Цаг үе
“Нээлттэй Хөвсгөл 2023” өдөрлөгт зочлоорой
“Нээлттэй Хөвсгөл 2023” өдөрлөг Сүхбаатарын талбайд өнөөдөр нээлтээ хийлээ. Хөвсгөл аймгийн Засаг даргын тамгын газар, Хөвсгөл аймгийн нутгийн зөвлөл хамтран “Нээлттэй Хөвсгөл 2023” арга хэмжээг Улаанбаатар хотноо энэ сарын 6,7–ны өдрүүдэд зохион байгуулж байна.
Өдөрлөгийг нээж Хөвсгөл аймгийн Засаг дарга П.Лхагважав “Монгол Улсын Засгийн газрын “Алсын хараа-2050”, Шинэ сэргэлтийн бодлого дахь Хөдөөгийн сэргэлтийг хэрэгжүүлэх хүрээнд Хөвсгөл аймгийн Нутгийн зөвлөлтэйгээ хамтарч “Нээлттэй Хөвсгөл 2023” арга хэмжээг зохион байгуулж байна.
Засгийн газраас 2023-2025 оныг “Монголд зочлох жил” болгон зарласантай холбогдуулан 2023 оныг “Хөвсгөлд зочлох жил” болгон зарлаж, олон эвент арга хэмжээг бид нутагтаа зохион байгуулсан. “Мөсний баяр”, “Цаа, цасны баяр”, “Сарлагийн баяр”, “Алунгоо эхийн сургаалийн баяр”, “Монгол бөхийн баяр”, “Тэсийн голын нүүдэлчид” гээд өв соёлын наадам зохион байгуулсны үр дүнд 120 гаруй мянган дотоод, гадаадын аялагчид жуулчид Хөвсгөл аймагт маань зочилж, аяллаа.
Энэ өдрүүдэд Хөвсгөлчүүд бид нийслэлчүүд та бүхэнд өөрсдийн үйлдвэрлэсэн бараа бүтээгдэхүүнээ сурталчлан таниулахаар хүрэлцэн ирлээ. Сум бүр өөрийн үйлдвэрлэдэг жижиг, дунд үйлдвэрлэлийн бүтээгдэхүүн, малчин түмний маань үйлдвэрлэдэг цагаан идээ, бусад гар урлалаа та бүхэнд танилцуулж байна. Маргааш Улаанбаатар зочид буудалд “Хөвсгөлийн ирээдүй” хэлэлцүүлэг болно. Хөвсгөл аймаг хэрхэн хөгжиж байгаа, эдийн засгийн ямар үзүүлэлттэй байна, цаашид ямар чиглэлээр хөгжих талаараа энэ хэлэлцүүлгээр тодорхой ярина.
Хөвсгүүлчүүд бид зургаан ястан, зургаан хошуу малтай, улсдаа хөдөө аж ахуйн салбарт тэргүүлж ирсэн аймаг. Цаашдаа ч хөдөө аж ахуйн салбар Хөвсгөл аймгийн эдийн засгийн гол тулгуур байх болно” хэмээн хэлсэн үгэндээ онцлов.
Дараагаар нь “Нээлттэй Хөвсгөл 2023” арга хэмжээг санаачлан зохион байгуулагч, Хөвсгөл аймгийн Нутгийн зөвлөлийн дарга Ц.Цэцэнзориг “Улаанбаатар хотод Хөвсгөл аймгийн Засаг даргын Тамгын газар, 24 сумтайгаа хүрэлцэн ирсэн байна. Хөвсгөл аймаг аялал жуулчлалын салбарт тулгуур төв болон үйл ажиллагаа тэлж байгаа. Энэ цаг үед бид хамтран ажиллаж байж аливаа салбар, бизнесийг хөгжүүлнэ гэдэг зорилготой. Бид өөрсдийгөө таниулахаас гадна хамтран ажиллаж, хөрөнгө оруулалт татах юм.
Хамгийн цэвэр органик хүнс бидэнд байдаг. Энэ онцлогоороо бид улсдаа төдийгүй дэлхийд гайхагдсан бараа бүтээгдэхүүн экспортлох зорилготой. Энэ зорилгоо хэрэгжүүлэхэд шинэ технологи, инновац хэрэгтэй. Тиймээс бид Улаанбаатарчуудтайгаа, монголчуудтайгаа мэдээллээ солилцсноор хөгжилд хүрнэ” хэмээв.
Ийнхүү Сүхбаатарын талбайд “Нээлттэй Хөвсгөл 2023” өдөрлөг үргэлжилж байна. Хоёр өдөр үргэлжлэх энэ арга хэмжээний үеэр
- “Хөвсгөлийн ирээдүй” нээлттэй уулзалт,
- “Нээлттэй ажлын байр”-ны үзэсгэлэн,
- “Хөвсгөлөөр аялцгаая” үзвэр, мэдээлэл,
- “Хөвсгөлчүүд дайлж байна” амталгаат худалдаа,
- “Нээлттэй Хөвсгөл-Нутгаа зорьё” сумдын танилцуулга,
- “Хөвсгөлийн цуурай” Хөвсгөл аймгийн зураач, урчуудын үзэсгэлэн,
- “Хөх сувдын орон” урлагийн тоглолт,
- “Хөвсгөл гоёл” үндэсний хувцасны загварын үзүүлбэр,
- “3X3” сагсан бөмбөгийн тэмцээн, номын үзэсгэлэн худалдаа зэрэг арга хэжээ зохион байгуулахаар төлөвлөжээ.
“Нээлттэй Хөвсгөл”-д ирснээр та Хөвсгөл аймгийн онцлогтой танилцаж, урлаг соёлын үзүүлбэр үзэж, Хөвсгөлийн брэнд бүтээгдэхүүн, хүнс, хоолыг амтлах, худалдан авах боломжтой.
Хөвсгөл нутагт ажиллаж амьдрах бүх талын дэмжлэг, боломжийг танилцуулах, аймгийн аялал жуулчлалыг хөгжүүлэх, бизнес эрхлэгчид, малчид тариаланчдын үйлдвэрлэсэн бүтээгдэхүүн үйлчилгээг орон даяар таниулан сурталчлах, борлуулах, бизнесийн түншлэлийг тогтоох, шинэ инновац туршлага судлах, дэвшилтэт технологи, тоног төхөөрөмж нэвтрүүлэх, төр хувийн хэвшлийн түншлэл, бизнес эрхлэгчдийн хамтын ажиллагааг өргөжүүлэн хөгжүүлэхэд чиглэж байна.
Өдөрлөгт Хөвсгөл аймгийн 21 сумын 200-аад иргэн, аж ахуйн нэгж 250 гаруй нэр төрлийн бүтээгдэхүүн, үйлчилгээгээр оролцож байна.
Н.Энхлэн
Цаг үе
Хүүхдийн эрт илрүүлгийн үзлэгийн хамрагдалт 40 хувьд хүрлээ
Монгол Улсын Ерөнхий сайд Н.Учралын санаачилсан “За бол заавал хийе” аяны хүрээнд хүүхдийн эрүүл мэндийг хамгаалах, өвчлөл, эрсдэлийг эрт илрүүлэх, шаардлагатай тусламж, үйлчилгээнд цаг алдалгүй хамруулах ажлыг улсын хэмжээнд хэрэгжүүлж байна.
Эрүүл мэндийн сайд, Боловсролын сайдын 2026 оны наймдугаар сарын 18-ны өдрийн А/255, А/254 дүгээр хамтарсан тушаалаар цэцэрлэг, сургуульд суурилсан урьдчилан сэргийлэх, эрт илрүүлэх үзлэгийг улсын хэмжээнд зохион байгуулахаар шийдвэрлэж, аравдугаар сарын 1-нээс эхлүүлсэн.Үзлэгийг арванхоёрдугаар сарын 1-нийг хүртэл зохион байгуулж, зорилтот насны хүүхдүүдийн эрүүл мэндийн эрсдэлийг эрт илрүүлэх, шаардлагатай тусламж, үйлчилгээнд цаг алдалгүй холбох, цаашдын хяналтыг үргэлжлүүлэх зорилготой юм.
2026 оны аравдугаар сарын 15-ны өдрийн байдлаар улсын хэмжээнд үзлэгт хамрагдах 291,998 хүүхдээс 118,090 хүүхэд хамрагдаж, нийт хамрагдалт 40.4 хувьд хүрлээ.
Эрүүл мэндийн сайд Э.Батшугар, Боловсролын сайд Л.Энх-Амгалан нар ерөнхий боловсролын 31 дүгээр сургуульд ажиллаж, хүүхдийн эрүүл мэндийн эрт илрүүлгийн зохион байгуулалт, явцтай танилцлаа.
Урьдчилан сэргийлэх, эрт илрүүлгээр гурав, зургаа, 11, 15 настай хүүхдүүдийг нас, хөгжлийн онцлогт нь тохирсон багц үзлэг, үнэлгээнд хамруулж байна.
Цаг үе
2025 оны хоёрдугаар ээлжээр цэрэгт татагдсан залуус халагдлаа
2025 оны хоёрдугаар ээлжээр хугацаат цэргийн албанд татагдсан залуус албаа нэр төртэй хааж, өнөөдөр халагдлаа.
Энэ үеэр НЗДТГ-ын Цэргийн штабын дарга Г.Ялалт “Цэргийн алба хааж буй залуусын 40 орчим хувь нь алба хаах хугацаандаа мэргэжил эзэмшиж, тэсвэр хатуужил, ёс суртахуун, зарчим, хувийн зохион байгуулалтыг сурч, хөгждөг. Цэргийн албаа нэр төртэй хаасан залуустаа баяр хүргэж, сурсан мэдсэн бүхнээ ашиглан, эх орныхоо өнцөг бүрд ажиллаж, сурч, хөдөлмөрлөн, цэргийн албаны нэр төрийг өндөрт өргөж явахыг уриалж байна” гэлээ.
Цэрэг, дайчдын халагдах үйл ажиллагаа жанжин Д.Сүхбаатарын талбайд болж, гэр бүлийнхэнтэйгээ уулзсан юм. Халагдсан цэргүүдийн сэтгэгдлээс хүргэж байна.
Б.Дөлгөөнмөрөн: Цэрэгт амьдралд хэрэгтэй олон зүйлийг сурдаг
-Зэвсэгт хүчний 032 дугаар ангид алба хаасан. Төрийн хүндэт харуулын анги, төрийн ёслол, хүндэтгэлийн утга агуулга гүнзгий учраас бахархдаг. Өглөө эрт босох, цаг баримтлах гээд амьдралд хэрэгтэй олон зүйлийг цэрэгт явснаар сурдаг.
З.Цэрэндорж: Цэргийн алба хааснаар аливаад буурьтай ханддаг болсон
-Цэргийн албаа нэр төртэй хаагаад ирлээ. Сэтгэгдэл өндөр байна. Найзуудаасаа сална гэхээр уйтгартай боловч цэргийн албанаас их юм сурч, албаа амжилттай хаасандаа баяртай байна. Цэргийн алба хааснаар эр хүн болж төлөвшиж, юманд буурьтай, суурьтай ханддаг болсон. Жолооны үнэмлэхтэй халагддаг. Олон юм сурч, үеийн залуусынхаа хаана яваагаа мэдэрлээ.
Б.Батдэлгэр: Цэрэгт мартагдашгүй дурсамж, олон найзтай боллоо
-Цэрэгт мэргэжил эзэмшиж, жолооны үнэмлэхтэй ч болдог. Хувийн зохион байгуулалт, эх оронч үзэл, сахилга бат, тэсвэр тэвчээртэй байхыг цэргийн албанаас сурсан. Нэг жилийг хамтдаа өнгөрүүлсэн олон найзтай боллоо.
Цаг үе
Б.Пүрэвдавга: “Sky Shuttle” нийтийн тээврийн барилга угсралтын ажлыг гуравдугаар сард эхлүүлэхээр ажиллаж байна
CОP17 бага хурлын үеэр Улаанбаатар хотын нийтийн тээвэрт “Sky Shuttle” тээврийн хэрэгслийг нэвтрүүлэх талаар нийслэлийн Засаг дарга бөгөөд Улаанбаатар хотын Захирагч Б.Пүрэвдагва, BYD группийн удирдлагуудтай санамж бичиг байгуулсан билээ. Энэхүү санамж бичгийн хүрээнд төслийн ажлыг эрчимжүүлэх зорилгоор нийслэлийн Засаг дарга Б.Пүрэвдагва өнөөдөр BYD группийн “Sky Shuttle” төслийн захирал Никола Жан тэргүүтэй төлөөллийг хүлээн авч уулзлаа.
Тус уулзалтаар “Sky Shuttle” төслийн ТЭЗҮ-ийг CОP17 бага хурлын удирдамжийн дагуу энэ арванхоёрдугаар сард багтаан боловсруулж, ирэх оны гуравдугаар сараас барилга угсралтын ажлыг эхлүүлэхээр урьдчилсан байдлаар тохиролцов. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва "Бид ямар нэгэн эргэлзээгүйгээр 2027 онд BYD группийн “Sky Shuttle” төслийг тэргүүн зэрэгт хэрэгжүүлж эхлүүлэх хүсэл эрмэлзэлтэйгээр ажиллаж байна. Нийслэлийн Засаг даргын захирамжийн дагуу BYD групптэй холбоотой гурван үндсэн чиглэлээр ажлын хэсэг байгуулсан” гэв.
Нийтийн тээврийн шинэ шийдэл болох “Sky Shuttle” нь батарейгаар ажиллаж, тусгай зориулалтын өндөрлөсөн замаар зорчих юм. Ингэснээр авто замын түгжрэлээс үл хамааран нийтийн тээврийн хөдөлгөөнийг зохион байгуулах боломж бүрдэнэ хэмээн албаныхан онцлов.
-
Улстөр нийгэм2025/12/15
Т.Даваадалай: Ашиглалтын шаардлага хангахгүй байрыг орон сууцжуулах 133 төсөл 65...
-
Цаг үе2024/07/03
Улаанбаатарт өдөртөө 30 хэм дулаан
-
Улстөр нийгэм2022/11/07
Ерөнхийлөгч У.Хүрэлсүх Уур амьсгалын өөрчлөлтийн асуудлаарх дэлхийн удирдагчдын ...
-
Цаг үе2025/12/10
ОНРТ-ийн Үндэсний зөвлөлд нэр дэвшигчдээс сонголт хийх ажлын хэсэг байгууллаа