Их аварга Дагвадорж “АСА” циркийг худалдан авсан ид хаваа гайхуулж, төрөлх нутагтаа мэргэжлийн сумо бөхийн тэмцээнийг зохион байгуулсан цаг саяхан. Түүний хүчээр манайхан шүтэн биширдэг сумочдынхоо барилдааныг ойрын зайнаас харж, биширсэн билээ. Сумо сонирхогчдын хувьд “тэнгэрийн амьтад” эх нутагт нь хүрэлцэн ирсэнд хэн хүнгүй л олзуурхаж, ялангуяа бизнесменүүд, өрөөгөө түгжин сумо үзэж суудаг УИХ-ын гишүүд хүртэл хөл алдан гүйлдсэн юм. Манайхны хувьд бараг л ах дүү амраг садныхаа дайнд үздэг болсон сумочдод нутгийнхаа нүнжгийг харуулах гэж дээр дооргүй л хөл үймээн болсон билээ. Тухайн үедээ Чиётайкейд “Хас” банкныхан гутал үйлдвэрлэгч үндэсний компаниас ур хийц сайтай гутал захиалан бэлэглэсэн нь эрхэм сумочийн сэтгэлд их нийцсэн бололтой. Тус компанийнхан үйлдвэрлэсэн бүтээгдэхүүнээ хайрцаг, савгүй худалдаанд гаргаад олон жилийн нүүр үзсэн байна. Харин “Хас” банкныхан япон сумочийн 44 размерийн гутланд зориулсан үзэмжтэй хайрцаг заавал хийж өгөхийг хатуу анхааруулжээ. Захиалга биелүүлэгчид энэ завшааныг ашиглан өөрсдийн шошго, хаягийг тодорхой бичсэн хайрцгийг “ОБ капитал” хэвлэлийн компанид захиалан хийлгэсэн гэнэ. Тус хайрцган дээрх хаягийн дагуу шинэ оны өмнөхөн Чиётайкейн бие төлөөлөгчөөс гутлын үйлдвэрт хүсэлт ирсэн байна. Урьд өмнө “Хас” банкныхны захиалгаар 700 долларын өртөгтэйгөөр урласан гутлынхаа үнэ ханшийг яг хэвээр нь барьсан үнийн саналыг үйлвэрийнхэн тэдэнд дуулгажээ. Харин Чиётайкейгийн бие төлөөлөгч тэдний данс руу 3000 доллар гуйвуулсан байна.