Улстөр нийгэм
“Хүнсний хангамж, аюулгүй байдал” үндэсний хөдөлгөөн Улаанбаатар хотод эхэллээ
Монгол Улсын Ерөнхийлөгчийн санаачилгаар ирэх таван жилд гол нэрийн 19 төрлийн хүнсний бүтээгдэхүүнээр дотоодын хэрэгцээгээ бүрэн хангах зорилгоор “Хүнсний хангамж, аюулгүй байдал” үндэсний хөдөлгөөнийг орон даяар өрнүүлсэн.
Энэ хүрээнд Ерөнхийлөгчийн Тамгын газар, Хүнс, хөдөө аж ахуй хөнгөн үйлдвэрийн яам, Нийслэлийн Засаг даргын Тамгын газар, Нийслэлийн хүнс, хөдөө аж ахуйн газар хамтран уг хөдөлгөөнийг Улаанбаатар хотод өрнүүлэхээр Соёлын төв өргөөнд нээлтээ нээлээ.
Нээлтийн арга хэмжээнд Нийслэлийн ИТХ-ын дарга Ж.Батбаясгалан, Нийслэлийн Засаг дарга Д.Сумъяабазар, Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр болон тус салбарын эрдэмтэн судлаачид, үйлдвэр эрхлэгчид, газар тариалан, мал аж ахуйн салбарын төлөөлөл 1200 гаруй зочид, төлөөлөгч оролцов.
Энэхүү арга хэмжээг нээн Нийслэлийн ИТХ-ын дарга Ж.Батбаясгалан “Бид нийслэлийг хөгжүүлэх таван жилийн үндсэн чиглэлдээ инновацад тулгуурласан өрсөлдөх чадвартай үйлдвэрлэл, үйлчилгээ, хөрөнгө оруулалт, оюуны бүтээмжийг дэмжиж, бүтээлч, бие даасан, боловсруулах салбар давамгайлсан тогтвортой эдийн засагтай хот болох зорилтыг тавин ажиллаж байна. Нийгэм, эдийн засгийн хөгжлийн суурь болсон хүнс, хөдөө аж ахуйн салбар нь хөдөлмөрийн багтаамж ихтэй, эдийн засгийн бодит өсөлтийг хангасан, орон нутгийн тогтвортой хөгжилд хувь нэмэр оруулж байгаа стратегийн чухал салбар юм. Хүнс, хөдөө аж ахуйн салбарт дэвшүүлсэн бодлого, зорилтуудыг бүрэн хэрэгжүүлэхэд төрийн болон төрийн бус байгууллага, мэргэжлийн холбоодын хамтын ажиллагаа, ажлын уялдаа, хувийн хэвшлийн санаачилга, оролцоо чухал ач холбогдолтой. Хотын хүнсний хангамжийн импортын хамаарлыг бууруулж, дотоодын үйлдвэрлэлийг нэмэгдүүлэн улмаар хүнс экспортлогч улс болох зорилтыг хангахад Нийслэлийн хүнс үйлдвэрлэгч та бүхэн манлайлан оролцоно гэдэгт бат итгэлтэй байна” гэж хэллээ.
Нийслэлийн Засаг дарга Д.Сумъяабазар “Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг улс орон даяар өрнүүлээд байгаа. Монгол улсын нийт хүн амын 50 хувь буюу 1,6 сая иргэн Улаанбаатар хотод ажиллаж, амьдарч байна. Хүн ам өсөхийн хэрээр улам нэмэгдэж буй хүнсний эрэлт хэрэгцээнд тулгуурлан хүнс, хөдөө аж ахуйн гаралтай үйлдвэрлэлийг нэмэгдүүлэх, дотоодоос хангах, импортын бүтээгдэхүүний хамаарлыг бууруулах, хүнсний сүлжээний бүхий л үйлчилгээг аюулгүй байдал, эрүүл ахуйн шаардлагад нийцүүлэн хангах нь чухал” хэмээв.
Хүнсний гол нэрийн бүтээгдэхүүн буюу мах, гурил, төмсийг Монгол Улс 100 хувь дотоодоос хангаж байгаа бөгөөд сүү, сүүн бүтээгдэхүүн, гурил, махан бүтээгдэхүүн, хүнсний ногоо өндөгний хангамжийг улам нэмэгдүүлэх шаардлагатай байгаа аж. Харин ургамлын тос, давс, цөцгийн тос, тахианы мах, хүлэмжийн ногооны хангамж импортоос шууд хамааралтай бөгөөд сүүн бүтээгдэхүүн, ургамлын тос, давсны үйлдвэрлэлийг дотоодоос хангах боломж байгааг зохион байгуулагчид хэлсэн юм.
Мөн арга хэмжээний үеэр нийслэлд хөдөө аж ахуйн гаралтай хүнсний бүтээгдэхүүн хамгийн ихээр бэлтгэн нийлүүлж буй стратегийн ач холбогдол бүхий бүс нутаг болох Төв, Булган, Сэлэнгэ аймгийн Засаг дарга нар хүрэлцэн ирж, цаашид хамтын ажиллагааг өргөжүүлэх талаар саналаа илэрхийллээ.
Улстөр нийгэм
ЗГ: Эм, эмнэлгийн хэрэгслийн тухай хуулийн шинэчилсэн найруулгын төслийг өргөн мэдүүлнэ
Засгийн газрын ээлжит хуралдаан 2024 оны дөрөвдүгээр сарын 24-нд болж дараах асуудлыг хэлэлцэн шийдвэрлэлээ.
Эм, эмнэлгийн хэрэгслийн тухай хуулийн шинэчилсэн найруулгын төсөл, түүнтэй холбогдуулан бусад хуульд нэмэлт, өөрчлөлт оруулах хуулийн төслийг хэлэлцээд УИХ-д өргөн мэдүүлэхээр тогтлоо.
Эм, эмнэлгийн хэрэгсэл, биологийн идэвхт бүтээгдэхүүний үнэ, чанарын өнөөгийн байдалд хяналт шалгалт, үнэлгээ хийсэн.
Үнэлгээнд хамрагдсан эмийн 90 гаруй хувьд 45 хүртэл хувиар нэмэгдсэн, дотоодын үйлдвэрийн дийлэнх эмийн бөөний үнэ 40-өөс дээш хувиар нэмэгджээ. Иймд иргэд эрүүл мэндийн тусламж, үйлчилгээ авахдаа санхүүгийн эрсдэлд орохоос сэргийлэх, бууруулах зорилгоор эмийн үнийн зохицуулалтын хууль, эрх зүйн орчныг боловсронгуй болгох хэрэгцээ, шаардлага байна.
Нийгмийн эрүүл мэндийн ноцтой байдал, гамшгийн үеийн эрүүл мэндийн тусламж үйлчилгээний нөөцийн бэлэн байдлыг хангах, яаралтай горимоор тусламж үйлчилгээнд нэвтрүүлэх эм, эмнэлгийн хэрэгслийг бүртгэх, хадгалах, эмийн нөөц бүрдүүлэхтэй холбогдсон эрх зүйн зохицуулалтыг илүү оновчтой болгох шаардлагатай байгааг 2020 оны коронавируст халдварын цар тахлын сургамж харуулсан.
Эм, эмнэлгийн хэрэгслийн тухай хууль /Шинэчилсэн найруулга/ хэрэгжиж эхэлснээр эм, эмнэлгийн хэрэгслийн зохицуулалт олон улсын жишигт хүрэх ач холбогдолтой гэж үзэж байна.
Улстөр нийгэм
Ерөнхий сайд Л.Оюун-Эрдэнэ Бүгд Найрамдах Киргиз Улсын Парламент Жогорку Кенеш-ийн дарга Н.Шакиевт бараалхав
Mонгол Улсын Ерөнхий сайд Л.Оюун-Эрдэнэ Монгол Улсад албан ёсны айлчлал хийж буй Бүгд Найрамдах Киргиз Улсын Парламент Жогорку Кенеш-ийн дарга Нурланбек Шакиевт бараалхлаа.
Ерөнхий сайд Л.Оюун-Эрдэнэ Киргиз Улсын Парламентын даргын түвшинд анх удаа хийж буй уг айлчлалд Монгол Улсын Засгийн газар өндөр ач холбогдол өгч байгааг тэмдэглээд энэхүү айлчлал нь манай хоёр улсын уламжлалт найрсаг харилцааг гүнзгийрүүлэн хөгжүүлэх, хамтын ажиллагааг бүхий л салбарт өргөжүүлэхэд чухал хувь нэмэр оруулна гэдэгт итгэлтэй байгаагаа илэрхийлэв.
Мөн Монгол, Киргизийн найрсаг харилцааг өргөжүүлэн хөгжүүлэх, эдийн засгийн агуулгаар баяжуулах зорилгоор Монгол Улсын Ерөнхий сайдын хувиар 2023 онд Киргиз Улсад анх удаа айлчилсныг дурдаад айлчлалын үр дүнд худалдаа, эдийн засаг, боловсрол, уул уурхай зэрэг салбарын хамтын ажиллагаа өргөжин хөгжиж, тэр дундаа алт цэвэршүүлэх салбарын хамтын ажиллагааны эхлэл тавигдсанд сэтгэл хангалуун буйгаа тэмдэглэлээ.
Уулзалтын үеэр талууд сүүлийн жилүүдэд хоёр улсын харилцаа, хамтын ажиллагаа эрчимжиж, улс төрийн яриа хэлэлцээ, харилцан итгэлцэл идэвхжиж байгааг онцлоод дээд, өндөр түвшний айлчлалын үеэр яригдсан асуудлуудыг бодит ажил хэрэг болгоход хүчин чармайлт гарган нягт хамтран ажиллахаа харилцан нотлов. Түүнчлэн цаашид худалдааны эргэлтийг нэмэгдүүлэх, аялал жуулчлал, боловсрол, хөдөө аж ахуй, уул уурхайн салбарын хамтын ажиллагааг өргөжүүлэх, Монгол, Киргизийн харилцааны бэлгэ тэмдэг, нэрийн хуудас болсон хөдөө аж ахуй, хөнгөн үйлдвэрийн салбарт хамтарсан төсөл хөтөлбөр хэрэгжүүлэх боломжийн талаар ярилцлаа.
Улстөр нийгэм
УИХ: Энэ долоо хоногт чуулганы нэгдсэн хуралдаанаар
Монгол Улсын Их Хурлын 2024 оны Хаврын чуулганы энэ долоо хоногийн /2024.04.25-26/ нэгдсэн хуралдааны тов, хэлэлцэх асуудлуудыг танилцуулж байна.
-
Урлаг спорт2022/10/12
“Чингис хаан” музей энэ сарын 13-наас олон нийтэд үйлчилж эхэлнэ
-
Улстөр нийгэм2023/10/04
Дүүргүүд өвөлжилтийн бэлтгэлээ хангаад байна
-
Шударга мэдээ2022/09/29
БШУЯ: 47 дугаар цэцэрлэг 3 байранд 750 хүүхдийг сургаж байна
-
Цаг үе2020/01/06
Үс шинээр үргээлгэх буюу засуулбал эрхтэн хурц болно
Сэтгэгдэл