Шударга мэдээ
Гэр хороололд инженерийн хангамжийг нэвтрүүлсэн “Дэд бүтцийн төв” төслийн нээлт боллоо
Нээлтийн ажиллагаанд Монгол Улсын Их Хурлын дарга Г.Занданшатар, Улсын Их Хурлын гишүүн, Өргөдлийн байнгын хорооны дарга М.Оюунчимэг, Нийслэлийн Засаг дарга бөгөөд Улаанбаатар хотын захирагч С.Амарсайхан болон дүүрэг, хорооны Засаг дарга, ИТХ-ын төлөөлөгч, иргэдийн төлөөлөл оролцов.
Нээлтийн үйл ажиллагаан дээр хэлсэн үгэндээ Монгол Улсын Их Хурлын дарга Г.Занданшатар, нийслэлчүүдийн хувьд нэг том ажлын эхлэл, шинэ дэвшил болсон бүтээн байгуулалтын ажилтай танилцаж байгаадаа баяртай байна гээд гэр хорооллын орчныг орон сууцны хорооллын орчинтой адилхан хэмжээнд авчирсан ажлын эхлэл бол энэхүү “Дэд бүтцийн төв” төсөл.
Хоёр жилийн өмнө Засгийн газрын Хэрэг эрхлэх газрын даргаар ажиллаж байхдаа энэ төслийг санаачилсан УИХ-ын гишүүн М.Оюунчимэг болон нийслэлийн удирдлагуудтай ярилцаад, хотын утаа, төвлөрлийг сааруулах ажлын нэг нь байж болох юм гэж үзэж, эхлүүлж байсан энэ ажил өнөөдөр биеллээ олж, дуусчээ.
Сайжруулсан түлшийг хэрэглээнд нэвтрүүлснээр утаа багассаныг бид бүгд харж байна. Агаар, орчны бохирдлыг бууруулах арга замуудыг ашигласнаар үр дүн гарч болохын илэрхийлэл нь сайжруулсан түлш болон энэ төсөл юм.
Одоо хашаандаа хаус бариад, тохилог сайхан орчин бүрдүүлэн амьдрахад иргэдийн оролцоо чухал хэмээв.
Тэрбээр мөн энэ ажилд хичээн зүтгэсэн УИХ-ын гишүүн, Өргөдлийн байнгын хороон дарга М.Оюунчимэг болон Нийслэлийн Засаг дарга С.Амарсайхан, холбогдох бүх албан тушаалтнууд, иргэдэд талархал илэрхийлээд, цаашид ч бусад дүүрэг, хороонд хэрэгжүүлэхийн төлөө хамтран зүтгэхийг уриаллаа.
УИХ-ын гишүүн, Өргөдлийн байнгын хорооны дарга М.Оюунчимэг, гэр хорооллыг ирээдүйд байшин хороолол болгож, аюулгүй, эрүүл, эко орчин бүрдүүлэх хамгийн оновчтой шийдэл нь энэ төсөл гэж үзэж байна. Энэ ажилд БНХАУ-аас таван тэрбум, нийслэлийн төсвөөс таван тэрбум төгрөгийн хөрөнгө оруулалт хийж, 14 га газрыг хамарсан инженерийн таван шугам татаж, шугамуудыг “Дэд бүтцийн төв”-тэйгөө холбосон. Мөн 4 хэсэгт 1.5 км хар зам тавьсан, цэвэрлэх байгууламжийг бүрэн ашиглалтад оруулсан ийм цогц төслийг цаашид өөр хороодод хэрэгжүүлэхийн төлөө ажиллана. Амжилттай хэрэгжих эхлэл нь ийнхүү тавигдлаа гэв.
Нийслэлийн Засаг дарга С.Амарсайхан хэлсэн үгэндээ, Улсын Их Хурлын дарга Г.Занданшатар энэ ажлыг анхнаас нь бодлогоор дэмжсэн болон тойргоос сонгогдсон УИХ-ын гишүүн М.Оюунчимэг, дүүрэг, хорооны удирдлагууд гар нийлж ажилласныг тодотгоод, энэхүү төслиг ирэх жилүүдэд бусад дүүрэг, хороонд хэрэгжүүлэхээр 2020 оны төсөвт мөнгийг нь суулгаад ажиллаж байна гэлээ.
Нээлтийн үйл ажиллагааны дараа төсөлд хамрагдсан айл өрхүүдээр оров. Хувьсгалчдын 13 дугаар гудамжинд оршин суудаг Н.Отгоныд зочлоход гэрийн эзэд “Халаалтын паар, ариун цэврийн өрөөний суултуур, угаалтуур зэргээ өөрсдөө базаасан. Үлдсэн бүх зардлыг улсаас гаргасан. Хашаандаа орон сууцанд байгаагаас дутахааргүй, цахилгаан, дулаан, цэвэр, бохир устай, засмал замтай ийм орчинд амьдрах болсон нь үнэхээр таатай байна” хэмээж байлаа.
Төслийн хүрээнд нийт гурван гудамжны 285 айл өрхийг цахилгаан, дулааны болон бохирын шугамд холбосон төдийгүй эдгээр айлуудын хэрэглээний бохир усыг хамгийн өндөр хэмжээнд цэвэршүүлэх хүчин чадалтай Герман технологийн цэвэрлэх байгууламжийг мөн барьж байгуулсан байна.
Үйл ажиллагааны төгсгөлд албан тушаалтнууд Дэд бүтцийн төвийн үйл ажиллагаа болон, цэвэрлэх байгууламжтай танилцлаа.
Цэвэрлэх байгууламж нь хоногт 530 шоо метр ус цэвэрлэх хүчин чадалтай, бохир усыг 99.9 хувь цэвэршүүлж, цэвэршүүлсэн усыг зүлэг ногоо услах зэргээр ашиглах төдийгүй цаашид хүчин чадлыг нь өргөтгөх боломжтой гэж “Дэд бүтцийн төв” төслийнхөн хэлж байв.
Шударга мэдээ
Эрчим хүчний дамжуулалт, түгээлтийн алдагдлыг бууруулахад нөлөөтэй төсөл хэрэгжүүлнэ
Эрчим хүчний сайд Б.Найдалаа Азийн хөгжлийн банкны Монгол Улс дахь суурин төлөөлөгчийн газрын Үйл ажиллагаа эрхэлсэн дарга Чандра Мохан Арораг хүлээн авч уулзлаа.
Уулзалтын эхэнд тус банктай хамтран хэрэгжүүлж буй эрчим хүчний төслүүдийн талаар хэлэлцэв. Тухайлбал, Азийн хөгжлийн банктай (АХБ) хамтран өрсөлдөөнт сонгон шалгаруулалтаар хэрэгжүүлэхээр төлөвлөсөн нар, салхин цахилгаан станцын төслийн талаар ярилцлаа. Ийм төслүүд хэрэгжүүлснээр бүс нутгийн эрчим хүчний хангамжийн найдвартай байдал дээшилж, сэргээгдэх эх үүсвэрийн эзлэх хувь хэмжээ нэмэгдэхийн сацуу нэгдсэн сүлжээнд нийлүүлэх цахилгааны үнийг бууруулж, сүлжээний найдвартай, тогтвортой ажиллагааг сайжруулах ач холбогдолтой юм.
Түүнчлэн “Төвийн бүсийн нэгдсэн сүлжээнд ажиллах ус хуримтлуурт усан цахилгаан станц” төслийн талаар мэдээлэл солилцов.
Манай улсын эрчим хүчний хэрэглээ жилд дунджаар 7-8 хувь, оргил ачаалал жил бүр 100 МВт-аар нэмэгдэж байгаа учраас эрэлтийг бүрэн хангах боломжгүйд хүрээд буй. Нөгөөтээгүүр, эрчим хүчний нэгдсэн сүлжээг горим ажиллагааны хувьд тогтвортой, өөрийгөө зохицуулах чадвартай болгох нь тулгамдсан асуудал болж байна. Иймээс импортын эрчим хүчийг багасгах, сэргээгдэх эх үүсвэрүүдийн хэлбэлзлийг тохируулах, эрчим хүчний үйлдвэрлэл, хэрэглээний балансыг тогтворжуулах зорилгоор ус хуримтлуурт УЦС болон Монгол Улсын дотоодын урсгалтай голуудад бага, дунд чадлын УЦС барих ажлыг үе шаттай зохион байгуулахаар төлөвлөн ажиллаж байна. Нарийвчилсан үнэлгээгээр УЦС барих хамгийн оновчтой байршлыг тодорхойлсон бөгөөд ТЭЗҮ боловсруулах болон төслийн байршил сонгоход АХБ-ны зөвлөхүүдтэй хамтран ажилласан юм.
Төвийн бүсийн эрчим хүчний системд 100 МВт-аас дээш хүчин чадалтай ус хуримтлуурт УЦС баривал урьдчилсан тооцсоноор 150-200 МВт-ын суурилагдсан хүчин чадалтай нар, салхины эх үүсвэрийг шинээр байгуулах боломж бүрдэнэ. Засгийн газрын тогтоолоор төслийн барилга байгууламж барих газрыг улсын тусгай хэрэгцээнд аваад байна. Уг төслийн санхүүжилтийн хэлбэрийг шийдвэрлэхээр ярилцаж байгаагаа АХБ-ныхан хэлж байлаа.
Мөн “Эрчим хүчний ухаалаг системийг хөгжүүлэх” төсөл хэрэгжүүлэхээр төлөвлөж байна. Манай улсад эрчим хүчний дамжуулалт, түгээлтийн алдагдал дунджаар 15 хувь байгаа нь бусад орныхтой харьцуулахад өндөр. Уг төслийн ТЭЗҮ-ийг Эрчим хүчний яамны захиалгаар АХБ-ны техник туслалцааны хөрөнгөөр ХБНГУ-ын компаниуд гүйцэтгэсэн. Тус банкнаас санхүүжилт олгох эл төслийг хэрэгжүүлснээр Монгол Улсын нийт цахилгаан дамжуулах, түгээх сүлжээний дэд бүтцийн хяналт, удирдлагын системийг шинэчлэх юм.
Эдгээр болон бусад төслийг хэрэгжүүлэхэд салбарын яам дэмжинэ гэдэгт итгэлтэй байгаагаа Чандра Мохан Арора илэрхийлээд, цаашид илүү өргөн хүрээнд хамтран ажиллана гэдгээ онцлов. Мөн тэрбээр АХБ-ны Манила дахь төв оффист ажилладаг эрчим хүчний мэргэжилтнүүд Монголд байнга ирдэг тул мэдээлэл, туршлага солилцох боломжтой гэж байлаа. Сайд Б.Найдалаа “Та бүхний жинтэй дэмжлэгэд бид баяртай байдаг” хэмээн тодотгоод, эрчим хүчний ногоон шилжилтийн стратегийг ойрын хугацаанд батлахаар төлөвлөж байгаа болон шинэчлэлийн хүрээнд хийж эхэлсэн ажлууд, баримтлах бодлогынхоо талаар мэдээлэл өгсөн юм гэж Эрчим хүчний яамнаас мэдээллээ.
Шударга мэдээ
"Монгол эр хүн" зорилтот төслийн хүрээнд 1238 эрэгтэй сурагчдыг эрүүл мэндийн үзлэгт хамруулна
Дархан-Уул аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн санаачилгаар “Эрүүл мэндийн газар, Боловсролын газар, Нэгдсэн эмнэлэг, Гүүднэйборс ОУТББ-ын Мангирт ОНХХ хамтран аймгийн Ерөнхий боловсролын сургууль, коллежийн 17 насны 1238 эрэгтэй суралцагчийг урьдчилан сэргийлэх, эрүүл мэндийн үзлэг, оношилгоонд хамруулна.
Энэ үйл ажиллагааг 2026 оны 05.04-05.08-ны өдрүүдэд зохион байгуулж байна.
Энэхүү үзлэг нь ирээдүйд учирч болох эрүүл мэндийн эрсдэлээс урьдчилан сэргийлэх, өвчлөл илэрсэн тохиолдолд дараагийн шатлалын эрүүл мэндийн байгууллагад эрүүлжүүлэх, эмнэлгийн тусламж үйлчилгээг авах нөхцөл бололцоог бүрдүүлэх юм.
Үзлэгийн багцад дараах оношилгоо, зөвлөгөө багтсан байна.
- Ерөнхий эмчийн үзлэг
- Хэвлийн хэт авиан оношилгоо
- Зүрхний цахилгаан бичлэг
- Нүдний үзлэг
- Мэс засал, Арьс харшлын үзлэг
- Сэтгэцийн эмчийн зөвлөгөө
- Биеийн жингийн индекс тодорхойлох
- Бэлгийн замын халдварт өвчний түргэвчилсэн шинжилгээ
Шударга мэдээ
100 байршилд автобусны карт цэнэглэгч киоск төхөөрөмжийг байршуулжээ
Нийслэлийн 100 байршилд UBCARD автобусны картыг худалдан авах болон цэнэглэх боломжтой. Мөн та гар утсандаа UBCARD аппликейшнийг ашиглан картаа хүссэн үедээ, хаанаас ч хялбархан цэнэглэх боломжтой юм байна.
-
Цаг үе2023/05/31
Өнөөдөр тахиа жилтнээ аливаа үйлийг хийхэд эерэг сайн
-
Улстөр нийгэм2021/10/20
Монгол Улсаас Бүгд Найрамдах Энэтхэг Улсад суух Элчин сайдыг хүлээн авч уулзлаа
-
Улстөр нийгэм2020/12/01
УИХ-ын байнгын хороо, ажлын хэсэг цахимаар хуралдана
-
Улстөр нийгэм2025/09/02
Шинэ Зеланд Улсын Парламентын Төлөөлөгчдийн танхимын дарга Жерард Браунли “Чин...