Монгол Улс, ОХУ-ын Зэвсэгт хүчний хамтарсан “Сэлэнгэ-2020” байлдааны буудлагатай тактикийн хээрийн сургууль 13 дахь жилдээ зохион байгуулагдлаа. Монгол Улс, ОХУ-ын Батлан хамгаалах яамд хоорондын цэрэг-техникийн хамтын ажиллагааны гэрээний дагуу “Сэлэнгэ” сургууль нь 2008 оноос “Дархан” нэртэйгээр анх хоёр орны нутаг дэвсгэрт ээлжлэн жил бүр зохион байгуулагдаж ирсэн бөгөөд энэ жил дэлхий нийтийг хамарсан “Ковид-19” цар тахлын нөхцөл байдалтай уялдуулан, Монгол Улсын Онцгой комиссын өгсөн шийдвэр,зөвлөмжийн дагуу анх удаа өөр өөрийн нутаг дэвсгэрт нэгэн зэрэг зохион байгуулагдсан юм. Угтаа уг сургууль нь өнгөрсөн 12 жилийн хугацаанд Монгол Улс, ОХУ-ын нутаг дэвсгэрт ээлжлэн зохион байгуулагдсан ба энэ жил ОХУ-ын Буриадын “Бурдун”-ы полигонд зохион байгуулагдах товтой байсан юм.

Энэ удаагийн сургуулийг “Терроризмын эсрэг операцын үед тактикийн хамтарсан ажиллагаанд бэлтгэх, хөрш улсуудын Зэвсэгт хүчний салбаруудын харилцан ажиллагаатайгаар хууль бус зэвсэгт бүлэглэлийг бүслэн хааж устгах” гэсэн сэдвийн хүрээнд гурван үе шаттайгаар Зэвсэгт хүчний 016 дугаар нэгтгэлийн Сургалтын төв, зэвсэглэл, цэргийн техникийг түшиглэн зохион байгуулсан бөгөөд Зэвсэгт хүчний Хуурай замын цэргийн 10 нэгтгэл, ангийн цэргийн алба хаагчид мэргэжлийнхээ дагуу үүрэг гүйцэтгэсэн юм. “Сэлэнгэ” сургуулийн үр дүнд хоёр орны цэргийн алба хаагчдын цэргийн хэргийн мэдлэг, дадлага, ур чадвар, бэлтгэлжилтийн түвшин нэмэгдэж, зэвсэглэл техникийн бэлэн байдлыг дээшлүүлэх, хоёр орны Зэвсэгт хүчний нэгтгэл, анги салбаруудын харилцан ажиллах боломжийг нэмэгдүүлэх зэрэг олон талын холбогдолтой билээ.

"Сэлэнгэ-2020" сургуулийн удирдагчаар Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр, сургуулийн штабын даргаар Хуурай замын цэргийн командлалын төрөл мэргэжлийн офицер, хурандаа Н.Сүхбаатар, батальоны захирагчаар Хуурай замын цэргийн командлалын Удирдлага төлөвлөлтийн хэлтсийн төлөвлөлтийн офицер, дэд хурандаа Л.Тамираа, батальоны штабын даргаар Зэвсэгт хүчний 016 дугаар нэгтгэлийн МББ-ын захирагч, хошууч А.Ганболд нар ажилласан юм. "Сэлэнгэ-2020" байлдааны буудлагатай тактикийн хээрийн сургуулийн удирдагчийн бодлого төлөвлөгөөгөөр батальоны тактикийн бүлгийг отолтын бүлэг, маневрын бүлэг, дайрах бүлэг, самнах бүлэг, гал цохилтын бүлгээр зохион байгуулж, тактикийн болон галын цохилт, маневрын харилцан ажиллагааг хангаж явуулснаараа онцлог болсон юм.

Сургуулийн хаалтын ажиллагаанд Батлан хамгаалахын дэд сайд Б.Баярмагнай, Зэвсэгт хүчний Жанжин штабын дарга, хошууч генерал Д.Ганзориг, Батлан хамгаалахын сайдын зөвлөх, бэлтгэл дэслэгч генерал Ц.Дашзэвэг, БХЯ-ны СБТГ-ын дарга, хурандаа С.Ганбямба, ЗХЖШ-ын Ажиллагааны удирдлагын газрын дарга, хурандаа С.Дашзэвэг тэргүүтэй албаны хүмүүс оролцож, сургуулийн нэгдсэн буудлага болон цэргийн техникийн ёслолын жагсаалыг үзэж сонирхов.

ЗХЖШ-ын дарга, хошууч генерал Д.Ганзориг сургуулийн хаалтын ажиллагааны үеэр хэлсэн үгэндээ “Монгол Улс, ОХУ-ын Зэвсэгт хүчний хамтарсан “Сэлэнгэ-2020” тактикийн хээрийн сургуулийг зохион байгуулсан болон оролцсон нийт бие бүрэлдэхүүн Та бүхэндээ Зэвсэгт хүчний Жанжин штабын даргын зөвлөлийн нэрийн өмнөөс болон хувиасаа чин сэтгэлийн талархал илэрхийлье. 13 жилийн өмнө “Дархан” нэртэйгээр эхэлсэн энэхүү тактикийн хээрийн сургууль өнөөдөр олон талаар үр дүнгээ өгч, хоёр орны цэргийн хамтын ажиллагааг тогтвортой бөгөөд өндөр түвшинд хөгжихөд чухал үүрэг гүйцэтгэж ирснийг энэ удаагийн сургуулийн бодлого, зорилтыг бүрэн дүүрэн хэрэгжүүлэхийн төлөө нэгэн сэтгэлээр зүтгэсэн цэргийн алба хаагчдадаа хүндэт индрийн өмнөөс онцлоход таатай байна.

Намрын дунд сарын энэ хүйтэн өдрүүдэд цасан шуурга, жиндүүхэн салхийг ч ажралгүй өгөгдсөн үүрэг даалгавраа амжилттай биелүүлэхийн төлөө цэрэг хүний ёсоор зүтгэсэн эрхэм генерал, офицер, ахлагч, байлдагч, түрүүч, ажилтан албан хаагчдадаа цаашдын албанд нь өндөр амжилт хүсье” хэмээн онцолсон юм. Үүний дараа зарим алба хаагчдыг Батлан хамгаалах салбарын шагнал болон Хуурай замын цэргийн командлалын дурсгалын цагаар, оролцсон нийт бие бүрэлдэхүүнийг “Сэлэнгэ-2020” тактикийн хээрийн сургуулийн медаль, батламжаар шагнаж, урамшуулсан юм. Сургуулийн төгсгөлд ЦДБЭЧ-ын авьяаслаг уран бүтээлчид цэрэг бүжиг, цэрэг дуугаар голлосон урлагийн тоглолтоо дэглэлээ.

Ахлах дэслэгч Д.Болормаа