Google sheet ашиглан тогтмол хүлээн авч хяналт тавих бөгөөд, цахилгаан, дулаан хангамжийн доголдол, хэрэглэгчийн гомдол, саналыг үндэслэн шаардлагатай тохиолдолд цахилгаан, дулаан түгээх, хангах тусгай зөвшөөрөл эзэмшигч орон нутгийн болон хувийн хэвшлийн орон сууцны ашиглалт үйлчилгээ хариуцсан байгууллагуудыг сонгож үйл ажиллагааг газар дээр нь шалгаж, холбогдох зөрчил дутагдлыг арилгуулж ажиллах юм байна. Энэ талаар Эрчим хүчний зохицуулах хорооноос Аймаг, Нийслэлийн зохицуулах зөвлөл, болон цахилгаан, дулаан түгээх, хангах тусгай зөвшөөрөл эзэмшигч компаниудын удирдлагуудтай цахим уулзалт зохион байгуулж, холбогдох дүрэм журмыг танилцуулсан байна.
Уншсан:2397
Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Шударга мэдээ

БНХАУ-ын аялал жуулчлалын компанийн удирдлагууд Улаанбаатар хоттой танилцлаа

Огноо:

50 минутын өмнө

,

Нийслэлийн Засаг даргын Тамгын газар, Нийслэлийн Аялал жуулчлалын газар, Монголын Аялал жуулчлалын холбоо, “Зуут травел” компани хамтран тавдугаар сарын 8-10-ны өдрүүдэд “Улаанбаатар хотыг олон улсад сурталчлах арга хэмжээ” хөтөлбөрийг зохион байгуулж, БНХАУ-ын аялал жуулчлалын 100 компанийг урьж, дотоодын аялал жуулчлалын онцлогийг танилцууллаа.

Гадаадын жуулчдыг нэмэгдүүлэх зорилготой энэхүү хөтөлбөрийн хүрээнд Улаанбаатар хот болон хот орчмын аялал жуулчлалын бүтээгдэхүүн үйлчилгээтэй танилцахаар БНХАУ-ын  Бээжин, Шанхай, Сычуань, Хэбэй, Юньнан, Тяньжин, Гуанжоу зэрэг 18 мужийн 100 гаруй шилдэг аялал жуулчлалын байгууллагын төлөөлөгчид ирсэн юм.

Хөтөлбөрийн хүрээнд хоёр улсын аялал жуулчлалын хамтын ажиллагааг өргөжүүлэх “Аялал жуулчлалын бизнес эрхлэгчдийн (B2B) уулзалт”-ыг зохион байгуулав. Уулзалтад НИТХ-ын дарга А.Баяр, Нийслэлийн Засаг дарга бөгөөд Улаанбаатар хотын Захирагчийн дэд бүтэц, эрчим хүчний асуудал хариуцсан зөвлөх  Г.Батсайхан, Нийслэлийн Аялал жуулчлалын газрын Маркетинг сурталчилгаа хариуцсан мэргэжилтэн Н.Алтанзаяа, Монголын аялал жуулчлалын холбооны гүйцэтгэх захирал Д.Отгонбаяр зэрэг албаныхан оролцлоо. Уулзалтыг нээж НИТХ-ын дарга А.Баяр “2024 онд Монгол Улс, Бүгд Найрамдах Хятад Ард Улсын дипломат харилцаа тогтоосны 75 жилийн ой болж өнгөрсөн бөгөөд энэ хугацаанд бид худалдаа, эдийн засаг, аялал жуулчлал, соёл, хүмүүнлэгийн чиглэлийн хамтын ажиллагаагаа өргөжүүлэн бэхжүүлж улмаар иж бүрэн стратегийн түншлэлийн түвшинд хүрч идэвхтэй хамтран ажиллаж байгаа билээ.  Хоёр орны ард түмний аялал жуулчлал, соёлын хэлхээ холбоог бататгаж, иргэд хоорондын харилцан ойлголцлыг зузаатгах нь чухал ач холбогдолтой бөгөөд Улаанбаатар хотын аялал жуулчлалын бүтээгдэхүүн үйлчилгээг сурталчлах, жуулчдын тоог нэмэгдүүлэх ажлын хүрээнд энэхүү арга хэмжээг зохион байгуулж байна. Өмнөх онуудад мөн хоёр орны аялал жуулчлалыг хөгжүүлэх чиглэлээр нийслэлийн зүгээс Монгол Улс, БНХАУ, ОХУ-ын Цайны замын авто машинтай аялал, Соёлын өвийг сэргээх чиглэлээр Цайны замын хөшөөг Улаанбаатар хотод бүтээн байгуулсан. Түүнчлэн тусгай сонирхлын аялал жуулчлалыг хөгжүүлэх чиглэлээр БНХАУ болон олон улсаас ирж оролцдог “Талын салхи” олон улсын мото фестивалийг 10 дахь жилдээ зохион байгуулах гэж байна. Энэхүү арга хэмжээгээр дамжуулан Улаанбаатар хотын соёл, аялал жуулчлалын нөөц хэрхэн өсөн нэмэгдэж байгааг онцлон харж, өөрсдийн ажлын шугамаар сурталчлан таниулна гэдэгт итгэлтэй байна” хэмээн хэллээ.

Уулзалтад Монголын талаас Хятад улс руу аялал жуулчлалын үйлчилгээ үзүүлдэг дотоодын 15 компани болон БНХАУ-ын аялал жуулчлалын 100 компанийн төлөөлөл оролцож харилцан туршлага солилцов. Хятадын аялал жуулчлалын компаниуд Монголын аялал жуулчлалын компаниудтай хэрхэн хамтарч ажиллах боломжтой, групп аялал, гэр бүлийн аялал, ганцаарчилсан аялал, урт хугацааны аяллын ямар хөтөлбөрүүд байгаа талаар сонирхож мэдээлэл солилцов. Түүнчлэн БНХАУ-ын аялал жуулчлалын компаниудын төлөөллүүд Сүхбаатарын талбай, “Чингис хааны музей”, Гандантэгчэнлин хийдээр аялж, хот орчмын буюу Тэрэлж дэх хэд хэдэн аялал жуулчлалын цогцолбор газруудын үйл ажиллагаатай танилцаж, монголын өв соёлыг илтгэсэн жуулчдад зориулсан тоглолт зэргийг үзэж сонирхлоо. Хөтөлбөрийн хүрээнд БНХАУ-ын аялал жуулчлалын компаниуд Улаанбаатарын аялал жуулчлалын бүтээгдэхүүн, үйлчилгээтэй танилцаж, Монгол руу чиглэсэн Хятадын жуулчдын тоог нэмэгдүүлэхэд анхаарч, хамтарч ажиллахад бэлэн гэдгээ илэрхийллээ. 

Эх сурвалж: НИТХ-ХМОНХА

Дэлгэрэнгүй унших

Шударга мэдээ

Хяналт шалгалт Говьсүмбэр аймагт үргэлжилж байна

Огноо:

22 цаг 24 минут

,

Монгол Улсын Шадар сайд С.Амарсайханы тушаалаар байгуулагдсан ажлын хэсэг Говьсүмбэр аймагт хяналт шалгалтаа үргэлжүүлж байна.
 
Хяналт шалгалтаар “Балданзасаг” худалдааны төвд явуулын пестицидийн аппаратыг ашиглан түргэвчилсэн аргаар шинжилгээ хийлээ.
 
Мөн эл аймгийн Мал эмнэлгийн лаборатори итгэмжлэлгүй байгаа нь тогтоогдлоо. Уг лаборатори нь орон сууцны зориулалттай барилгын нэгдүгээр давхарт байрлаж байгаа бөгөөд барилгын бүтэц, зохион байгуулалт нь эрүүл ахуй, аюулгүй ажиллагааны шаардлагыг хангахгүй байгаа нь тодорхой боллоо.
 
Нөхцөл байдалтай газар дээр нь танилцсан Үндэсний итгэмжлэлийн төвийн дарга С.Ням-Эрдэнэ тус лабораторийн аюулгүй байдал, багтаамжийн хүрэлцээ болон орчны нөхцөл байдал нь шаардлага хангахгүй байгааг онцолж, уг асуудалд яаралтай анхаарал хандуулан холбогдох байгууллагуудтай хамтран зохих арга хэмжээг авах шаардлагатайг онцоллоо.
 
Түүнчлэн худалдааны төвүүдэд ашиглагдаж жинг хэмжил зүйн шаардлагын дагуу шалгасан байна. Хяналт шалгалтын үр дүнд жингүүд бүгд лац, баталгаажуулалтын тэмдэгтэй, хүчин төгөлдөр баталгаажилттай байна гэж Стандарт, хэмжил зүйн газраас мэдээллээ.  
 
Дэлгэрэнгүй унших

Шударга мэдээ

Нийслэлд үйл ажиллагаа явуулж буй 97 барилга байгууламжид хамтарсан төлөвлөгөөт шалгалт хийж эхэллээ

Огноо:

4 өдрийн өмнө

,

Нийслэл хот 2025 оныг “Бүтээн байгуулалтын жил” болгон зарласан. Барилгын улирал эхэлсэнтэй холбоотойгоор нийслэлийн Хяналт шалгалтын газраас нийслэлд үйл ажиллагаа явуулж буй 97 барилга байгууламжид 11 чиглэлээр хамтарсан төлөвлөгөөт хяналт шалгалтыг хийж эхэллээ. Төлөвлөгөөт шалгалтыг тавдугаар сарын 5-ны өдрөөс долоодугаар сарын 5-ны хооронд зохион байгуулна.


Энэ хүрээнд барилга байгууламжийн чанар, аюулгүй байдал, барилгын талбайн зохион байгуулалт, орчны аюулгүй байдал, батлагдсан ерөнхий төлөвлөгөө, шугам сүлжээний угсралтыг онцгойлон шалгах бөгөөд илэрсэн зөрчлийг арилгуулах арга хэмжээг авч, гүйцэтгэлд хяналт хийх юм.

Хяналт шалгалтын талаар ХШГ-ын Дэд бүтцийн стандарт, хяналтын хэлтсийн дарга Б.Найрамдал “Сүүлийн жилүүдэд нийслэл хотод барилга, бүтээн байгуулалтын ажил эрчимтэй өрнөж буй. Тэр хэрээр эрсдэлүүд гарч байна. Тухайлбал, барилга байгууламж ашиглалтад орсны дараа зөрчил ихээр илэрч байгааг дурдах нь зүйтэй. Иймд угсралтын явцад хяналт шалгалтыг сайжруулах, хариуцлагыг өндөржүүлэх зайлшгүй шаардлагатай. Энэ хүрээнд хяналт шалгалт хийхээр төлөвлөсөн 97 аж ахуйн нэгж, байгууллагад Төрийн хяналт шалгалтын тухай хуульд заасны дагуу тав хоногийн өмнө урьдчилан мэдэгдэж, хяналт шалгалтыг хийж байна” гэлээ. Ташрамд, Хан-Уул, Баянзүрх, Сүхбаатар дүүргүүдэд хамгийн их барилга байгууламж барьж байгаа бөгөөд дийлэнх нь орон сууцны зориулалтаар баригдаж байгаа аж.

Дэлгэрэнгүй унших

Санал болгох