МАХН-ын томчуудын байдал тогтворгүй байна. Ерөнхийлөгчийн сонгуульд ялагдал хүлээсэн Н.Энхбаяр энэ хавар улс төр дэхь өөрийнхөө хүчийг дахин олж авахын төлөө хэр чадлаараа тэмцэл хийж, С.Баяр “Элгээ солиулж магадгүй” гэдэг бор шувуу нисгэгчихээд АНУ-д чимээгүйхэн нуугдаж, Н.Энхбаярын дайралт намдаж, хүмүүсийн сэтгэл санаа тогтворжихыг тэвчээр заан хүлээж сууна. С.Баярын хувьд байдал тун эгзэгтэй байгаа. Хэрвээ Н.Энхбаярын уур уцаар, гомдол харамсал, тунирхал, МАХН-ын гишүүдийн “хаврын синдром”-той нийлчих юм бол түүнийг намын даргаас нь огцруулж, бүр болоогүй хариуцлага тооцно гэдэг дайралт ирэх нь ойлгомжтой. Тиймээс мань эр АНУ-д аль болох удаан сууж, намын Бага хурлыг хойшлуулахыг л хүсч байна. Энэ хурлыг зургаан сар хүртэл хойшлуулчихвал иргэдийн сэтгэл санаа ч тайван болчихно, Бага хуралыг 9 сар хүртэл нэхээд байх хүн ч байхгүй болох нь тодорхой.

Н.Энхбаярын гомдол Хувьсгалт намын хагарлын үндэс болох уу?

Энэ долоо хоногийн хамгийн том шуугианаар экс Ерөнхийлөгчийн сонин хэвлэлд өгсөн яриа тодорч байна. “Би Ерөнхийлөгчийн сонгуулийн тухай нуусан, хаасан үнэнийг хэлэлгүй өдий болтол дуугүй байсан. Цаг хугацаа ч хангалттай өнгөрлөө. Юм ухаардаг, эсхүл ухаарахыг хүсдэг хүнд анзаарагдаж ойлгогдох хэд хэдэн үйл явдал боллоо шүү дээ. Хууль зөрчсөн элдвийн зөрчлийг илрүүлж, яг шударгаар саналын хуудсыг тоолбол ард түмэн маань надад итгэл үзүүлж, дахин Төрийн тэргүүнээр сонгосон. Ард түмэн, сонгогчиддоо баярлалаа гэхээс өөр аргагүй.Бүр товчхон хэлбэл улсын хэмжээнд ялаад Улаанбаатарын зургаан дүүрэгт  луйвардуулаад дууссан. Сонгуулийн луйвар булхайн тухай бид өмнө нь ч их ярьсан. 7 дугаар сарын 1-ний үйл явдал ч сонгуулийн луйвартай холбоотойгоор өрнөсөн шүү дээ. Уг нь намууд нэг нэгнийгээ луйвардлаа хэмээн дайрдаг байсан. Урьд өмнө хэзээ ч, ямар ч сонгуулийн үед байгаагүй онцлог нь МАХН-ын удирдлагын, хуруу даран тоолбол гарын таван хуруунд багтах цөөхөн хүн сонгуулийн ялалтын төлөө нойроо хугаслан, хоолоо хагаслан зүтгэж байсан намынхаа мянга, мянган гишүүд дэмжигчдээ доромжлон, саналаа өгсөн олон зуун мянган сонгогчдоо үл тоомсорлон, намдаа ялалт авчрахын төлөө нэгэн үзүүрт сэтгэлээр зүтгэсэн нэр дэвшигчээ хууран мэхэлж санаатайгаар “унагаасан”. Ерөнхийлөгчийн сонгуулийн луйврыг 2008 оны УИХ-ын сонгуулийн зарим тойрогт туршиж үзчихээд, тэр ов мэхээ давтан хийсэн ч гэж хэлж болно.” Хэмээн Н.Энхбаяр ил тод мэдэгдлээ. Тэр өөрийхөө ялагдалд ганцхан С.Баярыг буруутгаж байгаагаа нуухгүй байна. Тиймээ. МАХН Н.Энхбаяр, С.Баяр гэдэг хоёр том удирдагчийн цээжин дотор зангирч байгаа өш хонзонгийн яг ирмэг дээр байна.

Н.Энхбаяр ба жагсаал

Сонгуулиас хойш бараг хагас жил хэл чимээгүй байсан МАХН-ын том лидер гэнэт амь орж, хэл ам татлаж эхэллээ. Хамгийн сонирхолтой нь түүний дуу хоолой Ардчилсан хүчний холбооны анхдугаар Их хурал, олигорхиудтай тэмцэл хийхээ зарлаад байгаа Иргэний хөдөлгөөнүүдийн жагсаал цуглаантай давхардаж байгаа нь бүр ч олон хүнийг гайхшруулав. “За яахав. Жагсаал цуглаанаар гаршаад байгаа О.Магнай, Д.Батзандан нарын хаврын синдром хөдөлчихсөн гүйж яваа гэж тооцьё. Тэгвэл төр тэргүүлж байсан Н.Энхбаяр тэгвэл яагаад эд нартай зэрэгцээд гарч ирэв” гэдэг хардлага бас л олон хүнийг гайхшруулж, жагсаал цуглааны захиалагчаар мань эрийг тодруулж эхэллээ. Н.Энхбаяр...Түүнийг “Өөрийнхөө санааг хэрэгжүүлэхийн тулд хэнтэй ч нэг өвөрт багтаж, хэнийг ч хүлээн зөвшөөрч, бас ямар ч дайсантайгаа “хуримлахаас” буцахгүй эр” гэж улс төрийн хүрээнийхэн тодорхойлдог. Олон жил ил далд дайсагнасан М.Энхсайханыг өөртөө татаж, худалч, луйварчин хэмээн цоллуулж, МАХН болон Н.Энхбаяр гэдэг хүнийг олон жил шаварт хутгасан Буянгийн Жагаатай нийлчихэж л чадаж байсан хүн. Тиймээс энэ удаа Энхбаяр АН-ын дарга нараа унагах даалгаварыг Ц.Элбэгдорж тэргүүтэй томчуудаас авчихаад сэтгэл санаа нь тогтворгүй яваа  Д.Батзандан, О.Магнай нарын жагсаал, цуглааныг санхүүжүүлж, далдаас удирдаж байна хэмээн хардаж байгаа юм.