Цаг үе
Хятадын банкир асан авлига, хээл хахуулийн хэрэгт холбогдож цаазаар авах ял сонсов
Телевизээр мөн түүний Бээжин хот дахь орон сууцнаас олдслн бэлэн мөнгөөр дүүрсэн сэйф, шүүгээний бичлэгийг нийтэд дамжуулсан байна. Лай Шиаомин нь 2018 он буюу түүнийг гэмт хэрэгт холбогдуулан мөрдөн шалгах ажиллагаа эхлэх хүртэл “Чайна Хуарон хөрөнгийн менежмент” компанийн даргаар ажиллаж байжээ.
Тяньжинь хотын шүүхээс түүнийг эрх мэдэл, албан тушаалын байдлаа урвуулан ашиглаж “онц их хэмжээний хөрөнгө хууль бусаар олох” шунахай сэдлээр хэрэг үйлдсэн хэмээн үзжээ. Түүнчлэн энэхүү үйлдэл нь “үндэсний санхүүгийн аюулгүй байдал, санхүүгийн тогтвортой байдалд аюул учруулсан” гэж шүүхээс тогтоосон байна. Үүний дараагаар Хятадын Коммунист намаас түүний гишүүнчлэлийг цуцалжээ.
2018 оны 04 дүгээр сард түүнийг ажлаас халсан тухай шийдвэрийг гаргаж, БНХАУ-ын Дарга Ши Жиньпиний авлигын эсрэг уриалгын дагуу намын албан тушаалаас огцруулсан байна.
Лай Шиаомин нь ССТВ телевизийн сувгаар дамжуулан гэм буруугаа хүлээх үедээ “энэ мөнгөнөөс миний бие нэг ширхэг ч юань зарцуулаагүй бөгөөд ердөө хадгалж байсан. Би тус хөрөнгийг зарцуулж зүрхэлсэнгүй.” хэмээн хэлжээ. Тус телевизийн сувгаар мөн түүний хээл хахуульд авсан тансаг зэрэглэлийн автомашин болон алтан гулдмай зэргийг нийтэд харуулсан байна.
Төрийн мэдээллийн ССТВ телевизийн сувгаар шүүх хуралдаанд оролцохын өмнө гэм буруугаа хүлээн зөвшөөрч буй яллагдагчтай хийсэн ярилцлагыг нийтэд дамжуулдаг байна. Хүний эрхийн хуульчид энэхүү үйлдлийг яллагдагчдад дарамт шахалт учруулан гэм бурууг нь хүлээлгэх үйл ажиллагаа хэмээн үздэг байна.
Шүүхээс Лай Шиаоминий эд хөрөнгийг хураан авч улс төрийн эрхийг нь түдгэлзүүлэхээр шийдвэрлэжээ. Энэхүү шийтгэх тогтоол гарснаар Хятад Улсын санхүүгийн томоохон гэмт хэргийн мөрдөх шалгах ажиллагаа дуусгавар боллоо. Корпорацийн гэмт хэрэгтэй тэмцэх хүрээнд Хятад Улс хатуу байр суурь баримтлан ажиллаж байна. БНХАУ нь 2016 оноос хойш төрийн өндөр албан тушаалтан нэг хүнийг цаазалсан юм. Мөн Коммунист намын гурван удирдах албан тушаалтанд цаазаар авах ял оноосон боловч тэдний ялыг гүйцэтгэх ажиллагааг түр хугацаагаар хойшлуулаад байна.
Цаг үе
Хүүхдийн эрт илрүүлгийн үзлэгийн хамрагдалт 40 хувьд хүрлээ
Монгол Улсын Ерөнхий сайд Н.Учралын санаачилсан “За бол заавал хийе” аяны хүрээнд хүүхдийн эрүүл мэндийг хамгаалах, өвчлөл, эрсдэлийг эрт илрүүлэх, шаардлагатай тусламж, үйлчилгээнд цаг алдалгүй хамруулах ажлыг улсын хэмжээнд хэрэгжүүлж байна.
Эрүүл мэндийн сайд, Боловсролын сайдын 2026 оны наймдугаар сарын 18-ны өдрийн А/255, А/254 дүгээр хамтарсан тушаалаар цэцэрлэг, сургуульд суурилсан урьдчилан сэргийлэх, эрт илрүүлэх үзлэгийг улсын хэмжээнд зохион байгуулахаар шийдвэрлэж, аравдугаар сарын 1-нээс эхлүүлсэн.Үзлэгийг арванхоёрдугаар сарын 1-нийг хүртэл зохион байгуулж, зорилтот насны хүүхдүүдийн эрүүл мэндийн эрсдэлийг эрт илрүүлэх, шаардлагатай тусламж, үйлчилгээнд цаг алдалгүй холбох, цаашдын хяналтыг үргэлжлүүлэх зорилготой юм.
2026 оны аравдугаар сарын 15-ны өдрийн байдлаар улсын хэмжээнд үзлэгт хамрагдах 291,998 хүүхдээс 118,090 хүүхэд хамрагдаж, нийт хамрагдалт 40.4 хувьд хүрлээ.
Эрүүл мэндийн сайд Э.Батшугар, Боловсролын сайд Л.Энх-Амгалан нар ерөнхий боловсролын 31 дүгээр сургуульд ажиллаж, хүүхдийн эрүүл мэндийн эрт илрүүлгийн зохион байгуулалт, явцтай танилцлаа.
Урьдчилан сэргийлэх, эрт илрүүлгээр гурав, зургаа, 11, 15 настай хүүхдүүдийг нас, хөгжлийн онцлогт нь тохирсон багц үзлэг, үнэлгээнд хамруулж байна.
Цаг үе
2025 оны хоёрдугаар ээлжээр цэрэгт татагдсан залуус халагдлаа
2025 оны хоёрдугаар ээлжээр хугацаат цэргийн албанд татагдсан залуус албаа нэр төртэй хааж, өнөөдөр халагдлаа.
Энэ үеэр НЗДТГ-ын Цэргийн штабын дарга Г.Ялалт “Цэргийн алба хааж буй залуусын 40 орчим хувь нь алба хаах хугацаандаа мэргэжил эзэмшиж, тэсвэр хатуужил, ёс суртахуун, зарчим, хувийн зохион байгуулалтыг сурч, хөгждөг. Цэргийн албаа нэр төртэй хаасан залуустаа баяр хүргэж, сурсан мэдсэн бүхнээ ашиглан, эх орныхоо өнцөг бүрд ажиллаж, сурч, хөдөлмөрлөн, цэргийн албаны нэр төрийг өндөрт өргөж явахыг уриалж байна” гэлээ.
Цэрэг, дайчдын халагдах үйл ажиллагаа жанжин Д.Сүхбаатарын талбайд болж, гэр бүлийнхэнтэйгээ уулзсан юм. Халагдсан цэргүүдийн сэтгэгдлээс хүргэж байна.
Б.Дөлгөөнмөрөн: Цэрэгт амьдралд хэрэгтэй олон зүйлийг сурдаг
-Зэвсэгт хүчний 032 дугаар ангид алба хаасан. Төрийн хүндэт харуулын анги, төрийн ёслол, хүндэтгэлийн утга агуулга гүнзгий учраас бахархдаг. Өглөө эрт босох, цаг баримтлах гээд амьдралд хэрэгтэй олон зүйлийг цэрэгт явснаар сурдаг.
З.Цэрэндорж: Цэргийн алба хааснаар аливаад буурьтай ханддаг болсон
-Цэргийн албаа нэр төртэй хаагаад ирлээ. Сэтгэгдэл өндөр байна. Найзуудаасаа сална гэхээр уйтгартай боловч цэргийн албанаас их юм сурч, албаа амжилттай хаасандаа баяртай байна. Цэргийн алба хааснаар эр хүн болж төлөвшиж, юманд буурьтай, суурьтай ханддаг болсон. Жолооны үнэмлэхтэй халагддаг. Олон юм сурч, үеийн залуусынхаа хаана яваагаа мэдэрлээ.
Б.Батдэлгэр: Цэрэгт мартагдашгүй дурсамж, олон найзтай боллоо
-Цэрэгт мэргэжил эзэмшиж, жолооны үнэмлэхтэй ч болдог. Хувийн зохион байгуулалт, эх оронч үзэл, сахилга бат, тэсвэр тэвчээртэй байхыг цэргийн албанаас сурсан. Нэг жилийг хамтдаа өнгөрүүлсэн олон найзтай боллоо.
Цаг үе
Б.Пүрэвдавга: “Sky Shuttle” нийтийн тээврийн барилга угсралтын ажлыг гуравдугаар сард эхлүүлэхээр ажиллаж байна
CОP17 бага хурлын үеэр Улаанбаатар хотын нийтийн тээвэрт “Sky Shuttle” тээврийн хэрэгслийг нэвтрүүлэх талаар нийслэлийн Засаг дарга бөгөөд Улаанбаатар хотын Захирагч Б.Пүрэвдагва, BYD группийн удирдлагуудтай санамж бичиг байгуулсан билээ. Энэхүү санамж бичгийн хүрээнд төслийн ажлыг эрчимжүүлэх зорилгоор нийслэлийн Засаг дарга Б.Пүрэвдагва өнөөдөр BYD группийн “Sky Shuttle” төслийн захирал Никола Жан тэргүүтэй төлөөллийг хүлээн авч уулзлаа.
Тус уулзалтаар “Sky Shuttle” төслийн ТЭЗҮ-ийг CОP17 бага хурлын удирдамжийн дагуу энэ арванхоёрдугаар сард багтаан боловсруулж, ирэх оны гуравдугаар сараас барилга угсралтын ажлыг эхлүүлэхээр урьдчилсан байдлаар тохиролцов. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва "Бид ямар нэгэн эргэлзээгүйгээр 2027 онд BYD группийн “Sky Shuttle” төслийг тэргүүн зэрэгт хэрэгжүүлж эхлүүлэх хүсэл эрмэлзэлтэйгээр ажиллаж байна. Нийслэлийн Засаг даргын захирамжийн дагуу BYD групптэй холбоотой гурван үндсэн чиглэлээр ажлын хэсэг байгуулсан” гэв.
Нийтийн тээврийн шинэ шийдэл болох “Sky Shuttle” нь батарейгаар ажиллаж, тусгай зориулалтын өндөрлөсөн замаар зорчих юм. Ингэснээр авто замын түгжрэлээс үл хамааран нийтийн тээврийн хөдөлгөөнийг зохион байгуулах боломж бүрдэнэ хэмээн албаныхан онцлов.
