Цаг үе
Төрийн банк "Бизнес эрхлэгчдэд зориулсан сургалтын цахим платформ"-ыг нэвтрүүлээ
Төрийн банк 2021 оноос эхлэн Дундаж давхаргыг дэмжих зорилтын хүрээнд олон нийтэд санхүүгийн боловсрол олгох, бичил жижиг дунд бизнес эрхлэгчдэд санхүүгийн зөвлөгөө мэдээлэл өгөхөөр Инкубатор төвийг байгуулан ажиллаж байгаа билээ.
Тус Инкубатор төв нь бизнес эрхлэгчдэд санхүүгийн асуудлаа зөв тодорхойлох, бизнес санаагаа бодитой байдлаар бататгах, боломжит хэрэглэгчээ танин мэдэх, хөрөнгө оруулалтаа оновчтой удирдаж, эрсдэлээс бизнесээ сэргийлэх сургалтыг тогтмол явуулсаар ирсэн. Төрийн банк Санхүү эдийн засгийн их сургуультай хамтран бизнес эрхлэгчдэд зориулсан сургалтын цар хүрээгээ өргөжүүлэн “АНХАН ШАТ”-ны онлайн сургалтын платформыг 2024 оны 10 дугаар сарын 07-ны өдрөөс эхлэн зах зээлд нэвтрүүллээ.
Сургалтад хамрагдан, хичээлийн агуулгын хүрээнд шалгалт өгч тэнцсэн харилцагчид Өрхийн бизнесийн зээл, Гарааны бизнесийн эргэлтийн хөрөнгийн зээл болон Гарааны бизнесийн хөрөнгө оруулалтын зээлийн бүтээгдэхүүнээс өөрт тохирсон зээлийг судлуулан авах боломжтой болно.
Цахим платформыг хөгжүүлснээр бизнес эрхлэгчдийн цаг завыг хэмнэх ач холбогдолтой төдийгүй Монгол орны өнцөг булан бүрд байх харилцагчид орон зайнаас үл хамааран ижил түвшний мэдлэг олж аван үйл ажиллагаагаа өргөжүүлэх боломжоор хангагдаж байгаагаараа давуу талтай юм. Мөн цаашид Улаанбаатар хот, орон нутагт байгаа харилцагч, зээлдэгч нарын санхүү, бизнес, энтрепренершипийн мэдлэг, чадварыг хөгжүүлэх, сургалтын түвшнээс хамаарч тэдний эрхэлж буй бизнест бодитой дэмжлэг, үр дүн үзүүлэхэд чиглэсэн ахисан түвшний сургалтуудыг үе шаттайгаар зохион байгуулахаар ажиллаж байна.
Энэхүү платформ нь үйл ажиллагаагаа өргөжүүлэн тэлж, санхүүгийн зөвлөгөө мэдээлэл авах хүсэлтэй бүх бизнес эрхлэгчдэд нээлттэй байна. Харилцагч та цахим сургалтад ЭНД дарж хамрагдан, өөрийн бизнесийн онцлогт тохирсон зээлээ шийдвэрлүүлээрэй.
Цаг үе
Нийт дуудлагын 79 хувь буюу 96 нь объектын гал түймэр байна
Улсын хэмжээнд өнгөрсөн долоо хоногт /2025.10.06-10.12/ нийслэлийн 8 дүүрэг, 18 аймгийн 44 суманд аюулт үзэгдэл, ослын 121 удаагийн дуудлага бүртгэгдлээ.
Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэж, 7 иргэний амь насыг авран хамгаалж, 46 иргэнийг утаажилтын бүсээс гаргаж, аюулгүй байдлыг ханган ажиллалаа.
Нийт дуудлагын 79 хувь буюу 96 нь обьектын гал түймэр, 7 хувь буюу 9 нь ой хээрийн гал түймэр, 12 хувь буюу 15 нь хүний үйл ажиллагаатай холбоотой осол, 2 хувь буюу 1 нь биологийн гаралтай аюулт үзэгдэл байна.
Цаг үе
2025-2026 оны өвөлжилтийн бэлтгэл ажлын хүрээнд 9518 тонн давс, 9590 тонн бодис нөөцөлж байна
Өнөөдрийн байдлаар нийслэлийн өвөлжилтийн бэлтгэл ажил 93 хувьтай үргэлжилж байна. Энэ хүрээнд УБЗАА-ны Тохижилт, хог хаягдлын удирдлагын газрын дарга Г.Билгүүнээс давс, бодисын нөөцийн талаар тодрууллаа.
Тэрбээр “Нийслэлийн хэмжээнд “Бид өвөлд бэлэн үү” аяныг зохион байгуулж, 48 ТҮК-ийн техник хэрэгсэл, давс, бодисын нөөцийн байдлыг газар дээр нь шалган ажилласан. Дүүргүүдийн өвөлжилтийн бэлэн байдал 95-98 хувийн гүйцэтгэлтэй байна. Нийслэлийн хэмжээнд зам талбайн цэвэрлэгээ, халтиргаа гулгаанаас сэргийлэх зориулалттай тусгай техник хэрэгслийг нэмэгдүүллээ. Тодруулбал, энэ онд давс, бодис цацагч 24, зам цэвэрлэгээний 111 тусгай зориулалтын машин, техникээр парк шинэчлэлт хийсэн. Өнгөрсөн оны хувьд 3075 тонн давс, 1000 орчим тонн бодисоор өвлийг давж байсан бол энэ онд дунджаар тав дахин их нөөцтэй буюу 9518 тонн давс, 9590 тонн бодисыг нөөцлөхөөр төлөвлөж буй. Өнөөдрийн байдлаар давсны нөөц бүрэн хангагдсан, бодисын нөөц 60-70 хувийн гүйцэтгэлтэй байна” гэлээ.
Цаашид УБЗАА-аас дүүргүүдэд дэмжлэг болох зорилгоор 1000 тонн давс, бодисыг нийлүүлэх худалдан авах ажиллагаа зохион байгуулж байгаа аж. Улаанбаатар хотын хэмжээнд 48 ТҮК-ийн 3000 гаруй зам талбайн ажилтан, 1000 орчим техник хэрэгсэлтэйгээр 15 сая ам метр талбайд цас, мөсийг цэвэрлэдэг. Иймд иргэд, аж ахуйн нэгж байгууллагууд цас их орсон үед ойр орчмын 50 метр газрын цасыг цэвэрлэж, хотын үйлчилгээний ажилчдад дэмжлэг үзүүлэхийг УБЗАА-ны Тохижилт, хог хаягдлын удирдлагын газрын дарга Г.Билгүүн уриалав.
Цаг үе
Нийслэлийн өвөлжилтийн бэлтгэл ажил 93 хувьтай үргэлжилж байна
Нийслэлийн 2025-2026 оны өвөлжилтийн бэлтгэл ажлыг хангах зорилгоор энэ оны нэгдүгээр сараас эхлэн нэгдсэн төлөвлөгөө гарган, шат дараалсан арга хэмжээнүүдийг авч хэрэгжүүлж байна. Уг төлөвлөгөөнд инженерийн дэд бүтэц, авто зам, тохижилт, бүтээн байгуулалт зэрэг нийт 750 төсөл арга хэмжээ тусгагдсан бөгөөд өнөөдрийн байдлаар өвөлжилтийн бэлтгэл ажил 93 хувийн гүйцэтгэлтэй үргэлжилж байна.
Тухайлбал,
- Дулаан хангамжийн салбарын өвөлжилтийн бэлтгэл ажил 98 хувь,
- ОСНАА 95.4 хувь,
- Цахилгаан хангамж 94,7 хувь,
- Эрүүл мэндийн газар 94 хувь,
- Боловсролын газар 88 хувь,
- Ус сувгийн Удирдах газар 86 хувьтай тус тус үргэлжилж байна. Төлөвлөсөн ажлуудыг аравдугаар сарын 30-ны өдөрт багтаан бүрэн дуусгахаар ажиллаж байна.
УБЗАА-ны Хотын инженерийн дэд бүтцийн газрын дарга Л.Алтангэрэл “Хотын хэмжээнд 100 гаруй км авто замыг шинээр тавьж, мөн хэмжээний зам засвар, шинэчлэлийг хийгээд байна. 88.4 км урт инженерийн шугамыг (гадна, гол шугам, дулаан, цэвэр ус) шинээр татсан. Энэ ажил нь сүүлийн 30 жилд хийгдээгүй томоохон бүтээн байгуулалт болсон. Мөн 15.6 км дулааны гол шугамыг өргөтгөн шинэчилсэн бөгөөд энэ өвөл хотын төв, төмөр зам, Зайсан, Зургаадугаар бичил хороолол, Баянзүрх дүүргийн 26-р хороо зэрэг томоохон бүсүүдийн дулаан хангамжийн чанар эрс сайжрах юм. Засаг даргын 2025.08.14-ны зөвлөлийн хурлаар өвөлжилтийн явцад хүндэрч болзошгүй сургууль, цэцэрлэг боловсролын байгууллагууд болон орон сууцны конторуудын шугам сүлжээний асуудлыг хэлэлцэж, нийт 6 тэрбум төгрөгийн нэмэлт санхүүжилт шийдвэрлэн, ес болон аравдугаар сард засвар шинэчлэлийн ажлыг хийж байна гэв’’.
-
Улстөр нийгэм2025/07/01
Намууд санхүүгийн хагас жилийн тайлангаа нийтэд мэдээлнэ
-
Цаг үе2020/01/10
Иргэн Б.Болороогийн нөхөр нас барсан хэргийн давтан шинжилгээний дүгнэлт гарсан ...
-
Цаг үе2019/07/08
Үс шинээр үргээлгэх буюу засуулбал өнгө зүс сайжирна
-
Цаг үе2020/07/15
Улаанбаатарт өдөртөө 30 хэм дулаан